Polelelopele kgatlhanong le Goge
1Lefoko la ga Jehofa la tla mo go nna la re: 2“Morwa motho, lebisa sefatlhogo sa gago kwa Goge, wa lefatshe la Magoge, kgosana ya Rosa, le Mešeke, le Tubale, mme o perofese o mo nyatse. 3O re: Morena Modimo o bua jaana, a re: Bona, ke tlhabana nao wena Goge, kgosana ya Rosa, le Mešeke le Tubale. 4Ke tlaa go retolola, ke tsenya dikobe mo ditlhaeng tsa gago, ke tlaa go ntshetsa kwa ntle, le ntwa yotlhe ya gago, dipitse le bapalama dipitse botlhe ba apere meitshomelo ya phemelo, lesomo le legolo le na le thebe, botlhe e le ba ba itseng go kgatikanya tšhaka. 5Ba Peresia, le ba Kuše le ba Pute ba na nabo; botlhe ba na le thebe le tlhoro ya phemelo. 6Gomere, masomosomo otlhe a gagwe a sekamerwalo ya tsie; ba ntlo ya ga Togarema kwa dikhutlong tsa lefatshe tsa kwa botsheka, le masomosomo a gagwe otlhe a sekamerwalo ya tsie; e bong ditšhaba di le dintsi di na nao.
7“O etleetsege, ee, o ipaakanye, wena le masomo otlhe a gago a a phuthegetseng kwa go wena, mme o nne molaodi mo go one. 8E tlaa re malatsi a le mantsi a fetile o tlaa lekolwa; e tlaa re mo dinyageng tse di kwa pele o tlaa fitlha mo lefatsheng le le busitsweng mo tšhakeng, le le phuthilweng mo ditšhabeng di le dintsi, mo dithabeng tsa Iseraele, tse di ntseng di kgakgabetse ka gale le ka gale; mme le ntshitswe kwa ditshabeng, mme ba tlaa aga ka thagamo, botlhe fela. 9O tlaa tlhatloga o tlaa tla jaaka ledimo, o tlaa nna jaaka leru go khurumetsa lefatshe, wena le masomosomo otlhe a gago a sekamerwalo ya tsie, o na le ditšhaba di le dintsi.
10“Morena Modimo o bua jaana, a re: Go tlaa dirala mo motlheng oo, go re dilo di tlaa tsoga mo pelong ya gago, mme o tlaa loga maano a a bosula. 11O tlaa re: Ke tlaa bololela kwa lefatsheng la metsana e e sa agelwang dithako; ke tlaa ya kwa go ba ba iketlileng, ba agile ka thagamo, botlhe ba agile fela ba se na dithako, ba se na mephakalego le fa e le ditswalo. 12Go tsaya thopo, go tsaya kgapo; go ya go busetsa seatla sa gago mo mafelong a a kgakgabetseng, a gompieno a ntsweng, le go tlhabana le batho ba ba tswang go phuthwa kwa merafeng, ba bapetse dikgomo le dithoto, ba agile mo gare ga lefatshe. 13Ba Sheba le ba Detane, le barekisi ba Tarešiše ba na le madumedi otlhe a teng, ba tlaa go raya ba re: ‘A o tsile go tsaya thopo? A o phuthile lesomo la gago go tla go tsaya kgapo? Go tla lo isa koo selefera le gouta, go ya le dikgomo le dilwana, go tsaya thopo e kgolo?’
14“Ke gone ka moo, morwa motho, perofesa, o reye Goge o re: Morena Modimo o bua jaana, a re: E tlaa re mo motlheng oo, mogang batho ba me ba Iseraele ba agileng ka thagamo, a ga o ketla o go itse? 15O tlaa tswa kwa felong ga gago, kwa dikhutlong tsa ntlha ya botsheka, wena le ditšhaba di le dintsi di na nao, botlhe ba palame dipitse, e le lesomo le legolo, le ntwa e e thata e kgolo. 16O tlaa bololela batho ba me ba Iseraele, o khurumetsa lefatshe jaaka leru; go tlaa dirala mo metlheng ya bofelo go re, ke tlaa go bololetsa lefatshe la ga etsho, gore merafe e nkitse, mogang ke itshepisiwang mo go wena, wena Goge fa pele ga matlho a bone.” 17Morena Modimo o bua jaana, a re: “A ke wena yo ke buileng ka ga gago mo metlheng ya bogologolo, ka batlhanka ba me, baperofeti ba Iseraele, ba ba perofesitseng mo lobakeng loo ka dinyaga di le dintsi, ka re: Ke tlaa ba go bololetsa?
Modimo o atlhola Goge
18“Go tlaa dirala mo motlheng oo, go re mogang Goge o bololelang lefatshe la Baiseraele,” go bua Morena, “tšararego ya me e tlaa gola mo dinkong tsa me. 19Gonne ke buile mo lefufeng la me, le mo molelong wa bogale jwa me, ka re: Ruri mo motlheng oo go tlaa nna thoromo e kgolo mo lefatsheng la Iseraele; 20go ba go tla ditlhapi tsa lewatle, le dinonyane tsa loapi, le ditshedi tsa naga, le dilo tsotlhe tse di gagabang, tse di gagbang fa fatshe, le batho botlhe ba ba mo lefatsheng, ba tlaa roroma fa pele ga gago, le dithaba di tlaa digwa, le mapawa a tlaa wa, le dithako tsotlhe di tlaa wela fa fatshe. 21Ke tlaa mo kuela tšhaka mo dithabeng tsa me tsotlhe fela,” go bua Morena Modimo; “tšhaka ya motho mongwe le mongwe e tlaa tsholediwa kgatlhanong le ngwana a rraagwe. 22Ke tlaa ganetsana nae ka kgogodi le madi; go le ene le masomosomo a gagwe a sekamerwalo ya tsie, le ditšhaba tse dintsi tse o nang natso, ke tlaa ba nesetsa lesogodi le le penologang, le sefako se segolo, le molelo, le sulefura. 23Ke tlaa itlotlomatsa, ke tlaa iitshepisa, ke tlaa itira gore ke itsiwe mo matlhong a merafe e le mentsi; mme ba tlaa itse fa ke le Jehofa.”
