Jehofa o kgatlhanong le Iseraele
1Utlwang jaana
se Jehofa o se buang;
“Nanoga, o ganele
fa pele ga dithaba,
mme a makhubu a utlwe
lentswe la gago.
2Utlwang, lona dithaba
kgang ya ga Jehofa,
le lona metheo ya lefatshe
e e sa onaleng;
gonne Jehofa o na le kgang
le batho ba gagwe,
mme o rata go ganetsanya
le Iseraele.
3Ao, lona batho ba me,
ke lo dirileng?
ke lo lapisitse ka eng?
Supang ka ga me.
4Gonne ke lo ntshitse
kwa lefatsheng la Egepeto,
ka lo rekolola
mo ntlong ya botlhanka;
ka roma Moše fa pele ga lona,
le Arone, le Miriame.
5Ao, lona batho ba me,
a ko lo gakologelwe jaana
se Balake kgosi ya Moabe
o ne a se gopotse,
le ka fa Balaame morwa Beore
o ne a mo fetola ka teng;
lo gakologelwe go tswa Shitime
go ya Gilegale,
gore lo itse ditiro tse di siameng
tsa ga Jehofa.”
Se Jehofa o se batlang
6Ke tlaa ya fa pele ga Jehofa ka eng,
ke ikoba fa pele ga Modimo
wa Bogodimo?
A ke tlaa ya fa pele ga one
ka ditshupelo tse di fisiwang,
ka dinamane
tse di ngwaga o le mongwe fela?
7A Jehofa o tlaa itumelela
dikete tsa diphelefu,
kgotsa dinoka tsa lookwane
di le dikete di le some?
A ke tlaa ntshetsa tlolo ya me
ngwana wa me yo mogolo,
loungo lwa mmele wa me
ka ga boleo jwa mowa wa me?
8O go supeditse se se molemo
motho ke wena;
gape Jehofa o lopang mo go wena,
fa e se gore o dire ka tshiamo,
le go rata boutlwelobotlhoko,
le go sepela ka boikokobetso
le Modimo wa gago?
9Lentswe la ga Jehofa
le biletsa kwa motseng,
mme motho yo o botlhale
o tlaa boifa leina la gago.
“Reetsang thupa
le ene yo o e laotseng.
10A go sa ntse go na le dikhumo
tsa tshiamololo
mo ntlong ya basiamolodi,
le selekanyo se se tlhaelang,
se se tlhoesegileng?
11A ke tlaa bo ke itshekile
ke na le selekanyo sa pego
sa tshiamololo, le kgetse ya makete
a dilekanyo tsa bokete tsa tsietso?
12Gonne bahumi ba teng
ba tletse thubakanyo,
le banni ba teng ba buile maaka,
le loleme lwa bone lo tsietso fela
mo molomong wa bone.
13Ke gone ka moo le nna
ke go iteileng
ka ntho e e botlhoko;
ke go swafaditse
ka ntlha ya maleo a gago.
14O tlaa ja,
mme ga o ketla o kgora;
mme lolea lwa gago lo tlaa nna
mo gare ga gago;
mme o tlaa huduga,
mme ga o ketla o rora sentle,
le se o se rorang
ke tlaa se neela tšhaka.
15O tlaa jala mme ga o ketla o roba;
o tlaa gata ditlhware,
mme ga o ketla o tlola lookwane;
o tlaa gata difine,
mme ga o ketla o nwa bojalwa.
16Gonne ditao tsa ga Omeri
di a tshegediwa,
le ditiro tsotlhe
tsa ntlo ya ga Ahabe;
lo bile lo sepela
mo dikgakololong tsa bone,
gore ke tle ke go dire tshwafalo,
le banni ba gone kotso;
mme lo tlaa belega
kgobo ya batho ba me.”
