MIRERO 14

₁Muḓi u fhaṱwa nga vhuṱali ha musadzi;

musadzi wa tsilu ene u a u thutha.

₂A si na vhufhura u ofha Muṋe washu;

wa nḓila dza magombikwa ene u a mu nyadza.

₃Zwiambo zwa tsilu zwi ḽi rwisa muṱana,

hone milomo ya muṱali i a mu tsireledza.

₄Hu si na phulu a hu na tshinyalelo ya zwiḽiwa zwadzo,

hone mavhele manzhi a ḓiswa

nga nungo dza phulu.

₅Ṱhanzi i fulufhedzeaho a i zwifhi;

ya mazwifhi yone i shulula mazwifhi fhedzi.

₆Munyefuli u ṱoḓa vhuṱali,

he vhutoto;

wa ṱhalukanyo a zwi mu konḓeli u wana nḓivho.

₇Tinya tsilu,

ḽi nga si u funze tshithu.

₈Vhuṱali ha wa vhuronwane vhu mu sumbedza nḓila;

tshidzingindi tshi fhurwa nga vhutsilu hatsho.

₉Tsilu ḽi nyadza u pfumelwa;

vha si na vhufhura vha a takalelana.

₁₀Mbilu i ḓivha vhuṱungu hayo,

na dakalo ḽayo a i kovhekani na muṅwe.

₁₁Nnḓu ya muvhi i ḓo pwashekanywa;

ya a si na vhufhura i ḓo shudufhadzwa.

₁₂Hu na nḓila ine muthu a vhona i yone-yone,

ya fhedza nga u mu isa lufuni.

₁₃Naho muthu a tshi sea,

mbilu i nga kha ḓi vha yo ṱungufhala;

dakalo ḽi nga ḓi fhedza nga u ṱungufhala.

₁₄O pambuwaho nḓilani ya Mudzimu u ḓo kaṋa zwe a zwala;

na muvhuya u ḓo pfufhelwa zwivhuya zwawe.

₁₅Tshilendele ndi tendele;

wa vhuronwane u sedza hune a ya.

₁₆Wa vhuṱali u na vhusedzi;

u furalela vhuvhi;

tsilu a ḽi londi,

ḽi wela zwithu nga nṱha.

₁₇Wa mbilwana u ita zwa vhutsilu;

wa vhumbulu u ḓivhengisa nga vhathu.

₁₈Mukovhe wa a si na maano ndi vhutsilu;

tshiala tsha wa vhuronwane ndi nḓivho.

₁₉Vhaitazwivhi vha losha vhavhuya;

vhavhi vha luvha khoroni dza vha no thetshelesa Mudzimu.

₂₀Mushai u sandwa na nga vhadzulelani vhawe;

mupfumi ene u na khonani nnzhi.

₂₁U nyadza muṅwe ndi u tshinya;

u itela mushai vhuthu ndi one mashudu.

₂₂Kani vha no tanda ḽi sa fukwi a vha khou xela?

Vha no langana zwivhuya a vha nga shandukelwi, vha ḓo funwa.

₂₃Mushumi wa biko u a vhuelwa;

a no sokou amba nga mulomo fhedzi u ḓo shaya.

₂₄Muṱali u ḓo ambadzwa tshiala tsha lupfumo;

tsilu ḽo kungela vhutsilu fhedzi.

₂₅Ṱhanzi ya ngoho i tshidza vhathu;

ine ya zwifha ndi tshifheṱi.

₂₆Ane a ofha Muṋe washu

o wana vhushavhelo ho khwaṱhaho;

na vhana vhawe ḽi ḓo vha bako ḽavho.

₂₇U ofha Muṋe washu

ndi tshone tshisima tsha vhutshilo,

hu tinyisa muthu zwikwekwe zwa lufu.

₂₈Khosi ndi khosi nga vhathu;

muvhusi a shaya vhalanda u a lovha.

₂₉Ane a si fhele mbilu u na ṱhalukanyo khulu;

wa mbilwana u ṱana vhutsilu.

₃₀Mbilu yo rulaho i ṋea muvhili vhutshilo;

vivho ḽone ndi ṱhahala.

₃₁Ane a kandeledza vhashai u nyadza Muvhumbi wavho;

u itela vhaheḓana vhuthu ndi u hulisa Mudzimu.

₃₂Muvhi u wiswa nga vhuvhi hawe;

wa u thetshelesa Mudzimu u wana vhushavhelo

naho hu tshi fiwa.

₃₃A na ṱhalukanyo ha ḓisumbedzi;

tsilu ḽone ḽi a ḓiṱana.

₃₄U thetshelesa Mudzimu hu hudza lushaka;

vhutshinyi vhu lu ḓisela samba.

₃₅Mukoma ane a shuma nga vhuṱali u takadza khosi;

a no ita zwi shonisaho u a i sinyusa.