YESAYA 42

“Muḓinḓa wanga ngoyu;

ndi a mu tika,

ndo mu nanga,

ndi a mu takalela.

Ndo mu ḓadza Muya wanga;

u ḓo funza dzitshakha mulayo wanga.

₂Ha nga ṱavhi mukosi,

ha nga takusi ipfi,

ipfi ḽawe a ḽi nga pfali magondoni;

₃luṱanga lwo piḓeaho ha nga lu vunḓi,

luvhone lu no khou taidza ha nga lu dzimi;

u ḓo ḓivhadza zwone-zwone zwine nda zwi funa.

₄Ha nga fulufhuwi,

ha nga kulei nungo;

u ḓo tea mulayo wanga fhano fhasi;

mashango a kule o lindela pfunzo yawe.”

₅Mudzimu Muṋe washu

we a sika lutombo a lu ṱharamudza,

a adza shango na zwoṱhe zwi re khaḽo,

vhathu vhaḽo a vha ṋea mufemo,

vha tshimbilaho khaḽo a vha ṋea vhutshilo,

₆u ri, “Ndi Nṋe Yahavee,

a thi pfuki mulanga wanga,

ndi zwe nda u vhidza;

ndi ḓo u fara nga tshanḓa,

nda u londola,

nda vhofha mulanga na vhathu vhanga

nga iwe,

nda u ita tshedza tsha dzitshakha,

₇wa swingulusa maṱo o swingaho,

wa vhofholola vho farwaho,

vho dzulaho swiswini wa vha bvisa dzhele.

₈“Ndi pfi Yahavee,

ndi ḽone dzina ḽanga!

A thi kovhekani vhugala hanga na muṅwe mudzimu,

thendo yanga a thi i kovhekani na zwifanyiso.

₉Zwe nda dzula ndo amba zwo itea,

zwino ndi ḓo ni vhudza zwithu zwiswa

na musi zwi sa athu bvelela.”

₁₀Imbelani Muṋe washu luimbo luswa,

shango nga he ḽa guma nga ḽi mu rende nga nyimbo;

inwi ni talaho lwanzheni,

na zwoṱhe zwi re khalwo,

na mashango a kule-kule,

na vha dzulaho khao,

mu rendeni!

₁₁Nga a rendwe nga phanga na miḓi yayo,

na nga vhathu vha Kedara!

Vha dzulaho muḓini wa Sela nga vha fhululedze,

nga vha ṱavhe mukosi vhe miṱumbani ya dzithavha!

₁₂Nga vha rende vhugala ha Muṋe washu,

vha ḓivhadze thendo yawe mashangoni a kule!

₁₃Muṋe washu u khou bva pfumo

unga munna wa maanḓa;

mbiti dzawe dzo vuwa unga dza muhali;

u ṱavha mukosi wa nndwa,

maswina u a sumbedza maanḓa awe!

₁₄Mudzimu u ri,

“Ndi kale ndo fhumula ndó tsika mbiti dzanga,

nda si fhindule vhathu vhanga,

hone zwino a thi tsha ḓo konḓelela,

ndi ḓo nga musadzi a tshi ṱoḓou vhofholowa –

ndi ḓo ṱavha mukosi, nda gomela,

nda fhihamelwa.

₁₅Ndi ḓo omisa dzithavha na mivhundu,

hatsi na miri zwa puta;

ndi ḓo xisa milambo,

maisha a oma;

₁₆ndi ḓo endedza vhathu vhanga vha mabofu

nḓilani ine vha sa i ḓivhe nda vha tshimbidza gondoni

ḽe vha si ḽi ḓowele,

nda vha shandukisela swiswi ḽa vha tshedza,

hu sa tshimbilei nda ita uri hu tshimbilee.

Hezwo ndi ḓo zwi ita,

a thi nga litshi u zwi ita.

₁₇Hone vhoṱhe vhane vha fulufhela zwitungulo,

vhane vha tshi amba zwifanyiso vha ri, ‘Ni midzimu yashu,’

vha ḓo huma vho shona.”

“Thetshelesani,

inwi madzinganḓevhe!

Inwi mabofu, sedzani ni vhone!

₁₉Ndi nnyi o pofulaho

unga mulanda wanga Israele?

Ndi nnyi o dzingaho unga muḓinḓa wanga

we nda mu ruma?

Ndi nnyi o pofulaho unga onoyo we a rwelwa vhutshinyi hawe?

Ndi nnyi o pofulaho

unga mulanda wa Yahavee?

₂₀No vhona zwithu zwinzhi na si zwi londe;

no pfa mafhungo na si a dzhiele nzhele.”

₂₁Naho zwo ralo Muṋe washu u funa u tshidza,

ndi zwe a ṋea vhathu vhawe pfunzo khulu i huliseaho.

₂₂Hone zwino vhathu vhawe vho ṱangulwa

vha sala fhedzi;

vho khakhedzwa mapakoni vhoṱhe,

vho pangiwa dzhele,

vho ṱangulwa ha si vhe na a vha lamukisaho,

vho dzhielwa ha si vhe na a no ri,

“Humisani!”

₂₃Hone ndi nnyi waṋu a no ḓo zwi thetshelesa hezwi,

a zwi dzhiela nzhele a zwi elelwa misi i ḓaho?

₂₄We a kumedza Jakopo vhaṱanguli ndi nnyi?

Ndi nnyi we a ita uri Israele a sale a si na tshithu?

A si Muṋe washu Ene muṋe we ra mu khakhela naa?

A ro ngo tshimbila nḓilani yawe,

a ro ngo thetshelesa pfunzo.

₂₅Ndi zwe a ita

uri ri pfe u fuḓa ha mbiti dzawe na u vhavha ha nndwa.

Mbiti dzawe dzo ri fhisa thungo dzoṱhe unga mulilo,

hone ra si zwi ṱalukanye;

dzo ri fhisa re lore,

hone ra si zwi londe.