MISHUMO 3

₁Ḽiṅwe ḓuvha Pitrosi na Johanisi vha ya thembeleni nga tshifhinga tsha thabelo, nga awara ya vhuraru ya masiari. ₂Henefho kha muṅwe muṋango u no pfi Wonakaho vha wana muṅwe munna o bebwaho e tshihole, a tshi ḓi hwalwa ḓuvha ḽiṅwe na ḽiṅwe a dzudzwa henefho uri a humbele tshelede kha vhathu vha ḓaho thembeleni. ₃A tshi vhona Pitrosi na Johanisi vha tshi dzhena, a vha humbela tshifhiwa, ₄vha mu sedza, Pitrosi a amba nae a ri, “Lavhelesani ngeno.” ₅Ene a mbo ḓi lavhelesa a tshi ri vha ṱoḓa u mu fha tshithu. ₆Pitrosi a ri, “Ya nga vha i tshelede nṋe a thi na; ndi ḓo ni fha tshine nda vha natsho: Ndi ri nga dzina ḽa Yesu Khristo wa Nazaretha: takuwani zwino ni tshimbile!” ₇A konou mu fara kha tshanḓa tshauḽa a mu takusa. Kathihi fhedzi ṋayo dzawe na zwiendanungo zwa mbo ḓi khwaṱha, ₈a thamuwa a ima a konou tshimbila-tshimbila! Ndi hone a tshi vho dzhena navho thembeleni a tshi enda a tshi pembela a tshi renda Mudzimu. ₉Vhathu vhoṱhe vha mu vhona a tshi tshimbila a tshi renda Mudzimu. ₁₀Vha tshi vhona uri ndi uḽa muhumbeli we a vha o dzula fhaḽa thembeleni muṋangoni u no pfi Wonakaho, vha kanuka vho akhamala vha tshi vhona zwo iteaho khae.

₁₁Uyo munna a si tsha tenda u fhambana na Pitrosi na Johanisi, henefhaḽa Guḓani ḽa Solomoni, vhathu vhoṱhe vha akhamala vha gidimela khavho. ₁₂Pitrosi a tshi vha vhona a amba navho a ri, “Vhaisraele vha hashu, ni kanukiswa nga mini? Khezwi ni tshi lavhelesa riṋe ha vho nga ndi nga maanḓa ashu kana vhurabeli hashu uyu muthu a tshi vho kona u tshimbila? ₁₃Mudzimu wa Abrahamu na Isaka na Jakopo, Ene Mudzimu wa vhomakhulukuku washu, o hulisa Yesu muḓinḓa wawe. Inwi no mu hwelela na vhuya na mu landula khoroni ya Pilato, naho Pilato o vha o no ḓiimisela u mu vhofholola. ₁₄No landula Ene Mukhethwa muvhuya, na ri ndi khwiṋe Pilato a tshi ni vhofhololela zwaṋu uḽa wa phondi, ₁₅na vhulaha Ene a ni isaho vhutshiloni. Mudzimu Ene o mu vusa vhafuni, nazwino riṋe ri dziṱhanzi dzazwo. ₁₆Ndi maanḓa a dzina ḽawe ḽe ra ḽi fulufhela o khwaṱhisaho miraḓo ya hoyu munna wa tshihole ane noṱhe na mu ḓivha; u fulufhela Yesu ndi hone ho fhodzaho uyu muthu ane noṱhe na khou mu vhona o takala.

₁₇“Zwino-ha vha hashu, nṋe ndi a zwi ḓivha uri inwi na vharangaphanḓa vhaṋu zwe na ita ho vha hu u sa ḓivha. ₁₈Hezwi zwi tshi itea ho vha hu hone Mudzimu a tshi khunyeledza zwe a dzula o amba nga vhaporofita vhawe vhoṱhe zwauri Mesia a bvaho ha Ene tshawe ndi u fa. ₁₉Laṱani-ha vhuvhi haṋu ni rembulutshele ha Mudzimu uri a thuthe vhutshinyi haṋu, ₂₀Muṋe washu a ni awedze, a ni rumele Yesu a re Ene Mesia we a dzula o mu nanga. ₂₁U ḓo dzula ṱaḓulu u swika tshifhinga tshine zwoṱhe zwa fanela u itwa zwiswa, nga he Mudzimu a dzula o amba nga vhaporofita vhawe tsha kale na kale. ₂₂Na Mushe o ri, ‘Mudzimu Muṋe waṋu u ḓo ni rumela muporofita ane a ḓo vha wa lushaka lwa haṋu, zwa nga a tshi ruma nṋe. Ni fanela u thetshelesa zwoṱhe zwine a ni vhudza. ₂₃Onoyo ane a sa ḓo thetshelesa zwine uyo muporofita a amba u ḓo bviswa kha lushaka lwa Mudzimu a lozwiwa.’ ₂₄Zwino-ha na vhaporofita vhoṱhe vhe vha vhuya vha vha hone, u bva kha Samuele, vho ḓi ḓivhadza-vho zwa tshino tshifhinga. ₂₅Inwi ni vhaḓuhulu vha vhaporofita, ni maḽaifa a mulanga we Mudzimu a vhofha na vhomakhulukuku waṋu musi a tshi amba na Abrahamu a tshi ri, ‘Tshakha dzoṱhe dza ḽifhasi dzi ḓo wana mashudu nga muḓuhulu wau.’ ₂₆Zwino-ha Mudzimu o thoma nga u rumela Muḓinḓa wawe ha inwi, uri a ni shudufhadze nga u ita uri muṅwe na muṅwe waṋu a furalele vhuvhi hawe.”