Motlhanka wa ga Jehofa
1“Bonang motlhanka wa me,
yo ke mo tshegeditseng;
moitshenkedwi wa me
yo mowa wa me
o natefelwang mo go ene;
ke beile mowa wa me mo go ene;
o tlaa ntshetsa tshiamiso
kwa merafeng.
2Ga a ketla a goa,
le fa e le go tsholetsa lentswe
la gagwe, le fa e le
go le utlwatsa mo mmileng.
3Lotlhaka lo lo phitsegileng
ga a ketla a lo roba,
le lodi lo lo kukelang
ga a ketla a lo tima;
o tlaa ntsha tshiamiso
mo boammaaruring.
4Ga a ketla a tlhaela
le fa e le go lapa pelo
go tsamaye a tlhome tshiamiso
mo lefatsheng pele;
mme ditlhake di tlaa lebelela
molao wa gagwe.”
5Go bua jaana Modimo, Jehofa,
ene yo o tlhodileng magodimo,
a a phutholola;
yo o ritibaditseng lefatshe
le se se tlhogang mo go lone;
yo o nayang batho ba ba mo go lone
go hema,
le ba ba tsamayang mo go lone
mowa, a re:
6“Nna Jehofa ke go biditse
mo tshiamong,
ke tlaa tshwara seatla sa gago,
ke go dibela;
ke tlaa go ntsha, gore o nne
kgolagano ya batho,
o bo o nne lesedi la merafe;
7go budulola matlho a a foufetseng;
go ntsha bagolegwi mo moleteng
o o lefifi,
le ba ba dutseng mo lefifing
go ba ntsha mo ntlong ya kgolegelo.
8Ke nna Jehofa;
ke lone leina la me;
le kgalalelo ya me
ga nketla ke e naya o sele,
le fa e le pako ya me
dithswantsho tse di setilweng.
9Bonang, dilo tsa pele di dirafetse,
ke bile ke bolela dilo tse dintšha;
ke di lo bolelela pele
di e se di tswele kwa ntle.”
Kgalaletso ya ga Jehofa
10Opelelang Jehofa sefela se seša,
le pako ya gagwe go tswa
bokhutlong jwa lefatshe;
lona ba lo fologelang mo lewatleng,
le tsotlhe tse di mo go lone;
le ditlhake le banni ba tsone.
11A naga le metse ya teng
e tsholetse mantswe a yone,
metsana e Ketara o nnang
mo go yone;
a banni ba Sela ba opele,
a ba kue ba le godimo ga dithaba.
12A ba neye Jehofa kgalalelo,
ba bolele pako ya gagwe
mo ditlhakeng.
13Jehofa o tlaa bolola
jaaka monna wa seganka;
o tlaa tsosa tlhotlheletso
jaaka monna a ya dira;
o tlaa goelela, ee, o tlaa goa ka thata;
o tlaa dira ka nonofo
mo babeng ba gagwe.
14“Ga ke bolo go nna ke didimetse fela;
ke ntse ke tuuletse fela ke ikganetse;
jaanong ke tlaa goela godimo
jaaka mosadi yo o mo pelegong;
ke tlaa sonela ke kolometsa
go le gongwe fela.
15Ke tlaa kgakgabatsa dithaba
le makhujana,
ke omeletsa merogo yotlhe ya tsone;
dinoka ke tlaa di dira ditlhake
le megobe ke tlaa e kgadisa.
16Ke tlaa tsamaisa difofu
ka tsela e di sa e itseng;
ke tlaa di goga
mo ditselaneng tse di sa di itseng;
lefifi ke tlaa le sedifatsa
fa pele ga bone,
ke lolamisa mafelo a a kgopameng.
Dilo tse ke tlaa di dira,
mme ga nketla ke ba latlha.
17Ba ba ikanyang ditshwantsho
tsa disetwa,
ba raya ditshwantsho
tse di thetsweng ba re:
‘Lo medimo ya rona.’
ba tlaa bosediwa morago,
ba tlhajwa ke ditlhong ruri.”
Batho ba Iseraele ga ba reetse dikgakolo
18“Utlwang lona ba lo bosusu;
lo lebe lona difofu gore lo bone.
19Go sefofu mang
fa e se motlhanka wa me?
Gongwe yo o bosusu e mang
jaaka morongwa wa me
yo ke mo romang?
Go sefofu mang
jaaka yo ke ntseng kagiso nae?
Le sefofu jaaka
motlhanka wa ga Jehofa?
20O bona dilo di le dintsi,
mme ga o di tlhokomele;
ditsebe tsa gagwe di kabologile,
mme ga a utlwe.”
21Ga kgatlha Jehofa,
ka ntlha ya tshiamo ya gagwe,
go godisa molao
le go o dira gore o nne tlotlego.
22Mme eno e,
ke tšhaba e e gapetsweng,
e e thopilweng;
botlhe ba tshwerwe mo didukung,
ba fitlhilwe mo matlong
a dikgolegelo;
ba ntse kgapo fela,
mme go se na ope yo o gololang;
ba ntse thopo fela,
mme go se na ope yo o reng;
“Ba rebolwe.”
23Go mang mo go lona
yo o tlaa beelang golo mo tsebe?
Yo o tlaa reetsang
a utlwela lobaka lo lo tlaa tlang?
24E mang yo o neetseng Jakobe
gore a nne thopo,
a neela Iseraele dinokwane?
A ga se Jehofa?
Ene yo re mo leofetseng,
yo ditsela tsa gagwe
ba ganneng go tsamaya mo go tsone,
le fa e le go utlwa molao wa gagwe.
25Ke gone ka mo o goromeditseng
mo go ene
tšhakgalo ya bogale jwa gagwe,
le bokete jwa tlhabano;
mme jwa mo tshuba mo tikologong;
le fa go ntse jalo o ne a sa itse;
mme jwa mo fisa,
le fa go ntse jalo
ga a ka a go baya mo pelong.
