SIRAKA 40

₁Mongwe le mongwe o diretšwe mathata a mantsi; bana ba ga Atame ba sikara jokwe e e bokete go simologa ka letsatsi le ba tšwang ka lone mo popelong ya maabone go fitlhelela letsatsi le ba boelang ka lone mo go mmaabone botlhe.

₂Go tshaba letsatsi la loso ke gone go dirang gore ba nne ba sale ba akanya thata ba hutsafetse e bile dipelo tsa bone di tletse poifo.

₃Go simologa ka motho yo o ntseng mo setulong sa bogosi se se galalelang go ya kwa mothonyaneng wa batho yo o ntseng mo ditholeng le mo leroleng, ₄go simologa ka motho yo o apereng diaparo tse di bohibidu jo bo mokgona a rwele serwalo sa bogosi, go ya kwa mothong yo o ikaparetseng mmeto, gotlhe ke kgalefo le lefufa, pheretlhego le go tlhoka boikhutso, poifo ya loso, go gaisana, go kgaratlha.

₅Le bosigo tota le fa motho a re o ikhutsitse mo bolaong jwa gagwe boroko bo a bo bo oketsa matšhwenyego a gagwe a moya.

₆Fa a tlhoma a re o latsa tlhogo fela fa fatshe go ikhutsa, o setse a tšhwenngwa ke dilo tse di boitshegang tse a di bonang mo borokong jwa gagwe, fela jaaka ekete o di bona motshegare tadi e amusa le jaaka motho yo o siileng kwa ntweng.

₇Ka nako e a namolwang ka yone o a thanya, a ba a gakgamadiwa ke go bona gore poifo ya gagwe e ne e dirwa ke mogopolo wa gagwe fela.

₈Mo dipobiweng tsotlhe, go simologa ka batho go ya kwa diphologolong le mo baleofing ga supa go feta, ₉go na le loso le polao le tlhabano le tšhaka, dipetso, leuba, pitlagano, leroborobo.

₁₀Dilo tse tsotlhe di ne tsa tlholelwa baikepi. Morwalela o kile wa tla ka ntlha ya bone.

₁₁Sengwe le sengwe se se tšwang mo lefatshing se boela mo lefatshing mme se se tšwang mo metsing se boela mo lewatleng.

₁₂Go duela motho gore a dire bosula le tshiamololo yotlhe ke dilo tse di tlaa fedisiwang, fela boikanyego bo tlaa nnela ruri.

₁₃Khumo ya badira-phoso e tlaa fela jaaka morwalela o a tle o kgale, e tlaa phatlakana jaaka modumo wa tladi mo puleng ya matshela-ka-nkgo o a tle o thwanye mme o nyelele.

₁₄Motho yo o huporololang diatla tsa gagwe, o a itumela, mme ba ba molato bone ba a nyelediwa.

₁₅Matlhogela a baikepi ga a na go mela dikala tse dintsi, medi e e leswe e kgatlhana le lefika le le thata fela.

₁₆Lotlhaka lo lo fa thoko ga letsha le mo lotshitshing lwa noka lo kumolwa pele ga bojang bongwe le bongwe.

₁₇Bopelontle bo tšhwana le tshingwana ya ditshegofatso, bopelo bo nnela ruri.

₁₈Botshelo bo natefelela motho yo o iphang le ene yo o dirang ka natla, fela motho yo o welang letlotlo o botoka go na le batho ba babedi ba.

₁₉Go nna le bana le go aga motse go dira gore motho a tume, fela go bona botlhale go botoka go na le dilo tse pedi tse. Go nna le dikgomo le ditshingwana tsa moretlwa go dira gore motho a itsege tota, fela mosadi yo o siameng o na le thuso go feta dilo tse.

₂₀Bojalwa le kopelo di itumedisa pelo, fela go rata botlhale go botoka go na le dilo tse pedi tse.

₂₁Moletso wa ditlhaka le harepa o oketsa monate wa pina; fela lentswe le le monate le botoka go na le moletso wa dilo tse.

₂₂Leitlho le eletsa go bona maatlametlo le bontle, fela botala jwa mabele a dikgakologo bo botoka go na le tse pedi tse.

₂₃Tsala ga e nke e tlhoka go kopana le e nngwe sentle, molekane le ene ga a nke a tlhoka go kopana le yo mongwe sentle, fela go kopana ga monna le mosadi go botoka go na le dikopano tse pedi tse.

₂₄Bana ba motho le batlatsi ba siame ka nako ya matshwenyego; fela bopelo bo namola go gaisa mefuta e mebedi e ya batho.

₂₅Gouta le selefera di tla go tsepamisa dinao, fela kgakololo e e siameng e na le thuso e kgolo go feta dilo tse pedi tse.

₂₆Madi le nonofo ke dilo tse di dirang motho pelokgale, fela go boifa Morena go botoka go na le dilo tse pedi tse. Fa motho a na le poifo ya Morena ga a tlhoke sepe, fa a na nayo ga a tlhoke tota go batla motlatsi yo o mo thusang.

₂₇Poifo ya Morena e tšhwana le tshingwana ya ditshegofatso, e apesa motho sengwe se se fetang kgalalelo ya mekgabo.

₂₈Ngwanaka, O se ka wa bo wa tshela ka go kopa ba bangwe, go botoka gore O šwe go na le gore O nne le go kopa.

₂₉Botshelo jwa motho yo o tlholang a lebile tafole ya motho yo mongwe ga bo kake jwa bo jwa twe ke botshelo. O tlatsa kgokgotsho ya gagwe lešwe ka dijo tsa batho ba bangwe; motho yo o rutegileng sentle le yo o godisitšweng sentle ga a kake a bo a dira selo se se ntseng jalo.

₃₀Molomo wa motho yo o se nang ditlhong o natefelelwa ke go kopa; fela kgabagare go a tle go tshube molelo mo mpeng ya gagwe.