2 VHATHESALONIKA 2

₁Zwi tshi ḓa kha a u vhuya ha Muṋe washu Yesu Khristo musi ri tshi ḓo kuvhanganyelwa khae, ndi a ni humbela vha hashu ndi ri: ₂ni songo sokou ṱavhanya u ṱanganywa ṱhoho kana u tshenuwa nga zwine ha pfi ḓuvha ḽa Muṋe washu ḽo swika, naho hu tshi pfi ndi vhuporofita kana ndi u bvumba kana ndi luṅwalo lune lwa pfi lu bva kha riṋe. ₃Ni songo vhuya na tenda u fhurwa nga muthu na nga tshini. Hu fanela u thoma u ḓa tshifhinga tshine vhathu vha ḓo shandukela Mudzimu ha dzumbuluwa uḽa muvhi a sa ofhi Mudzimu ane tshawe ya ḓo vha hele. ₄U ḓo ḓihudza a hanedza tshiṅwe na tshiṅwe tshi no pfi mudzimu kana tshine tsha rerelelwa, a vhuya a tou dzula nḓuni ya Mudzimu a ḓiita mudzimu.

₅Kani no hangwa? Hezwo zwoṱhe ndo ni vhudza ndi tshi kha ḓi vha na inwi ngeo. ₆Hu na tshe tsha zwi dzivhisa hezwo uri zwi si dzumbuluwe; inwi vhaṋe ni a tshi ḓivha. Uyo muvhi u dzumbuluwa u ḓo dzumbuluwa nga tshifhinga tsho tiwaho. ₇Nazwino maanḓa o dzumbamaho a onoyo muvhi a vho vhonala. Hone hoyo ane a zwi thivhela u fanela u thoma a sudzuluswa nḓilani yazwo, ₈ndi hone uyo muvhi a tshi ḓo dzumbuluwa. Hone musi Muṋe washu Yesu a tshi vhuya, u ḓo mu vhulaha nga mufemo u bvaho mulomoni wawe a mu lozwa nga lupenyo lwawe. ₉Uyo muvhi a tshi ḓa u ḓo shuma nga maanḓa a Saṱhane a ita maḓembe na zwimangadzo zwa vhufhura, ₁₀vha re nḓilani ya u lovha a vha fhura nga vhufhura vhuvhi ha tshakha-tshakha. Vha ḓo lovha ngauri a vho ngo ṱanganedza ngoho vha i funa ya vha tshidza. ₁₁Ndi zwine Mudzimu a ḓi vha kumedza kha maanḓa a vhufhura uri vha tende mazwifhi. ₁₂Vhoṱhe vhe vha takalela vhuvhi vha si tende ngoho vha ḓo haṱulwa vha laṱwa nga u ralo.

₁₃Vha hashu, vhafunwa vha Muṋe washu, ri fanela u dzula ri tshi livhuha Mudzimu nga u vhona zwe a ni itela. O dzula o ni nanga tsha kale na kale uri ni tshidzwe nga u itwa vhakhethwa nga Muya Mukhethwa na u tenda ngoho, ₁₄a konou ni vhidza nga mafhungo maḓifha e ra ni ḓivhadza uri ni wane mukovhe kha vhugala ha Muṋe washu Yesu Khristo. ₁₅Zwino-ha vha hashu, imani no khwaṱha no nambatela dziḽa ndaela dze ra ni laya nga mulomo na nga u ni ṅwalela.

₁₆Muṋe washu Yesu Khristo Ene muṋe na Mudzimu Khotsi ashu, Ene we a ri funa, a dzula a tshi ri khwaṱhisa nga vhuthu hawe, a ri ṋea na zwivhuya zwe ra ṱulutshela, ₁₇ngavhe Ene a tshi ni khuthadza a khwaṱhisa mbilu dzaṋu kha mishumo yoṱhe mivhuya ine na ita na kha maipfi ane na amba.