2 VHATHESALONIKA 3

₁Tsho salaho vha hashu, ri ri ni ri rabelele uri ipfi ḽa Muṋe washu ḽi ḓi ya phanḓa nga u ṱavhanya ḽa huliswa sa zwe zwa itea henengeo, ₂na uri a ri ponyokise zwanḓani zwa vhathu vhavhi vha sa ḓivhalei; ngauri a si vhoṱhe vha re na lutendo. ₃Hone Muṋe washu Ene u a fulufhedzea; u ḓo ni khwaṱhisa a ni tsireledza kha Muvhi. ₄Vhunga roṱhe ri vha Muṋe washu ri pfa ri sa timatimi uri zwine ra ni laya ni khou zwi ita nahone ni ḓo ḓi zwi ita.

₅Ngavhe Muṋe washu a tshi sumba mbilu dzaṋu kha lufuno lwa Mudzimu, na kha u konḓelela ha Khristo.

₆Zwino-ha vha hashu, ndi ni laya nga dzina ḽa Muṋe washu Yesu Khristo ndi ri: arali hu na mutendi henefho ane a bvafha u shuma, a sa tevhedzi ndaela ye nda ni laya, onoyo ni songo konana nae. ₇Hufha inwi vhaṋe ni tshi zwi ḓivha uri ni fanela u kanda vhuṱalani hashu. Zwiḽa ri tshee ngeo kani-ha ro vha ri tshi bvafha u shuma? ₈Ro vhuya ra ḽa zwiḽiwa zwa muthu nga fhedzi naa? A ro ngo shuma ra zwi pfa vhusiku na masiari ri tshi ḓipalela uri ri si lemedze muthu? ₉A si uri zwo vha zwi songo ri fanela u vhavhalelwa nga inwi lini, aiwa, ho vha hu u ṱoḓa u ni ṋea tsumbo ya uri ni ḓo kona u kanda vhuṱalani hashu. ₁₀A thi ri na zwiḽa ri tshee na inwi ngeo ro ḓi ni laya ra ri: ane a bvafha u shuma, izwo na u ḽa a songo ḽa?

₁₁Ri tshi ralo ndi nge ra pfa upfi hu na vhaṅwe vhathu henengeo vhane vha nembeledza miraḓo, vha si shume zwo vha fanelaho, tshavho ndi u sokou dzhenelela kha mafhungo a vhaṅwe. ₁₂Vho raloho ri a vha laya na u vha ṱuṱuwedza nga dzina ḽa Muṋe washu Yesu Khristo ri ri: kha vha tokomelwe vha litshe u dzhenelela kha zwa vhaṅwe vha ḽe tsha biko ḽavho.

₁₃Vha hashu, a vha inwi, ni fungelele u ita zwi re zwone ni sa neti. ₁₄Arali hu na muṅwe henengeo a sa funi u thetshelesa zwe ra ṅwala luṅwaloni ulu, wa u ralo mu khetheleni thungo; ni songo tsha konana nae, ndi hone a tshi ḓo shona. ₁₅Hone naho zwo ralo ni songo mu ita swina, ni tou mu kaidza sa muṅwe nga inwi.

₁₆Ngavhe Muṋe washu Ene muṋe Ṋemulalo a tshi ni ṋea mulalo misi yoṱhe hoṱhe-hoṱhe! Muṋe washu a vhe na inwi noṱhe!

₁₇Hafha ndi nṋe Paulo a ṅwalaho nga tsha vhukoma zwino. Maṅwalo anga oṱhe ndi ḓi a swaya nga u rali uri a vhonale uri a bva kha nṋe. Na kuṅwalele kwanga khoku: ndi ri ni vhe hone.

₁₈Ngavhe Muṋe washu Yesu Khristo a tshi ni itela vhuthu noṱhe.