MARKOSI 4

₁Yesu a dovha a funza e khunzikhunzini ya Dzivha ḽa Galelia. Vhathu vha kuvhanganela u mu pfa, vha ḓala lwe a vhuya a dzhena tshikepeni a dzula. Tshikepe tshone tsho vha tshi maḓini, vhathu vho ima khunzikhunzini. ₂Yesu a vha funza zwithu zwinzhi nga zwifanyiso. A tshi khou funza o ri, ₃“Thetshelesani mafhungo aya: Ho vhuya ha vha na muṅwe munna we a bva a tshi yo zwala mbeu. ₄Musi a tshi khou zwala, iṅwe ya wela nḓilani, zwiṋoni zwa ḓa zwa i ḽa. ₅Iṅwe ya wela kha lutombo he ha vha hu na mavu maṱukuṱuku. Yeneyo ya mela nga u ṱavhanya, ngauri mavu a hone o vha e si manzhi. ₆Hone musi ḓuvha ḽi tshi bva, ḽa fhisa uyo mutomba vhunga midzi yo vha i songo dzhena fhasi, wa mbo ḓi ṋoka. ₇Iṅwe ya wela mipfani, iyo mipfa i tshi mela ya i pwanyeledza i si pakate. ₈Hone iṅwe ya wela mavuni avhuḓi, ya mela, ya aluwa, ya vhuya ya shela thoro; iṅwe ṱhotshe ya vha na thoro dza 30, iṅwe ya vha na 60, iṅwe ya vha na ḓana.” ₉Yesu a mbo ri, “A na nḓevhe nga a ḓipfele!”

₁₀Musi vhe nga tshavho, vha 12 na vhaṅwe vhafunziwa vha Yesu vha mu humbela u ṱalutshedzwa aḽa a zwifanyiso. ₁₁A vha fhindula a ri, “Inwi no dzumbululelwa tshiphiri tsha muvhuso wa Mudzimu, hone vhaḽa vha si vhaṅwe nga riṋe vha vhudzwa mafhungo aya nga zwifanyiso, ₁₂hu u itela uri

₁₃Ndi hone Yesu a tshi vha vhudzisa a ri, “Arali itshi tshifanyiso ni sa tshi pfi, zwiṅwe zwine zwa kha ḓi ḓa ni ḓo zwi pfa hani? ₁₄Tshifanyiso itshi tshi amba hezwi: Tshine muzwali a zwala ndi ipfi ḽa Mudzimu. ₁₅Hune a tshi zwala ya wela nḓilani, zwi amba avho vhane vha ri vha kha ḓi bva u pfa ipfi ḽa Mudzimu, Saṱhane a mbo ḓi ḓa a tswa mbilu dzavho. ₁₆Hune a tshi zwala ya wela kha lutombo, zwi amba avho vhane vha ri u pfa ipfi ḽa Mudzimu vha mbo ḓi ḽi ṱanganedza nga mbilu tshena, ₁₇hone vhunga hu si na hune ḽa nga ṱoka midzi khavho, a vha lengi u wa; vha tshi vho tambudzelwa ipfi ḽa Mudzimu na u tovholelwa ḽone vha mbo ḓi ḽi furalela na zwenezwo. ₁₈Hune a tshi zwala ya wela mipfani, zwi amba avho vhane vha ri vho pfa ipfi ḽa Mudzimu ₁₉ḽa pwanyeledzwa nga u vhilaela nga zwa vhutshilo na u xedzwa nga u funesa lupfumo na u tama zwithu zwa tshakha-tshakha, vha si vhe na mitshelo. ₂₀Hune i tshi zwalwa ya wela mavuni avhuḓi, zwi amba avho vhane vha ri u pfa ipfi ḽa Mudzimu vha ḽi ṱanganedza, vha vhuya vha aṋwa mitshelo. Vhaṅwe vhavho vha aṋwa 30, vhaṅwe 60, vhaṅwe ḓana.”

