Mogogoro wa marapo a a omeletseng
1Seatla sa ga Jehofa se ne se le mo go nna, mme a nkisa kwa ntle ke le mo moweng wa ga Jehofa, a mpaya mo gare ga mogogoro; mme wa bo o tletse marapo. 2Mme a a mpotonosa, mme bonang, a bo a le mantsi thata mo mogogorong mo lobaleng fela; mme bonang, a bo a omeletse thata. 3Mme a nthaya a re: “Morwa motho, a marapo a, a ka tshela?” Mme ka mo fetola ka re: “Go itse wena, Morena Modimo.”
4Gape a nthaya, a re: “Perofesetsa mo godimo ga marapo a, mme o a reye o re: Lona marapo a a omeletseng utlwang lefoko la ga Jehofa. 5Morena Modimo o raya marapo jaana, a re: Bonang, ke tlaa tsenya mowa mo go lona, mme lo tlaa tshela. 6Ke tlaa baya mesifa mo go lona, ke tlaa medisa nama mo go lona, ke lo khurumetsa ka letlalo, ke tsenya mowa mo go lona, mme lo tlaa tshela; mme lo tlaa itse fa ke le Jehofa.”
7Jalo ka perofesa jaaka ke laotswe, mme ya re ke perofesa, ga tsoga modumo, mme bonang, ga nna thoromo ya lefatshe, mme marapo a kopana, lesapo mo lesapong le o rraa lone. 8Ka leba, mme bonang, ga bo go le mesifa mo go one, le nama ya mela, letlalo la a khurumetsa godimo; mme ga bo go se na mowa mo go one.
9Foo a nthaya, a re: “Perofesetsa phefo, perofesa, wena morwa motho, o reye phefo o re: Morena Modimo o bua jaana, a re: Tswa mo diphefong tsoo nne, wena mowa, o budulele babolaiwi ba, gore ba tshele.”
10Jalo ka perofesa jaaka a ntaotse, mme mowa wa tsena mo go bone, mme ba tshela, ba ema ka dinao, e le ntwa e kgolo thata.
11Foo a nthaya a re: “Morwa motho, marapo a ke ba ntlo ya Iseraele botlhe fela; ba tle ba re: ‘Bonang, marapo a rona a omeletse, tsholofelo ya rona e ile; re kgaoletswe ruri.’ 12Ke gone perofesa, o ba reye o re: Morena Modimo o bua jaana, a re: Bonang, ke tlaa katolola diphupu tsa lona, ke tlaa lo ntsha mo diphupung tsa lona, lona batho ba me; mme ke tlaa lo isa kwa lefatsheng la Iseraele. 13Mme lo tlaa itse fa ke le Jehofa ke sena go katolola diphupu tsa lona, le ke sena go lo ntsha mo diphupung tsa lona, lona batho ba me. 14Ke tlaa tsenya mowa wa me mo go lona, mme lo tlaa tshela; ke tlaa lo baya mo lefatsheng la ga lona; mme lo tlaa itse fa nna Jehofa ke buile, ka ba ka go dira, go bua Jehofa.”
Polelelopele ka ga go kopanngwa ga Iseraele le Juta
15Gape lefoko la ga Jehofa la tla mo go nna, la re: 16“Wena, morwa motho, tsaya thobane nngwe, mme o kwale mo go yone, o re: Ya ga Juta, le ya bana ba Iseraele, bankana ba gagwe; foo o tseye thobane e nngwe o kwale mo go yone, o re: Ya ga Josefe, thobane ya ga Eferaime, le ya ba ntlo ya Iseraele botlhe bankana ba gagwe; 17o di pataganye e nne thobane e le nngwe fela, gore di nne nngwe fela mo seatleng sa gago. 18Mme mogang bana ba batho ba gaeno ba buang le wena, ba re: ‘A ga o nka o re bolelela se o se kayang ka dilo tse?’ 19O ba reye o re: Morena Modimo o bua jaana, a re: Bonang, ke tlaa tsaya thobane ya ga Josefe e e mo seatleng sa ga Eferaime, le ditso tsa Iseraele bankana ba gagwe; mme ke tlaa di baya mmogo nao, e bong le thobane ya ga Juta; mme ke tlaa di dira thobane e le nngwe fela, mme di tlaa nna nngwe fela mo seatleng sa me.
20“Dithobane tse o kwalang mo go tsone di tlaa nna mo atleng sa gago fa pele ga matlho a bone. 21O ba reye o re Morena Modimo o bua jaana, a re: Bonang, ke tlaa tlosa bana ba Iseraele kwa merafeng, kwa ba ileng teng, ke tlaa ba phutha mo ntlheng tsotlhe, ke ba isa mo lefatsheng la ga bone. 22Ke tlaa ba dira morafe o le mongwe fela mo lefatsheng, mo dithabeng tsa Iseraele; mme kgosi e le nngwe fela e tlaa nna kgosi e e ba busang botlhe fela; ga ba ketla ba tlhola ba nna merafe e le mebedi, le gone ga ba ketla ba tlhola ba kgaoganngwa ba nna magosi a le mabedi gope. 23Le gone ga ba ketla ba tlhola ba itshekolola ka medimo ya bone ya disetwa, le fa e le ka dilo tsa bone tse di tlhoesegang, le fa e le ka ditlolo dipe tsa bone; ke tlaa ba golola mo ditenegong tsotlhe tsa bone tse ba leofileng ka tsone, ke tlaa ba tlhapisa; jalo ba tlaa nna batho ba me, le nna ke tlaa nna Modimo wa bone.
24“Motlhanka wa me Dafite o tlaa nna kgosi e e ba busang; ba tlaa nna le modisa a le mongwe fela; le gone ba tlaa sepela mo dikatlholong tsa me, ba tlaa tlhokomela ditao tsa me, ba di dira. 25Ba tlaa aga mo lefatsheng le ke le neileng Jakobe motlhanka wa me, le borra ba lona ba kileng ba aga mo go lone; ba tlaa aga teng, bone le bana ba bone, le bana ba bana ba bone, ka bosakhutleng. Dafite motlhanka wa me o tlaa nna kgosana ya bone ka bosakhutleng. 26Gape ke tlaa dira kgolagano ya kagiso nabo; e tlaa nna kgolagano e e sa khutleng nabo. Ke tlaa ba baya, ke ba ntsifatsa, ke ba ke baya felo ga me ga boitshepo mo gare ga bone ka bosakhutleng. 27Le motlaagana wa me o tlaa nna le bone; ke tlaa nna Modimo wa bone, le bone ba tlaa nna batho ba me. 28Merafe e tlaa itse fa e le nna Jehofa yo ke itshepisang Iseraele, mogang felo ga me ga boitshepo go nnang mo go bone ka bosakhutleng.”
