DIPESALEME 105

₁Lebogang Morena,

lo bitse leina la gagwe;

lo itsise ditiro tsa gagwe

mo merafeng!

₂Mo opeleleng, lo mo leletse,

lo bolele dikgakgamatso tsotlhe

tsa gagwe!

₃Belafalang ka leina la gagwe

le le boitshepo;

a go itumele dipelo

tsa ba ba batlang Morena!

₄Botsang ka ga Morena

le ka ga thata ya gagwe;

lo batle sefatlhego sa gagwe

ka gale.

₅Gopolang dikgakgamatso tsa gagwe

tse a di dirileng,

le ditshupo tsa gagwe le dikatlholo

tsa molomo wa gagwe,

₆lona losika lwa ga Aborahame,

motlhanka wa gagwe;

lona bomorwa Jakobe,

baitlhaolelwi ba gagwe!

₇Ena Morena ke Modimo wa rona;

dikatlholo tsa gagwe

di mo lefatsheng lotlhe.

₈O gopola kgolagano ya gagwe

ka gale,

e bong lefoko le a le laetseng

ditshika tse kete.

₉Kgolagano e o e dirileng

le Aborahame

le ikano e o e ikanetseng Isaka,

₁₀a e tlhomamisetsa Jakobe

go nna molao le Iseraele

go nna kgolagano e e sa khutleng,

₁₁fa a re: “Wena ke tla go naya

lefatshe la Kanana

gore e nne kabelo

ya boswa jwa lona,”

₁₂jale fa palo ya bona

e sa ntse e le nnye,

mme e le ba se kae,

e bile ba le baeng mo go lone,

₁₃ba tlhatlologanya dinageng,

ba tswa setšhabeng

ba ya setšhabeng,

ba tlogela bogosi bongwe,

ba ya kwa morafeng o mongwe.

₁₄A se ka a leseletsa motho ope

go ba gatelela;

le gona a betsa dikgosi

ka ntlha ya bona a re:

₁₅“Se ameng batlodiwa ba me,

lo se direle baporofeti ba me

bosula.”

₁₆O kile a biletsa tlala mo lefatsheng,

a senya tlamelo yotlhe ya dijo.

₁₇A roma monna go ba etelela pele,

e bong Josefa,

a rekisiwa go nna motlhanka.

₁₈Ba tsenya maoto a gagwe

mo ditshiping,

a ya go lala ka esi mo dikeetaneng

₁₉go ya go dirafale lefoko la gagwe,

lefoko la Morena le mo supe

a le mo nneteng.

₂₀Kgosi ya roma go mmofolola,

mmusi wa merafe a mo golola.

₂₁Ya mo dira morena wa ntlo

ya yona le molaodi

wa tsotlhe tse e nang natso

₂₂gore a laole dikgosana tsa yona

ka fa a ratang ka teng

le go ruta bagolo ba yona botlhale.

₂₃Ke fa Iseraele a ya kwa Egepeto;

Jakobe a jaka mo lefatsheng

la ga Hame.

₂₄Mme Morena

a atisa morafe wa gagwe segolo,

a o thatafatsa

bogolo go baba ba ona.

₂₅O ne a ba tlhanola dipelo

gore ba tlhoe morafe wa gagwe,

ba direle batlhanka ba gagwe

ka bolotsana.

₂₆A roma Moše,

motlhanka wa gagwe,

le Arone

yo o neng a mo itlhaoletse.

₂₇Bao ba dira ditshupo tsa gagwe

mo go bona,

le dikgakgamatso

mo lefatsheng la ga Hame.

₂₈A romela lefifi, a fifatsa;

mme ba tlhokomologa

lefoko la gagwe.

₂₉A fetola metsi a bona madi,

a bolaya ditlhapi tsa bona.

₃₀Lefatshe la bone

la ba la tlalatlala digwagwa,

le mo matlwaneng

a dikgosi tsa bone.

₃₁A laela,

mme ga tla diboba le menang

mo nageng yotlhe ya bone.

₃₂A dira pula ya bone sefako,

a romela melelo ya dikgadima

mo lefatsheng la bone.

₃₃A itaya meweine ya bone

le mefeie ya bone,

a robaka ditlhare tsa naga ya bone.

₃₄A laela,

mme ga tla tsie ya segongwane

le molome e e se nang palo.

₃₅Ya ja botala jotlhe

mo lefatsheng la bone,

ya laila maungo a masimo a bone.

₃₆Le gona a itaya maitibolo otlhe

mo lefatsheng la bone,

e bong matsalwapele

a thata yotlhe ya bone.

₃₇Ke fa a ba hudusa

ba tshotse selefera le gouta,

go se masalela ape

mo ditsong tsa gagwe.

₃₈Baegepeto ba itumelela

khudugo ya bone,

gonne ba ne ba wetswe ke letshogo

ka ntlha ya bone.

₃₉O ne a phutholola leru

go nna tshireletso

le molelo go bonesa bosigo.

₄₀E rile ba lopa,

a tsisa maphurrwana,

a ba kgorisa senkgwe sa legodimo.

₄₁A phatlola lefika,

metsi a phothometsega,

a ela mo sekakeng jaaka noka.

₄₂Gonne o ne a gopola

lefoko la gagwe le le boitshepo,

le Aborahame,

motlhanka wa gagwe.

₄₃A bolotsa morafe wa gagwe

ka boitumelo

le baitlhaolelwi ba gagwe

ka tuduetso.

₄₄A ba naya mafatshe a ditšhaba

gore ba rue

tse merafe e di phuthileng

ka matsapa,

₄₅e le gore ba dirise ditaelo tsa gagwe

le go tlhokomela melao ya gagwe.

Haleluya!