YESAYA 43

“U songo ofha, ndi ḓo u lamukisa;

ndo u vhidza nga dzina, u wanga!

₂U tshi fhira vhukati ha maḓi manzhi ndi ḓo vha ndi na iwe;

u tshi wela milambo i nga si u kumbe;

u tshi fhira vhukati ha mulilo u nga si swe;

khavhu dza mulilo dzi nga si u fhise.

₃Hufha ndi Yahavee Mudzimu wau,

Mukhethwa wa Israele Mutshidzi wau.

Ndi ḓo kumedza Egipita ḽa vha tshipfumelo,

iwe wa vhofhololwa;

vhuimoni hau hu ḓo dzhena Kushu na Seba, iwe wa bva.

₄Ndi ḓo kumedza dzitshakha uri iwe u tshidzwe,

ngauri ndi tshi u sedza

ndi vhona u wa mutengo muhulu,

ndi a u hulisa, ndi a u funa.

₅“U songo ofha, ndi na iwe;

ndi ḓo kuvhanganya vhana vhau vhubvaḓuvha na vhukovhela

nda vha vhuisa hayani.

₆Ndi ḓo vhudza devhula nda ri,

‘Vha litshe vha ṱuwe!’

nda vhudza tshipembe nda ri,

‘Vha tshi ṱuwa u songo vha dzivhisa!

Litsha vhana vhanga vha humele hayani

vha tshi bva mashangoni a kule,

na vhananyana vhanga vha tshi bva migumoni ya ḽifhasi –

₇vhoṱhe vhane vha vhidzwa nga dzina ḽanga,

vhe nda vha sika, nda vha vhumba,

ndi tshi itela uri vha nkhulise!’ ”

“Ḓisani vhathu vhanga khoroni;

vha na maṱo, hone vho pofula;

vha na nḓevhe, hone vho dzinga!

₉Tshakha dzoṱhe nga dzi kuvhangane,

vhathu vhoṱhe vha ḓe tsengoni.

Ndi ufhio wa midzimu yavho we a dzula o amba

zwine zwa khou itea zwino,

kana we a dzula o bvumba zwithu zwa bvelela?

Midzimu heyo nga i ḓe na ṱhanzi dzayo

u sumba uri i na ngoho,

uri vhaṅwe vha zwi pfe vha tende.”

“Dzanga ṱhanzi ndi inwi Vhaisraele,

inwi vhalanda vhanga vhe nda vha nanga

uri ni nnḓivhe, ni mpfulufhele,

ni ṱalukanye uri Mudzimu ndi Nṋe ndi ndoṱhe;

a hu na muṅwe mudzimu we a vhumbwa

Nṋe ndi sa athu vha hone;

a hu tsha ḓo dovha ha vha na muṅwe.

₁₁“Ndi Nṋe Yahavee ndi ndoṱhe,

a hu na muṅwe mutshidzi arali e si Nṋe.

₁₂Ndi Nṋe we nda dzula ndo amba uri ndi ḓo ni tshidza,

nda ḓa nda zwi ita;

a hu na mudzimu usili we a vhuya a zwi ita hezwo –

inwi ni ṱhanzi dzanga;

Mudzimu ndi Nṋe,

₁₃ndi ḓo ḓi dzula ndi ane nda vha Ene.

A hu na ane a nga ponyokisa muthu tshanḓani tshanga;

a hu na ane a nga itulula zwe nda ita.”

“Ndi ḓo rambela Babele mmbi nda ni tshidza,

nda ita uri Vhakhaladia vhoṱhe vha shavhele swikepeni

zwine vha zwi ṱongisa.

₁₅Ndi Nṋe Yahavee,

Mudzimu waṋu mukhethwa,

Khosi yaṋu, Musiki wa Israele.”

₁₆Kale-kale o phula nḓila i buḓekanyaho lwanzhe,

gondo ḽa maḓini mahulu.

₁₇O kokodza mmbi ya maanḓa ya Vhaegipita,

na gariki dza nndwa na dzibere,

a vha rambaladza henefho vha si tsha vuwa,

a vha vhudzula a vha dzima unga tshitaitai!

₁₈Hone zwino u ri,

“Ni songo tsha elelwa zwa kale;

zwe zwa itwa misi iḽa ni songo tsha zwi humbula.

₁₉Vhonani,

zwino ndi khou ita zwiswa;

zwo no ḓi itea, a ni zwi vhoni?

Ndi khou phula nḓila sogani,

phangani ha ela milambo.

₂₀Na phukha dza ḓaka,

phunguhwe na mphwe,

dzi ḓo nkhulisa,

ngauri ndi phula maḓi sogani,

milambo ya ela phangani,

uri vhathu vhanga vhe nda vha nanga

vha dzimule ḓora.

₂₁Ndi lushaka lwe nda ḓivhumbela lwone;

nyimbo dzavho dzi ḓo ḓivhadza zwe nda ita.”

“Iwe Jakopo, u tshi rabela wo vha u sa khou rabela Nṋe;

iwe Israele, u tshi ḓinetisa wo vha u sa khou ḓinetisela Nṋe;

₂₃u tshi ṋekedza zwiṱhavhelo zwa dzinngu dzo fhiswaho,

ho vha hu si u hulisa Nṋe;

u tshi ṋekedza nduvho,

wa dubisa zwioro u tshi tou kakarika,

a si Nṋe ndo u lemedzaho;

₂₄u tshi renga zwinukheleli zwa mutengo muhulu,

wa ṋekedza mapfura a zwiṱhavhelo,

ho vha hu si u fusha Nṋe,

tshau wo tou nndemedza nga vhutshinyi hau,

wa nndina nga zwivhi zwau.

₂₅Ndi Nṋe ane nda ṱolou u hangwela

u tshi ntshandukela,

nda si tsha elelwa vhutshinyi hau,

ndi tshi itela zwine nda vha zwone.

₂₆“Hwelela mulandu!

Nga ri ye tsengoni!

Ḓisengele u sumbedze uri a wo ngo khakha!

₂₇Hufha na makhulukuku wau wa u thoma o tshinya;

na vhaimeleli vhau vho ntshandukela;

₂₈ndi zwe nda nyadzisa vhotshifhe vha nnḓu khethwa,

Jakopo nda mu ḽisa nga pfumo,

Israele nda mu nyadzisa.”