Petso ya loso lwa diruiwa
1Foo Jehofa a raya Moše a re: “Tsena kwa go Faro, o mmolelele o re: ‘Go bua jaana Jehofa Modimo wa Bahebere, a re: “Lesa batho ba gagwe ba tsamaye gore ba o direle. 2Gonne e tlaa re fa o gana go ba lesa ba tsamaya, fa o sa ntse o ba kganela, 3bona, seatla sa ga Jehofa se mo kgomong ya gago e e mo nageng, le mo dipitseng, le mo dieseleng, le mo dikameleng, le mo matlhapeng, le mo matsomaneng; go tlaa nna kgogodi e e boitshegang mo go tsone. 4Jehofa o tlaa lomologanya gare ga dikgomo tsa Iseraele le dikgomo tsa Egepeto; ga go nka go swa sepe sa dilo tsotlhe tse e leng tsa bana ba Iseraele. 5Jehofa a kaya lobaka lo lo tlhomilweng, a re e tlaa re ka moso Jehofa o tlaa dira seo se mo lefatsheng.” ’ ”
6Ya re ka moso Jehofa a dira selo seo, dikgomo tsotlhe tsa Egepeto tsa a swa; mme mo dikgomong tsa bana ba Iseraele ga se ka ga a swa epe. 7Faro a roma batho, mme bonang, ga bo go se epe ya dikgomo tsa Baiseraele e e suleng. Pelo ya ga Faro ya nna logwadi fela, a se ka a lesa batho ba tsamaya.
Petso ya diso
8Jehofa a raya Moše le Arone a re: “Tabolang molora wa leiso la leubelo ka diatla, Moše a o kubuelele kwa godimo mo ponong ya ga Faro. 9O tlaa nna lorole lo lo loupa mo lefatsheng lotlhe la Egepeto; lo tlaa nna diso tse di itshemang marophi mo mothong le mo kgomong, go ya le lefatshe lotlhe la Egepeto.” 10Ba tsaya molora wa leiso la leubelo, ba ema fa pele ga Faro; Moše a o kubuelela kwa godimo: wa nna diso tse di itshemang marophi mo mothong le mo kgomong. 11Dingaka tsa retelelwa ke go ema fa pele ga Moše ka ntlha ya diso; gonne diso di ne di le mo dingakeng le mo go Baegepeto botlhe fela. 12Jehofa a thatafatsa pelo ya ga Faro, a se ka a ba reetsa; fela jaaka Jehofa a buile le Moše.
Petso ya sefako
13Jehofa a raya Moše a re: “Phakela ka moso, o eme fa pele ga Faro, o mo reye o re: ‘Jehofa o bua jaana, e bong Modimo wa Bahebere, a re: Lesa batho ba me ba tsamaye gore ba ntirele. 14Gonne ke tlaa re mo lobakeng lono ke lere dipetso tsa me tsotlhe fela mo pelong ya gago, le mo batlhankeng ba gago, le mo bathong ba gago; gore o tle o itse fa go se na ope yo o tshwanang le nna mo lefatsheng lotlhe. 15Ka gobo fa nka bo ke ntshitse seatla sa me go go itaya le batho ba gago ka kgogodi, o ka bo ne ne fano o kgaotswe mo lefatsheng: 16Fela ke go emiseditse gone moo, gore ke go bontshe nonofo ya me, le gore leina la me le bolelwe mo lefatsheng lotlhe fela. 17A o sa ntse o ikgodisetsa batho ba me, ka e le fa o gana go ba lesa ba tsamaya? 18Bona, e tlaa re ka moso go riana ke nese sefako se se boitshegang, se se iseng se ke se nne se le kalo mo Egepeto, e sa le ka lobaka lo o theilweng ka lone go tla mo nakong eno. 19Ke gone, jaana, roma batho o akofise dikgomo tsa gago di goroge, le tsotlhe tse o nang natso kwa nageng; gonne motho mongwe le mongwe yo o tlaa fitlhelwang mo nageng le fa e le kgomo, fa di sa tlisiwe mo gae, sefako se tlaa di wela mme di tlaa swa.’ ” 20Mo batlhankeng ba ga Faro motho yo o boifileng lefoko la ga Jehofa, a tshabisetsa batlhanka ba gagwe le dikgomo tsa gagwe mo matlong. 21Mme yo o tlhokomologileng lefoko la ga Jehofa, a lesa batlhanka ba gagwe le dikgomo tsa gagwe mo nageng.
22Jehofa a raya Moše a re: “Otlololela letsogo la gago kwa legodimong gore go ne sefako go ya le lefatshe lotlhe la Egepeto, mo mothong, mo kgomong, le mo merogong yotlhe ya naga, go ya le lefatshe lotlhe la Egepeto.” 23Moše a otlololela thobane ya gagwe kwa legodimong; Jehofa a tlisa tumo ya maru le sefako, molelo le one wa thelegela fa fatshe; mme Jehofa a nesa sefako mo lefatsheng la Egepeto. 24Jalo ga nna sefako, le molelo o tlhakanye le sefako, le molelo o tlhakanye le sefako, mo go boitshegang thata, mo go iseng go ko go nne jalo mo lefatsheng lotlhe la Egepeto, e sa le ka lobaka lo ba simologileng go nna morafe ka lone. 25Sefako sa itaaka tsotlhe tse di mo nageng go ya le lefatshe lotlhe la Egepeto, motho le kgomo; sefako sa ba sa itaaka merogo yotlhe ya naga, sa robaka ditlhare tsotlhe tsa naga. 26Fa e se mo lefatsheng la Gošene gosi fela, kwa bana ba Iseraele ba gone go ne go se na sefako.
27Faro a roma a ya go bitsa Moše le Arone, a ba raya a re: “Monomotlha ke leofile, Jehofa o tshiamo, nna le batho ba me re baikepi. 28Rapelang Jehofa; gonne ditumo tse tsa maru tse di thata tse le sefako, go lekanye; ke tlaa lo lesa lo tsamaya, ga lo ketla lo tlhola lo diega.”
29Moše a mo raya a re: “E tlaa re ke sena go tswa mo motseng, ke tlaa otlololela mabogo a me kwa go Jehofa; ditumo tsa maru di tlaa khutla, le gone ga go ketla go tlhola go nna sefako; gore o tle o itse fa lefatshe e le la ga Jehofa. 30Ka ga gago le batlhanka ba gago, ke a itse fa lo a bo lo tlaa bo lo ise lo boife Jehofa Modimo.”
31Leloba la iteega le barele; gonne barele o ne a setse a le diako, le leloba le golokile. 32Mabele a se ka a iteega le lebelebele, gonne a ne a ise a gole.
33Moše a tswa mo motseng kwa go Faro, mme a otlololela mabogo a gagwe kwa go Jehofa; mme ditumo tsa maru tsa khutla le sefako, pula le yone ya se ka ya tlhola e thelegela mo lefatsheng. 34E rile Faro a bona fa pula e khutlile le sefako, le ditumo tsa maru, a fela a leofa, a ithatafatsa pelo, ene le batlhanka ba gagwe. 35Pelo ya ga Faro ya thatafala, a se ka a lesa bana ba Iseraele ba tsamaya; fela jaaka Jehofa a buile ka Moše.
