JOBE 23

₂“Le gompieno

boitoko jwa me bo galakegile;

titeo ya me e boima

bogolo go go dumaduma ga me.

₃A bo ke ka bo ke itse

kwa ke ka o fitlhelang teng,

gore ke ke ke ye fela

kwa sennong sa one!

₄Ke ne ke tlaa rulaganya mafoko a

me fa pele ga one,

ke tlatsa molomo wa me

ka diphetolano.

₅Ke ne ke tlaa itse

mafoko a o tlaa mphetolang ka one,

ke tlhaloganya

se o tlaa se buang le nna.

₆A o ne o tlaa ganela le nna

ka bogolo jwa nonofo ya one?

Nnyaa, o ne o tlaa ntlhokomela.

₇Foo mothokgami

o ne a tlaa tseisanya kgang nao;

jalo ke ne ke tlaa gololwa

ka bosakhutleng

mo moatlhoding wa me.

₈Bona, ke tle ke ye kwa pele,

mme ga o gone;

le kwa morago,

mme ga nkake ka o lemoga;

₉le ka fa go la molema,

mogang o dirang tiro,

mme ke retelelwe ke go o bona;

o itshube ka fa ntlheng ya le legolo,

ke be ke retelelwe ke go o bona.

₁₀O itse tsela e ke e tsayang;

e tlaa re o sena go nteka,

ke tswe jaaka gouta.

₁₁Lonao lwa me lo tshwaretse ruri

dikgato tsa one;

ke tseetse ruri tsela ya one

ke sa e fapoge.

₁₂Ga ke a boa

mo ditaolong tsa dipounama tsa one;

ke bolokile mafoko a molomo

wa one bogolo go dijo

tse ke tshelang ka tsone.

₁₃One o na le boitlhomo

bo le bongwe fela,

mme e mang yo o ka o faposang?

Se mowa wa one o se eletsang,

o dira sone fela.

₁₄Gonne o dirafatsa

se ke se laoletsweng;

dilo di le dintsi

tse di ntseng jalo o na natso.

₁₅Ke gone ka moo ke huduiwang

ke sebonalo sa one;

ke re ke akanya, ke be ke o boife.

₁₆Gonne Modimo o idibaditse

pelo ya me,

Mothatayotlhe o mphuduile;

₁₇Ka gobo ke se ka ka kgaolwa

pele ga lefifi, le gone

ga o a ka wa sirela sefatlhogo sa me

lefifi le lentsho.”