MISHUMO 4

₁Pitrosi na Johanisi vha tshi kha ḓi amba na vhathu, vha ḓelwa nga vhotshifhe na mulangi wa vhalindathembele, na Vhasadukei. ₂Vhenevha vho vha vho dinalea nge avho vhaapostola vha vha vha tshi khou funza vhathu uri Yesu o vuswa vhafuni, ha vha u funza uri vhafu vha a vuwa. ₃Ndi hone vha tshi vha fara vha vha hoṋela dzhele u swika nga ḽa matshelo ngauri ḽo vha ḽi tshi vho kovhela. ₄Naho zwo ralo, vhanzhi vhe vha pfa iyo pfunzo vha i tenda; tshivhalo tsha vhanna tsho vha tshi tshi nga vha 5 000.

₅Nga matshelo vharangaphanḓa vha Majuda na vhahulwane vha lushaka na vhaḓivhi vha Mulayo vha kuvhangana Jerusalema ₆vhe na tshifhe muhulu Anasi na Khayafasi na Johanisi na Alekzannda na vhaṅwe-vho vha miṱa ya vhotshifhe vhahulu. ₇Vha imisa vhaapostola phanḓa havho vha vha vhudzisa vha ri, “Nṋa ndi nnyi we a ni ruma a ni fha maanḓa a u ita izwi zwithu!” ₈Pitrosi a vha fhindula o ḓala Muya Mukhethwa a ri, “Inwi vharangaphanḓa vha lushaka na inwi vhahulwane: ₉Arali ṋamusi ni tshi khou ri sengisela u tonda uyu munna wa tshihole na uri o fhodzwa hani, ₁₀zwi ḓivheni-ha inwi na vhathu vhoṱhe vha Israele uri hoyu munna a tshi ima phanḓa haṋu ó fhola tshoṱhe, zwo itwa nga maanḓa a dzina ḽa Yesu Khristo wa Nazaretha, onouḽa we inwi na mu vhamba kha tshifhambano, Mudzimu Ene a mu vusa vhafuni. ₁₁Onoyo Yesu ndi Ene-ha ane Maṅwalo a tshi mu amba a ri,

₁₂“A hu na muṅwe ane a nga ri tshidza; a hu na ḽiṅwe dzina fhasi ha lutombo ḽe Mudzimu a ri ri tshidzwe ngaḽo.”

₁₃Vha tshi vhona Pitrosi na Johanisi vha tshi tou amba vha sa ofhi, vha kanuka, zwihuluhulu vha tshi vho pfa uri ndi vhathu zwavho vha songo funzwaho. Ndi hone vha tshi vho zwi vhona uri ndi vhathu vhe vha vha vha tshi tshimbila na Yesu. ₁₄Vha ro kundwa tshine vha nga amba, ngauri uḽa muthu o fhodzwaho o vha o ḓi ima na Pitrosi na Johanisi henefho. ₁₅Ndi hone vha tshi ri vha vhe vho bvela nnḓa, vhone vha sala vha tshi langana nga tshavho. ₁₆Vha vhudzisana vha ri, “Nṋa avha vhathu ri nga tou vha ita hani? Muṅwe na muṅwe fhano Jerusalema u ḓivha zwavhuḓi uri haya maḓembe mahulu o itwa ngavho; na riṋe ri nga si kone u hanedza. ₁₇Hone u itela uri bvumo ḽa hezwi zwithu ḽi si anḓadzee ḽi tshi ya, kha ri vha dzivhise u dovha u amba na muthu nga iḽi dzina.” ₁₈Ndi hone vha tshi ri vha dzhene, vha vha vhudza uri vha songo tsha vhuya vha dovha vha amba kana vha funza nga dzina ḽa Yesu. ₁₉Pitrosi na Johanisi vhone vha fhindula vha ri, “Ambani! Tshi re tshone phanḓa ha Mudzimu ndi tshifhio? Ndi u pfa inwi kana ndi u pfa Mudzimu? ₂₀A vha riṋe a ri koni u dzumba zwe ra zwi vhona na zwe ra zwi pfa.” ₂₁Ndi hone khoro i tshi vha kaidza yo khwaṱhisa uri vha si dovhe; ye u ralo ya vha vhofholola. A yo ngo wana nḓila ya u vha laṱisa, ngauri vhathu vhoṱhe vho vha vha tshi renda Mudzimu nga u vhona zwo iteaho. ₂₂Nahone muthu uyo we a vha o fhodzwa nga nḓila iyo i kanukisaho o vha o no ḓi fhira miṅwaha ya 40.

₂₃Pitrosi na Johanisi vha ri u vhofhololwa vha mbo ḓi vhuelela kha vhaḽa vhaṅwe ngavho, vha vha vhudza zwe vhotshifhe vhahulwane na vhahulwane vha lushaka vha amba. ₂₄Vha tshi pfa zwenezwo vha rabela Mudzimu vhoṱhe vha ri, “Iwe Muṋe wa zwoṱhe wo sikaho ḽiṱaḓulu na ḽifhasi na lwanzhe na zwoṱhe zwi re khazwo! ₂₅Wo amba nga Muya Mukhethwa nga mulomo wa makhulukuku washu Dafita muḓinḓa wau, zwiḽa u tshi ri,

₂₇“Nangoho khezwi: Herude na Pontio Pilato vho kuvhangana fhano Jerusalema na vhannḓa na mavhuthu a Israele uri vha lwe na Yesu Muḓinḓa wau mukhethwa, Ene Muḓodzwa wau. ₂₈Vha tshi kuvhangana vha rali ndi u khunyeledza zwe wa dzula wo dzudzanya nga u funa hau. ₂₉Zwino-ha Muṋe washu, u khou zwi vhona vha tshi ri halifhela; ri ṋee mbilutshinna riṋe vhaḓinḓa vhau ri kone u amba ipfi ḽau; ₃₀imisa tshanḓa tshau hu fhodzwe vhathu; ita uri hu vhe na maḓembe na mishumo i kanukisaho nga maanḓa a Yesu Muḓinḓa wau mukhethwa.”

₃₁Vha tshi fhedza u rabela, fhethu he vha vha vho kuvhangana hone ha dzinginyea, vhoṱhe vha ḓala Muya Mukhethwa vha vho amba ipfi ḽa Mudzimu vha sa ofhi tshithu.

₃₂Tshivhidzo tsha vhatendi tsho vha tshi tshi dzula mbilu i nthihi na muhumbulo u muthihi, hu si na uri tshanga ndi tshanga, tsha muṅwe ndi tsha muṅwe, zwoṱhe zwi zwa vhoṱhe. ₃₃Vhaapostola vha ṱanzilela vhe na maanḓa mahulu uri Yesu Muṋe washu o vuwa, huno vhoṱhe Mudzimu a vha anzela mashudu. ₃₄Ho vha hu si na na muthihi khavho ane a shaya, ngauri vhe vha vha vhe na masimu na dzinnḓu vho vha vha tshi zwi rengisa ₃₅vha ṋea vhaapostola tshelede yazwo, ya konou kovhelwa muṅwe na muṅwe nga hune a shaya.

₃₆Zwino-ha ho vha hu na muṅwe munna wa Mulivi o bebelwaho Kipirosi we a vha a tshi pfi Josefa; vhaapostola vhone vho vha vho mu ira ḽa Barnabasi, ḽine ḽa amba uri “Mukhuthadzi”. ₃₇Onoyo a rengisa tsimu yawe, tshelede a ḓa nayo a i ṋea vhaapostola.