₂₁Yesu a dovha a vha vhudzisa a ri, “Kani-ha luvhone lu ḓela u tibwa nga mvuvhelo kana u vhewa fhasi ha mmbete? Kani a lu vhewi vhudzuloni halwo? ₂₂A hu na tsho dzumbwaho tshine tsha sa ḓo dzumbululwa; nahone a hu na na tshiphiri tshine tsha sa ḓo bvela khagala.

₂₃“A na nḓevhe kha a ḓipfele!”

₂₄Yesu a vha vhudza a ri, “Thetshelesani zwavhuḓi! Muelo une na elela vhaṅwe ngawo, na inwi Mudzimu u ḓo ni elela-vho ngawo, nahone u tshi vho fhira uḽa we inwi na ela ngawo. ₂₅Muthu a na zwawe u ḓo dovha a engedzwa zwiṅwe, hone a si na tshawe u ḓo dovha a dzhielwa na zwiṱukuṱuku zwine a vha nazwo.”

₂₆Yesu a tshi isa phanḓa a ri, “Muvhuso wa Mudzimu u fana na muthu o zwalaho mbeu tsimuni yawe. ₂₇Vhusiku u a ḓieḓetshela, nga matsheloni a ḓivutshela zwawe, nga ngei mutomba u tshi khou runga, wa aluwa, ene a sa ḓivhi tshi u medzaho. ₂₈Ndi mavu one aṋe ane a itisa uri goroi i aluwe i vhuye i rumbuwe: tsha u thoma hu vhonala mutomba, wa vhuya wa rumbuwa ha vhuya ha bvelela ṱhotshe yo shelaho thoro; ₂₉musi goroi yo no vhibva vhathu vha konou bva na segere u yo tshea ngauri tshifhinga tsha khaṋo tshi vha tsho swika.”

₃₀Yesu a ri, “Nṋa muvhuso wa Mudzimu ri ḓo u fanyisa na mini? Ri ḓo wana tshifanyiso-ḓe tsha u u ṱalutshedza? ₃₁U fana na mbeu ya muhuyu, ine ya vha yone mbeu ṱhukhusa. ₃₂Muthu u a i zwala; musi i tshi mela ya vho vha muri muhuluhulu u na matavhi o hulaho lune na zwiṋoni zwa vhuya zwa ḓa zwa fhaṱa zwiṱaha khawo.”

₃₃Yesu o vha a tshi ḓi funza ipfi ḽa Mudzimu nga zwifanyiso zwinzhi zwi fanaho na zwenezwi; a tshi tou vha vhudza zwine vha kona u zwi ṱalukanya fhedzi. ₃₄Ho ngo vhuya a amba navho nga iṅwe nḓila arali hu si nga zwifanyiso; a konou ṱalutshedza vhafunziwa vhawe zwoṱhe vhe nga tshavho.

₃₅Ḓuvha ḽeneḽo nga madekwana Yesu a vhudza vhafunziwa vhawe a ri, “Nga ri wetshele seli ha dzivha.” ₃₆Vha mbo sia gogo ḽa vhathu; vhafunziwa vha dzhena tshikepeni tshenetsho tshe Yesu a vha o no vha khatsho, tsha ṱuwa na zwiṅwe zwikepe zwe zwa vha zwi henefho. ₃₇Ha vuwa ḓumbu ḽihulu, maḓi a thoma u dzhena tshikepeni a vhuya a nga a sa tshi ḓadza. ₃₈Yesu o vha o eḓela nga murahu o siamela. Vhafunziwa vha mu vusa vha ri, “Vhafunzi, nṋa a vha vhuyi vha zwi londa ri tshi khou ṱoḓa u lovha?” ₃₉Yesu a vuwa, a kaidza ḓumbu na magabelo uri zwi dzike, nangoho zwa mbo ḓi dzika, ha tou dzokoto. ₄₀Ndi hone Yesu a tshi amba na vhafunziwa vhawe a ri, “No tshenuswa ngani? Kani ni tshee vhathu vha si na fulufhelo?” ₄₁Hone vhone vha farwa nga nyofho khulu, vha thoma u vhudzisana nga tshavho vha tshi ri, “Ndi muthu-ḓe hoyu ane a kaidza ḓumbu na lwanzhe, zwa mu thetshelesa?”