ISAIA 43

₁Mme jaanong,

go bua jaana Jehofa

yo o go tlhodileng,

wena Jakobe, ene yo o go bopileng,

wena Iseraele; a re:

“O se ka wa boifa,

gonne ke go rekolotse;

ke go biditse ka leina la gago,

o wa me.

₂E tlaa re o ralala metsi

ke tlaa bo ke na nao;

le o ralala dinoka

ga di ketla di go penamela;

mogang o ralalang molelo,

ga o ketla o ša;

le kgabo ga e ketla e tuka

mo go wena.

₃Gonne ke Jehofa Modimo wa gago,

Moitshepi wa Iseraele,

mmoloki wa gago;

ke ntshitse Egepeto

go nna serekololo sa gago,

ka ntsha Ethiopia le Seba

boemong jwa gago.

₄E re ka o ntse o le seetlaetlana

mo matlhong a me,

o le tlotlego, mme ke go ratile,

ke gone ke tlaa ntshang batho

boemong jwa gago, le ditšhaba

boemong jwa botshelo jwa gago.

₅O se ka wa boifa;

gonne ke na nao;

ke tlaa tlisa losika lwa gago

lo tswa kwa botlhabatsatsi,

ke go phutha

go tswa bophirimatsatsi.

₆Ke tlaa raya Botsheka ke re:

‘Ntsha;’ ke raya Borwa ke re:

‘Se kganele;’

tlisang bomorwaake go tswa kgakala,

le bomorwadiake go tswa sekhutlong

sa lefatshe.

₇E bong mongwe le mongwe

yo o bidiwang ka leina la me,

yo ke bileng ka mo tlholela

kgalalelo ya me;

nna ke mmopile;

ee, nna ke mo dirile.”

₈Ntshang ba ba difofu

tse di nang le matlho,

le ba ba bosusu

ba ba nang le ditsebe.

₉A merafe yotlhe e phuthwe,

a ditšhaba di kokoanngwe;

e mang mo go bone

yo o ka bolelang golo mo,

a re supetsa dilo tsa pele?

A ba tlise basupi ba bone,

gore ba tle ba siamisiwe;

kgotsa a ba utlwe, mme a ba re:

“Ke boammaaruri.”

₁₀“Lona lo basupi ba me,”

go bua Jehofa:

“o bile o motlhanka wa me

yo ke go itshenketseng;

gore lo tle lo itse,

lo ntumele, lo bo lo tlhaloganye

fa ke le ene;

e rile pele ga me

ga bo go sa bopiwa modimo ope,

le gone ga go ketla go nna ope

morago ga me.

₁₁Nna e leng nna, ke Jehofa,

mme kwa ntle ga me

ga go na mmoloki ope.

₁₂Ke kakantse, ke bolokile,

ke supile, mme go ne go se na

modimo ope

wa seeng mo go lona:

ke gone lo leng basupi ba me,”

go bua Jehofa,

“mme ke nna Modimo.

₁₃Ee, e sa le ka go nna motshegare

ke ntse ke le one;

mme ga go na ope

yo o ka gololang mo seatleng sa me;

ke tlaa nna ke dira fela,

mme e mang

yo o tlaa kgoreletsang?”

“Ke romile kwa Babilone

ka ntlha ya lona,

mme ke tlaa ba folosa botlhe

fela jaaka bafaladi,

e bong Bakalatea

ba le mo dikepeng tsa bone

tse ba di itumelelang.

₁₅Ke nna Jehofa Moitshepi wa lona,

Motlhodi wa Iseraele,

Kgosi ya lona.”

₁₆Go bua Jehofa

yo o dirang mmila mo lewatleng,

le tsela mo metsing

a a bokete jo bo thata;

₁₇yo o bolotsang kara ya tlhabano

le pitse, ntwa le nonofo;

ba lalaana mmogo,

ga ba ketla ba tsoga, ba figitlhegetse,

ba timile jaaka lodi:

₁₈“Lo se ka lwa gakologelwa

dilo tsa pele,

le gone lo se ka lwa akanya

dilo tsa bogologolo.

₁₉Bonang, ke tlaa dira sengwe se seša;

se tlaa runya jaana jaana;

a ga lo ketla lo se itse?

ke tlaa dira tsela fela mo nageng,

le dinoka mo sekakeng.

₂₀Ditshedi tsa naga di tlaa ntlotla,

diphokoje le bontšhe;

gonne ke baya metsi mo nageng,

le dinoka mo sekakeng

go tla ke nosa batho ba me,

baitshenkedwi ba me:

₂₁E bong batho ba ke ba ipopetseng,

gore ba tle ba ranole pako ya me.”

₂₂“Le fa go ntse jalo ga o a mpitsa,

wena Jakobe;

mme o lapisitswe ke nna,

wena Iseraele.

₂₃Ga o a nteretse dikwanyana

tsa ditshupelo tsa gago tsa phiso;

le gone ga o a ntlotla

ka ditlhabelo tsa gago.

Nna, ga ke a go kgwelea

ka ditshupelo,

le gone ga ke a go lapisa ka maswalo.

₂₄Wena ga o a nthekela ntšhe ka madi,

le gone ga o a nnyamuka

ka mafura a ditlhabelo tsa gago:

o nkimedisitse ka maleo a gago,

o ntapisitse ka maikepo a gago.

₂₅Ke nna, e leng nna,

yo ke phimolang ditlolo tsa gago

ka ntlha ya me;

le maleo a gago

ga nketla ke a gakologelwa.

₂₆O tle o nkgakolole;

a re rapelane; ranola kgang ya gago,

gore o tle o siamisiwe.

₂₇Rraago wa ntlha o ne a leofa,

le baphuthololedi ba gago ba tlodile

fa pele ga me.

₂₈Ke gone ka moo

ke tlaa tlhapatsang dikgosana

tsa felo ga boitshepo,

ke tlaa dira Jakobe seneelelwa,

le Iseraele kgobo.”