MARKOSI 3

₁Muṅwe musi Yesu a dovha a dzhena sinagogo. Henefho ho vha hu na munna o omaho tshanḓa. ₂Ha dovha ha vha na vhaṅwe vhathu vho lalelaho Yesu uri vha vhone arali a tshi ḓo fhodza uyo muthu nga Sabatha uri vha kone u mu hwelela. ₃Yesu a mbo amba na uyo munna o omaho tshanḓa a ri, “Iḓani ni ime ngeno phanḓa.” ₄Ndi hone a tshi vhudzisa vhaḽa vhathu a ri, “Ndi zwifhio zwine Mulayo wa ri tendela u ita nga Sabatha? Ndi u tonda, kana ndi u vhaisa naa? Ndi u tshidza muthu, kana ndi u mu lozwa naa?” Vhone vha sokou ṅo. ₅Yesu a vha sedza vhoṱhe o sinyuwa, o tou ṱungufhala nga u vhona vho omisa ṱhoho dzavho. Ndi hone a tshi amba na uyo munna o omaho tshanḓa a ri, “Onyolosani tshanḓa tshaṋu.” A mbo tshi onyolosa tsha vhuelela ngonani. ₆Zwo no ralo Vhafarisei vha mbo ḓi bva afho sinagogo, vha yo ṱangana khoroni na vha tshigwada tsha Herude, vha thoma u luka maano a u vhulaha Yesu.

₇Yesu na vhafunziwa vhawe vha mbo ṱuwa vho livha Dzivhani ḽa Galelia, a tevhelwa nga mavhuthu a bvaho Galelia, na a Judia ₈na Jerusalema na Idumia na seli ha Jorodani, na thungo dza Tiro na Sidoni, vha ḓa khae nge vha pfa zwe a ita, ₉vha ḓala lwe Yesu a vhuya a vhudza vhafunziwa vhawe uri vha dzule vho mu lugisela tshikepe, nga u ofha uri vhathu vha nga ḓo mu pwanyeledza. ₁₀O vha o no fhodza vhathu vhanzhi; ha vho ḓa vhalwadze vhoṱhe vha tshi tou pwanyeledzana uri vha mu kwame. ₁₁Vha re na thuṅwa dza Saṱhane vho vha vha tshi ri u mu vhona vha wa henefho phanḓa hawe vha tshi zhamba vha tshi ri, “Iwe u Murwa wa Mudzimu!” ₁₂Hone Yesu a ḓi dzi kaidza o tou khwaṱhisa uri dzi si bule uri ndi Ene nnyi.

₁₃Ndi hone Yesu a tshi gonya thavhani a vhidza vhane a funa, vha ḓa khae.

₁₄A nanga vha 12 a ri vha pfi Vhaapostola.

A vha nanga uri vha dzule nae na u vha ruma u yo ḓivhadza mafhungo maḓifha ₁₅a vha ṋee maanḓa a u pandela thuṅwa dza Saṱhane. ₁₆Madzina a vhenevho vhaapostola vha 12 khea: Ndi Simoni, we Yesu a ri nga a pfi Pitrosi; ₁₇na Jakopo ṅwana wa Zebedia, na Johanisi murathu wawe, vhe Yesu a ri nga vha pfi Buanerigisi, ḽine ḽa amba uri “Vhanna vha vhuhali sa nḓadzi”; ₁₈na Andrisi, na Filipi, na Batholomio, na Matiosi, na Thomasi, na Jakopo ṅwana wa Alifiosi, na Thadiasi, na Simoni Muhali-wa-Mudzimu, ₁₉na Judasi Iskariote, we a vho ḓo fheṱa Yesu.

₂₀Yesu a ya hayani. Ha dovha ha kuvhangana vhathu vhanzhi-vhanzhi, lwe Yesu na vhafunziwa vhawe vha kundwa na tshifhinga tsha u ḽa.

₂₁Musi vha hawe vha tshi zwi pfa, vha mbo ḓi bva uri vha yo mu dzhia, ngauri ho vha hu tshi vho pfi o ṱangana ṱhoho.

₂₂Vhaṅwe vhaḓivhi vha Mulayo vha bvaho Jerusalema vho vha vha tshi ri, “O dzhenwa nga Belesebulu!” vha dovha vha ri, “Maanḓa aya a u pandela thuṅwa dza Saṱhane o a ṋewa nga yone khosi yadzo.” ₂₃Zwi tshi ralo Yesu a vha vhidza, a thoma u vha fanyisedzela a ri, “Nṋa no no vhuya na pfa hu tshi pfi Saṱhane o pandela Saṱhane? ₂₄Arali shango ḽa ḓifhandekanya ḽa bva zwigwada zwivhili tshiṅwe tshi tshi lwa na tshiṅwe, ḽi a tshinyala. ₂₅Arali muṱani ha bva zwigwada zwivhili zwa lwa nga tshazwo, muṱa wonoyo ndi hone wo pwashea. ₂₆Vhunga zwo ralo, na muvhuso wa Saṱhane arali wa bva zwigwada zwivhili tshiṅwe tshi tshi lwa na tshiṅwe, u nga si khwaṱhe, u a fhalala.

₂₇“A hu na ane a nga sokou dzhena nḓuni ya muhali a kumba thundu yawe. U fanela u thoma u vhofha uyo muhali, ndi hone a tshi ḓo kona u mu ṱangula.

₂₈“Zwino ipfani-ha: Vhathu vha nga hangwelwa vhutshinyi havho hoṱhe, na musi vho tamba nga dzina ḽa Mudzimu. ₂₉Hone ane a vhuya a nyefula Muya Mukhethwa, onoyo a nga si vhuye a hangwelwa na kathihi, ngauri o ita tshivhi tshi sa hangwelwi.” ₃₀Yesu a tshi vhuya a amba hezwo ndi nge vhaṅwe vha vha vha tshi ḓi ri, “U na thuṅwa ya Saṱhane.”

₃₁Ha mbo swika mme a Yesu na vharathu vhawe, vha ima nnḓa vha isa fhungo ḽa uri vha khou mu ṱoḓa. ₃₂Vhathu vhe vha vha vho dzula na Yesu vha amba nae vha ri, “Mme avho na vharathu vhavho na dzikhaladzi khevho afho nnḓa, vha khou vha ṱoḓa.” ₃₃Yesu a ri, “Mme anga ndi nnyi? Vharathu vhanga ndi vhonnyi?” ₃₄A lavhelesa vhathu vho dzulaho nae a ri, “Mme anga na vharathu vhanga ndi havha! ₃₅Ane a ita zwine Mudzimu a zwi funa, ndi ene murathu wanga; ndi ene khaladzi anga; ndi ene mme anga.”