SIRAKA 39

₁Motho yo o neelang moya wa gagwe go akanya ka ga Molao wa Mogodimodimo ke wa mokgwa o mongwe. O batla botlhale jwa bagologolo botlhe. O dirisa nako ya gagwe mo go akanyeng dithuto tsa boprofeta.

₂O ipolokela dipuo tsa batho ba ba itsegeng, O itse sentle dithuto tse dintle tsa dipolelo tse di tšhwantshang.

₃O batla go bona tharabololo e e fitlhegileng ya diane, o fata ka tlhaloganyo ya gagwe ditlhaloso tsa dipolelo tse di tšhwantshang.

₄O direla magosana, o bonwa a na le babusi, o etela mafatshe a sele, O itse bomolemo jwa motho le bosula jwa gagwe.

₅E a re go sa le phakela a ikatametse Morena yo o mo dirileng ka pelo yotlhe, a kope a le fa pele ga Mogodimodimo, a rapele mme a kope boitšhwarelo jwa dibe tsa gagwe.

₆Fa Morena yo mogolo a rata o tladiwa moya wa go tlhaloganya, a tsholole mafoko a botlhale, a leboge Morena ka thapelo.

₇Maikaelelo a gagwe a tlaa tlhamalala, kitso ya gagwe e gole, o tlaa akanya mafeta-tlhaloganyo a a fitlhegileng a Morena.

₈O tlaa supa thuto e a e amogetseng, a ikgantsha ka molao wa kgolagano ya Morena.

₉Batho ba le bantsi ba tlaa boka tlhaloganyo ya gagwe, mme ga e kitla e bo e lebalwa; leina la gagwe le tlaa tshela mo dikokomaneng tsotlhe.

₁₀Ditšhaba di tlaa bua ka botlhale jwa gagwe, phuthego e mmoke.

₁₁Fa a ka tshela nako e telele, leina la gagwe le tlaa bakega go feta a mangwe a a sekete, mme le fa a ka šwa, o tlaa nna a itumela fela.

₁₂Ke batla go nna ke bolela dilo tse ke di akantseng, di tletse mo go nna jaaka ngwedi yo o tletseng.

₁₃Lo ntheetseng, lona bana ba ba siameng, mme lo thunye jaaka sethunya se se golelang fa thoko ga molatswana.

₁₄Lo nkgeng monate jaaka insense, lo thunye jaaka sethunya; monkgo o o monate wa lona o utlwale kgakala; lo opele pina ya leboko, lo bakela Morena ditiro tsotlhe tsa gagwe.

₁₅Bolelang bogolo jwa leina la gagwe. lo phatlalatse leboko la gagwe ka pina le harepa; mme lo tšhwanetse go opela maboko a gagwe jaana: ₁₆Kana ditiro tsa Morena di gakgamatsa jang tsotlhe! Sengwe le sengwe se a se laelang se dirwe ka pele kwa ntle ga tiego. Lo se ka lwa re “Se ke eng? Ka ntlha ya eng?”

₁₇Tsotlhe di tla ithutiwa ka nako e di e beetšweng. Fa a bua metsi a a ema, a bo a tlhatlagana, metsi a a bolokwa e le ene yo o buileng.

₁₈Fa a laela, sengwe le sengwe se a se ratang se a diragala ga go na ope yo o ka mo koafatsang fa a boloka.

₁₉O bona ditiro tsotlhe tsa sebopiwa sengwe le sengwe, ga go na sepe se se ka iphitlhang gore a se ka a se bona.

₂₀Go bona ga gagwe go tšwa bosasimologeng go ya bosakhutleng. mme ga go na sepe se se ka mo gakgamatsang.

₂₁O se ka wa nna wa re, “Se ke eng? Ke ka ntlha ya eng?” Dilo tsotlhe di bopetšwe ditiro tsa tsone.

₂₂Fela jaaka tshegofatso ya gagwe e khurumetsa lefatshe le le omeletseng jaaka noka, mme e le kolobetsa jaaka morwalela, ₂₃jalo kgalefo ke bošwa jo a bo fang ditšhaba, jaaka a kile a dira metsi a a itshiametseng letšwai.

₂₄Mekgwa ya gagwe e siametse basiami, mme mo baikeping e tletse mathata.

₂₅Dilo tse di molemo di sale di bopelwa basiami mo tshimologong, fela tse di bosula di bopetšwe baleofi.

₂₆Dilo tsa ntlha tse batho ba di tlhokang mo botshelong jwa bone ke metsi le molelo, tshipi le letšwai, bupe jwa korong, maši le dinotshe, matute a moretlwa, lookwane le diaparo.

₂₇Dilo tse tsotlhe di siametse batho ba ba siameng, fela di tlhanogela baleofi di sa ba siamela.

₂₈Diphefo dingwe di tlholetšwe go otlhaya; o dirile gore e nne thupa ya bogale jwa gagwe; ka letsatsi la katlholo di itelekela ka sekgatlha sa tsone. di kokobetsa bogale jwa yo o di dirileng.

₂₉Molelo le sefako, leuba le loso, dilo tse tsotlhe di tlholetšwe go otlhaya, ₃₀meno a diphologolo tsa naga, diphepheng, dinoga tsa dikake, le tšhaka e e busulosang, tse dilo di bopetšwe go bolaya baikepi.

₃₁Dilo tse tsotlhe di itumelela go utlwa ditaelo tsa gagwe. Fa a di batla di ipaakanyetse di le mo lefatsheng, mme fa a di laela ka nako ya tsone ga di kitla di gana go mo utlwa.

₃₂Ke gone ka moo ke neng ka ikaelela go tšwa tshimologong, ka akanya mme ka kwala ka re, ₃₃“Ditiro tsotlhe tsa Morena di siame. mme o tla aba sengwe le sengwe se se tlhokafalang ka nako e e tšhwanetseng.”

₃₄O se ka wa bo wa re, “Se, se mašwe go feta sele”, gonne sengwe le sengwe se tla bonala se na le thuso ka nako ya sone.

₃₅Jalo he, opelang jaanong, ka pelo ya lona yotlhe le ka lentšwe la lona lotlhe, lo bakeng leina la Morena!