MIKA 6

“Takuwa, hwelela dzithavha,

mivhundu nga i pfe zwine wa amba.

₂Inwi dzithavha,

ipfani zwine Muṋe washu a hwelela vhathu,

inwi miteo ya ḽifhasi ya lini na lini, thetshelesani.

Muṋe washu u ṱoḓa u sengisa vhathu vhawe,

u khou vhea Vhaisraele mulandu.”

₃Muṋe washu u ri,

“Vhathu vhanga, ndo ni itani?

Ndo ni kula nungo ngani? Mphinduleni.

₄Hufha ndo ni pfulusa shangoni ḽa Egipita,

ndó ni vhofholola vhupulini.

Ndo ruma Mushe uri a ni endedze,

e na Aroni na Miriamu.

₅Vhathu vhanga,

elelwani vhunwa he Balaka khosi ya Muaba a ni lukela,

ni elelwe na phindulo ya Biliamu ṅwana wa Bioro.

Elelwani zwo iteaho lwendoni lwaṋu

ni tshi bva mushashani wa Shitimu

ni tshi ya Giligala,

uri ni kone u ḓivha mishumo mivhuya ya Yahavee.”

₆Ndi ḓo ḓa maṱoni a Muṋe washu ndo fara mini,

ndi tshi ḓa u luvha Mudzimu wa ṱaḓulu?

Ndi ḓo ḓa ndo fara zwiṱhavhelo zwi fhiswaho

zwa ṋamana dza ṅwaha muthihi?

₇Muṋe washu a nga takadzwa nga thutha dza tshigidi,

a nga takadzwa nga milambo ya zwigidi zwa fumi

i no ela mapfura naa?

Ndi ḓo ṋekedza tanzhe ḽanga ḽa lifha vhutshinyi hanga,

nda lifha vhuvhi hanga nga ṅwana we nda beba naa?

₈Iwe muthu, Muṋe washu o u sumbedza zwi re zwivhuya.

Ndi zwifhio zwine Muṋe washu a ṱoḓa

u tshi zwi ita?

U ṱoḓa u tshi ita zwi re zwone,

u fulufhedzee u tshi tou zwi funa,

u konane na Mudzimu u tshi ḓisedza.

₉Ipfani ipfi ḽa Muṋe washu a tshi vhidzelela muḓi!

A na vhuṱali u ḽi dzhiela nzhele.

Ipfani ṱhamu ye na vhetshelwa!

Zwo dzula zwo vhoxwa!

₁₀U ri, “Ipfani inwi vha no kundisa vhathu

u wana zwo vha fanelaho,

na inwi vha no ṱolou ita zwa vhuvemu.

Nṋa ndi nga konḓelela muthu a tshi khokha lupfumo nḓuni yawe

nga u ela nga mielo i si yone,

mielo ya vhufhura ine nda i vhenga naa?

₁₁A no kala nga tshikalo tshi si tshone

na matombo maṱuku a u kala ndi nga ri ho ngo khakha naa?

₁₂Hufha vhapfumi vha muḓi vhe vhalevhi;

vhadzulapo vhawo hufha vha tshi amba mazwifhi

na vhufhura fhedzi.

₁₃Ndi zwine nda vho thoma u u rwa,

nda tou u phusukanyela vhutshinyi hau.

₁₄U ḓo ḽa wa si fure;

u ḓo ṱwa na nḓala;

u ḓo dzhenisa musadzi nḓuni wa si mu bebise ṅwana;

na vhenevho vhane wa nga vha beba ndi ḓo vha kumedza

vha fhedzwa nga pfumo.

₁₅U ḓo gobela wa si kaṋe tshithu;

u ḓo pwaṱula nyolivi wa si tsha ḓola;

u ḓo suka nḓirivhe wa si nwe waini.

₁₆Midzimu ya zwifanyiso ya Omuri i ḓo pwashekanywa,

khathihi na zwo itwaho nga Ahaba.

Iwe wo kanda vhuṱalani havho,

ndi zwine nda ḓo ita uri vhathu vha tshi vhona zwe nda u ita

vha tshenuwe;

vhoṱhe vha dzulaho muḓini vha ḓo nzhonzhowedzwa.

No shonisa vhathu vhanga,

ndi zwone, ni ḓo shona-vho.”