JOBE 22

₂“A monna o ka dirana le molemo

mo Modimong?

Ruri yo o botlhale

o tlaa bo a na le go itirela

molemo ka esi.

₃A go a bo go kgatlha Mothatayotlhe

fa o le tshiamo?

Kgotsa a go a mo thusa

fa o dira ditsela tsa gago

di nna boitekanelo?

₄A ke ka ntlha ya go mmoifa ga gago

a go kgalemela,

mme a seka nao?

₅Boikepo jwa gago a ga bo bogolo?

Le gone ga go na bokhutlo

jwa ditshiamololo tsa gago.

₆Gonne o tshotse dipeelo

mo go ngwana a rraago ka lefela,

wa apola ba ba sa ikategang diaparo

tsa bone.

₇Ga o a nosa balapi metsi,

o timile ba ba bolailweng ke tlala

dijo.

₈Ka ga monna yo o seganka,

ene o ne a na le lefatshe;

le motho yo o tlotlego

a aga mo go lone.

₉O tsamaisitse basadi ba batlholagadi

ba iphotlhere fela,

wa lesa mabogo a masiela a robega.

₁₀Ke gone ka moo

diru di go dikanyeditse,

le poifo ya tshoganetso

ya go hudua.

₁₁Kgotsa ke lefifi,

o ba o tla o sa bone,

le metsi a le mantsi

a go khurumetsa.

₁₂A Modimo ga o mo bogodimong

jwa legodimo?

Mme leba bogodimo jwa dinaledi

go re di kwa godimo jang!

₁₃Mme wa re Modimo o itse eng?

A o ka phunya lefifi le lentsho,

mme wa atlhola?

₁₄Maru a a kwenneng a o sireleditse,

mme o sa bone; o tsamaya mo

tikologong ya legodimo.

₁₅A o rata go tsaya tsela e kgologolo

e baikepi ba e gatileng?

₁₆Ba ba phamotsweng

e ise e nne lobaka lwa bone,

ba motheo wa bone

o ne wa thaololwa

jaaka kelelo ya metsi;

₁₇ba ba reileng Modimo ba re:

‘Tloga mo go rona;’ gape ba re:

‘Mothatayotlhe o ka re direlang?’

₁₈Le fa go ntse jalo

o ne a tladitse matlo a bone

ka dilo tse di molemo;

a kgakololo ya baikepi

e nne kgakala le nna.

₁₉Basiami ba a go bona,

mme ba a itumela;

ba ba se nang molato

ba ba tshega ka tshotlo,

₂₀ba re:

‘Ruri bone ba ba re tsogologetseng

ba kgaotswe;

le makunantsana a bone

molelo o a laitse.’

₂₁A ko o mo itemotshe,

mme o nne mo kagisong; mme

molemo o tlaa go diralela ka gone.

₂₂Ke a go rapela, o amogele molao

mo molomong wa one,

baya mafoko a one

mo pelong ya gago.

₂₃Fa o boela kwa go Mothatayotlhe,

o tlaa agiwa,

fa o tlosetsa tshiamololo kgakala

le megope ya gago.

₂₄Khumo ya gago o e beye

mo mmung,

le gouta ya Ofire

mo majeng a melatswana;

₂₅Mothatayotlhe e tlaa nna ene

khumo ya gago le selefera sa gago

se se tlhokegang.

₂₆Gonne foo o tlaa inatetsha

mo go Mothatayotlhe,

mme o tlaa tsholeletsa Modimo

sefatlhogo sa gago.

₂₇O tlaa o rapela,

mme o tlaa go utlwa;

o tlaa lefa maikano a gago.

₂₈Le gone o tlaa ikaelela sengwe,

mme o tlaa se tlhomamisediwa;

lesedi le tlaa phatsimela

ditsela tsa gago.

₂₉E tlaa re fa ba go digela fa fatshe

o tlaa re: ‘Go na le bokakatlololo’;

le motho yo o boikokobetso

o tlaa mmoloka.

₃₀O tlaa phedisa le e leng ene

yo o sa tlhokeng molato;

ee, o tlaa phedisiwa

ka go itsheka ga diatla tsa

gago.”