HOSEA 2

₁Rayang bana ba ga rraeno, lo re: “Ami”; le bokgaitsadia lona, lo re: “Rugama”.

₂“Rapelang mmaeno, lo mo rapele; gonne ga se mosadi wa me, le nna ga ke monna wa gagwe. A a tlose boaka jwa gagwe mo sefatlhogong sa gagwe, le dikgokafalo tsa gagwe gare ga mabele a gagwe. ₃Nka tla ka mo tsodisetsa ruri, ka mmaya jaaka a ne a ntse mo tsatsing le o tsetsweng ka lone, mme ka mo dira jaaka naga fela, ka mmaya jaaka sekaka, mme ka mmolaya ka lenyora. ₄Ee, ga nketla ke utlwela bana ba gagwe botlhoko; gonne ke bana ba boaka. ₅Gonne mmaabo o akafetse; yo o ba imileng o dirile botlhabisa ditlhong; gonne o rile: ‘Ke tlaa latela barati ba me, ba ba nnayang dijo le metsi, le bobowa le leloba, le lookwane, le se se nowang.’

₆“Ke gone, bona, ke tlaa thiba tsela ya gago ka matlhaku, ke tlaa mo kganela ka logora, gore a tle a se ka a bona ditselana tsa gagwe. ₇O tlaa latela barati ba gagwe, mme ga a ketla a ba tshwara; o tlaa ba batla, mme ga a ketla a ba bona. Foo o tlaa re: ‘Ke tlaa tloga ke boela kwa monneng wa me wa ntlha; gonne jale go ne go le botoka mo go nna bogolo go gompieno.’

₈“Gonne o ne a sa itse fa e le nna ke mo nayang mabele, le bojalwa jwa mofine, le lookwane, ke mo ntsifaletsa selefera le gouta tse ba diretseng Baale ka tsone. ₉Ke gone ke tlaa tlhwayang mabele a me mo motlheng wa one, le bojalwa jwa mofine jwa me mo motlheng wa jone, ke phamola bobowa jwa me le leloba la me, tse di ne di tshwanetse tsa bo di khurumetsa bosaikategang jwa gagwe. ₁₀Jaana ke tlaa senola ditlhong tsa gagwe mo ponong ya dinyatsi tsa gagwe, mme ga go na ope yo o tlaa mo gololang mo seatleng sa me. ₁₁Gape ke tlaa khutlisa go dira mokete ga gagwe gotlhe fela, mediro ya gagwe, go rogwa ga dikgwedi ga gagwe, le bosabata ba gagwe, le mediro ya gagwe yotlhe e e masisi. ₁₂Ke tlaa kgakgabatsa mafine a gagwe, le ditlhare tsa difeige, tse o buileng ka ga tsone, a re: ‘Tse ke tsone tuelo e barati ba me ba e nneileng.’ Ke tlaa di dira sekgwa, le diphologolo tsa naga di tlaa di ja. ₁₃Ke tlaa mo kgopholela metlha ya Bobaale, ba o ba fiseditseng maswalo; jale ka a ikgabisa ka manyena a gagwe le dilo tsa gagwe tse di manyedinyedi, a ba a latela dinyatsi tsa gagwe, a ntebala,” go bua Jehofa.

₁₄“Ke gone, bonang, ke tlaa mo fepa, ke mo isa kwa nageng, mme ke tlaa bua nae ka go mo kokobetsa pelo. ₁₅Ke tlaa mo naya masimo a gagwe a mafine a tswa gone, le mokgatšha wa Akore go nna kgoro ya tsholofelo. O tlaa opela gone jaaka mo motlheng wa borweetsana jwa gagwe, le jaaka mo motlheng wa fa a tswa lefatsheng la Egepeto. ₁₆Go tlaa nna mo motlheng oo, go bua Jehofa, gore, o tlaa nthaya leina o re: ‘Iši’; mme ga o ketla o tlhola o mpitsa, ‘Baale’. ₁₇Gonne ke tlaa tlosa maina a Bobaale mo molomong wa gagwe, ga ba ketla ba tlhola ba umakwa ka maina a bone.

₁₈“Ke tlaa re mo motlheng oo ke ba direle kgolagano le diphologolo tsa naga, le dinonyane tsa loapi, le dilo tse di gagabang tsa lefatshe. Ke tlaa roba bora le tšhaka le tlhabano mo lefatsheng, mme ke tlaa ba robatsa ka polokego.