DIPESALEME 106

₁Haleluya! Lebogang

Morena, gonne o molemo;

gonne bopelotlhomogi jwa gagwe

ke jo bo sa khutleng.

₂Ke mang yo o ka bolelang

ditiro tsa bonatla tsa Morena,

a utlwatsa poko ya gagwe yotlhe?

₃Go tlhogonolo

ba ba tlhokomelang molao,

ba ba dirang tse di siameng

ka metlha yotlhe.

₄Nkgopole, Morena,

ka o kgatlhwa ke morafe wa gago;

nketele ka thuso ya gago

₅gore ke jese matlho ka go leba

letlhogonolo

la baitlhaolelwi ba gago,

ke be ke thabele boitumelo

jwa setšhaba sa gago

le go belafala mmogo le boswa

jwa gago.

₆Re leofile mmogo le borraarona,

ra siamolola, ra ikepa.

₇Borraarona ba ne ba sa tlhokomele

dikgakgamatso tsa gago,

ba sa gopole bogolo

jwa bopelotlhomogi jwa gago,

mme ba rukhutlhegela

Mogodimodimo

kwa Lewatleng la Motlhaka.

₈Mme o ne a ba thusa

ka ntlha ya leina la gagwe

gore a supe bonatla jwa gagwe.

₉A kgalemela Lewatle la Motlhaka,

la ba la kgala;

a ba kgabagantsha merwalela

jaaka e kete ke sekaka.

₁₀A ba namolela mo seatleng

sa yo o ba tlhoileng,

a ba golola mo seatleng sa mmaba.

₁₁Metsi a khurumetsa

baganetsi ba bona,

ga se ka ga sala ope wa bona.

₁₂Ya baa gona ba dumelang

mafoko a gagwe,

ba opela pako ya gagwe.

₁₃Mme ba akofa ba lebala

ditiro tsa gagwe,

ba se ka ba letela taelo ya gagwe.

₁₄Ba tlala keletso mo sekakeng,

ba raela Modimo

kwa nageng e e senya.

₁₅Ke fa a ba naya

ka fa topong ya bona,

mme a tsenya tlhorego

mo meweng ya bona.

₁₆Ba ne ba fufegela Moše

mo bothibelelong le Arone,

moitshepi wa Morena.

₁₇Lefatshe la atlhama,

la metsa Dathane,

la khurumetsa setlhopha

sa ga Abirame.

₁₈Ga tuka molelo

mo lekokong la bona,

kgabo ya fisa baikepi.

₁₉Ba ne ba dira namane kwa Horebe,

ba obamela setshwantsho

se se bopilweng.

₂₀Ba ananya Kgalalelo ya bona

ka setshwantsho sa kgomo

e e fulang bojang.

₂₁Ba lebala Modimo,

mopholosi wa bona

o o dirileng dilo tse dikgolo

kwa Egepeto,

₂₂tse di gakgamatsang

kwa lefatsheng la ga Hame

le tse di boitshegang

fa Lewatleng la Motlhaka.

₂₃Ke fa o re, o tla ba nyeletsa.

Mme go ka bo go dirafetse jalo,

fa Moše, moitlhaolelwi wa ona,

a ka bo a se ka a ba emela

fa pele ga ona,

a tima bogale jwa ona

gore o se ka wa ba senya.

₂₄Ba bile ba nyatsa lefatshe

le le eletsegang,

ba se ka ba dumela lefoko la ona;

₂₅ba ngongorega

mo metlaaganeng ya bona,

ba se ka ba utlwa Morena.

₂₆Ke fa a ba tsholeletsa letsogo,

a ikana gore o tla ba diga

mo sekakeng,

₂₇le go falaletsa losika lwa bona

kwa ditšhabeng

le go ba phatlalatsa

mo mafatsheng.

₂₈Ba ne ba ikgomaretsa

mo go Baale-Pheore,

ba ja tse di tlhabetsweng baswi,

₂₉ba gakatsa Morena

ka ditiro tsa bona,

mme ba welwa ke petso.

₃₀Ke fa Phinehase a nanoga,

a tsereganya,

mme petso ya khutlisiwa.

₃₁Ke sona se a kailweng mosiami

ka ntlha ya sona

mo ditshikeng tsotlhe go ya go ile.

₃₂Le gona ba mo gakatsa fa metsing

a Meriba,

Moše a ba a tlhagelwa ke molato

ka ntlha ya bona.

₃₃Gonne ba ne ba ganetsanya

le Mowa wa ona,

mo Moše a bileng a bua

ka molomo

se se sa mo tshwanelang.

₃₄Ga ba a ka ba nyeletsa merafe

e Morena a e ba kaetseng.

₃₅Mme ba ne ba itlhakanya

le baheitane,

ba ithuta ditiro tsa bona.

₃₆Ba direla medimo ya bona

ya diseto e e tlogileng

ya nna serai mo go bona.

₃₇Ba tlhabela mewa e e bosula

bomorwaa-bone

le bomorwadia-bone.

₃₈Ba tsholola madi

a a se nang molato, –

madi a bomorwaa-bone

le bomorwadia-bone,

ba ba tlhabela medimo ya diseto

ya Bakanana; –

lefatshe la itshepololwa jalo

ka polao eo.

₃₉Ba ikgotlela ka ditiro tsa bona,

ba akafala ka go dira ga bona.

₄₀Foo Morena a tukela morafe

wa gagwe bogale,

a tenwa ke boswa jwa gagwe.

₄₁A ba neela mo diatleng

tsa merafe ya baheitane,

ba laolwa ke batlhoi ba bona.

₄₂Baba ba bona ba ba gatelela,

mme ba na le go ikoba

fa tlase ga diatla tsa bona.

₄₃O ne a ba thusa gantsi,

mme bona ba mo rukhutlhegela

ka maikaelelo a bona.

Ba nyelela jalo ka molato wa bona.

₄₄Le fa go ntse jalo

o ne a ba tlhokomela

mo pitlaganong ya bona,

ka a utlwa dilelo tsa bona.

₄₅A gopola kgolagano ya gagwe

ka ntlha ya bona,

a busa bogale,

ka a na le bopelontle jo bogolo.

₄₆A dira gore ba tlhomogelwe pelo

ke botlhe

ba ba ba isitseng botshwarong.

₄₇Re thuse, Morena,

Modimo wa rona,

o re phuthe,

o re golole mo baheitaneng

gore re bake leina la gago

le le boitshepo,

re ipoke ka go go tlotla.

₄₈A go bakwe Morena,

Modimo wa Iseraele

go tswa bosenang-tshimologo

go ya bosakhutleng.

A morafe otlhe o re: “Amen!”

Haleluya!