DIPESALEME 99

₁Morena ke kgosi!

A merafe e rorome.

O ntse godimo ga boKerubime,

a lefatshe le tshikinyege.

₂Morena o mogolo mo Sione,

o okame merafe yotlhe.

₃A ba bake leina la gago le legolo

la poitshego!

Ke le le boitshepo.

₄A ba bake le thata ya kgosi

e e ratang tshiamo.

Ke wena yo o tlhomamisitseng

tse di tshwanetseng;

tshiamo le molao o di dirisitse

mo Jakobe.

₅Godisang Morena,

Modimo wa rona,

lo ikobele fa pele ga sebeo

sa dinao tsa gagwe;

gonne ene o boitshepo.

₆Moše le Arone e ne e le bangwe

ba baperesiti ba gagwe,

Samuele e le wa ba ba bitsang

leina la gagwe.

Ba ne ba goela Moreneng,

mme a ba utlwa.

₇O ne a bua nabo,

a le mo pinagareng ya leru;

ba ne ba boloka ditshupo tsa gagwe

le molao o a neng a o ba neile.

₈Wena Morena, Modimo wa rona,

o ba utlwile;

o ne o le Modimo o o boitshwarelo

mo go bona,

mme o busolosa

ka fa ditirong tsa bona.

₉Godisang Morena,

Modimo wa rona,

lo ikobele fa pele ga thaba

ya gagwe e e boitshepo;

gonne Morena, Modimo wa rona,

o boitshepo.