EKESODO 8

₁Jehofa a bua le Moše a re: “Ya go tsena kwa go Faro, o mo reye o re: ‘Jehofa o bua jaana a re: Lesa batho ba me ba tsamaye gore ba ntirele. ₂Fa o gana go ba lesa ba tsamaya, ke tlaa go itaya ka ntlha tsotlhe ka digwagwa: ₃Noka e tlaa nyeula digwagwa, tse di tlaa tlhatlogang di tsena mo ntlong ya gago, le mo borobalong jwa gago, le mo bolaong jwa gago, le mo ntlong ya batlhanka ba gago, le mo bathong ba gago, le mo dipesetsong tsa gago, le mo megopong ya gago ya bodubelo: ₄Digwagwa di tlaa tlhatlogela mo go wena le mo bathong ba gago, le mo batlhankeng ba gago botlhe fela.’ ”

₅Jehofa a raya Moše a re: “Raya Arone o re: ‘Otlola thobane ya gago ka letsogo la gago godimo ga dinoka, godimo ga dinokana, le godimo ga makgelebe, o tlhatlosetse digwagwa mo lefatsheng la Egepeto.’ ” ₆Arone a otlolola letsogo la gagwe godimo ga metsi a Egepeto; mme digwagwa tsa tlhatloga tsa khurumetsa lefatshe la Egepeto. ₇Dingaka tsa dira fela jalo ka mereo ya tsone, tsa tlhatlosa digwagwa mo lefatsheng la Egepeto.

₈Foo Faro a bitsa Moše le Arone a re: “A lo ko lo rapeleng Jehofa gore a tlose digwagwa mo go nna le mo bathong ba me, mme ke tlaa lesa batho ba tsamaya gore ba isetse Jehofa tlhabelo.”

₉Moše a raya Faro a re: “E bo ka e le wena yo o ka ntaolang: ke tlaa go rapelelela lobaka lofe, le batlhanka ba gago, le batho ba gago, gore digwagwa di senngwe di tswe mo go wena, le mo matlong a gago, mme di sale mo nokeng e le yosi fela?”

₁₀Mme a re: “Ka moso.” A re: “A go nne ka fa lefokong la gago; gore o tle o itse fa go se na ope yo o tshwanang le Jehofa, Modimo wa rona. ₁₁Digwagwa di tlaa tloga mo go wena le mo mantlong a gago, le mo batlhankeng ba gago, le mo bathong ba gago; di tlaa sala mo nokeng e le yosi fela.” ₁₂Moše le Arone ba tswa mo go Faro. Moše a goela kwa go Jehofa ka ga digwagwa tse o di tlisitseng mo go Faro. ₁₃Jehofa a dira ka fa lefokong la ga Moše: mme digwagwa tsa swela mo mantlong, mo malwapeng le mo dinageng. ₁₄Ba di kokoanya; tsa nna mekoa; mme lefatshe la nkga sebodu. ₁₅E rile Faro a bona fa go hupologile, a ithatafatsa pelo, a se ka a ba reetsa; fela jaaka Jehofa a buile.

₁₆Jehofa a raya Moše a re: “Raya Arone o re: ‘Otlolola thobane ya gago, o iteye lorole lwa lefatshe gore lo nne dinta mo lefatsheng lotlhe la Egepeto.’ ” ₁₇Ba dira jalo; Arone a otlolola letsogo la gagwe le tshotse thobane ya gagwe, a itaya lorole lwa lefatshe, mme ga nna dinta mo mothong le mo diruiweng; lorole lotlhe lwa lefatshe lwa nna dinta mo lefatsheng lotlhe la Egepeto. ₁₈Dingaka le tsone tsa dira jalo ka mereo ya tsone go ntsha dinta, mme tsa retelelwa. Ga nna dinta mo mothong le mo diruiweng. ₁₉Foo dingaka tsa raya Faro tsa re: “Seo se, ke mongwana wa Modimo.” Mme pelo ya ga Faro ya thatafala, a se ka a ba reetsa; fela jaaka Jehofa a buile.

₂₀Jehofa a raya Moše a re: “Phakela ka moso o eme fa pele ga Faro; bona, o tlaa tswa a ya kwa metsing; o mo reye o re: Jehofa o bua jaana a re: ‘Lesa batho ba me ba tsamaye, gore ba ntirele. ₂₁E tlaa re fa o sa lese batho ba me ba tsamaya, bona, ke tlaa tlisa metshitshi ya dintshi mo go wena le mo batlhankeng ba gago, le mo bathong ba gago, le mo matlong a gago; mantlo a Baegepeto a tlaa tlatla metshitshi ya dintshi le one mmu o a emeng mo go one. ₂₂Ke tlaa re mo tsatsing leo ke lomolole lefatshe la Gošene le batho ba me ba agileng mo go lone, gore go se ka ga nna metshitshi epe ya dintshi gone; gore o tle o itse fa ke le Jehofa mo gare ga lefatshe. ₂₃Ke tlaa baya tomologano gare ga batho ba me le batho ba gago; e tlaa re ka moso sesupo se, se diragale.’ ” ₂₄Jehofa a dira jalo; ga tla metshitshi e e boitshegang ya dintshi, ya tla mo ntlong ya ga Faro, le mo matlong a batlhanka ba gagwe, mo lefatsheng lotlhe la Egepeto lefatshe la bodisiwa ke metshitshi ya dintshi.

₂₅Faro a bitsa Moše le Arone a re: “Tsamayang lo isetseng Modimo wa lona tlhabelo mo lefatsheng leno.”

₂₆Moše a re: “Ga go a tshwanela go dira jalo; gonne re tlaa bo re isetsa Jehofa Modimo wa rona moila wa Baegepeto tlhabelo; a re ka isa moila wa Baegepeto tlhabelo fa pele ga matlho a bone, a ga ba ketla ba re kgobotletsa ka maje? ₂₇Re tlaa tsamaya loeto lwa malatsi a le mararo kwa nageng re isetsa Jehofa Modimo wa rona tlhabelo, ka fa o tlaa re laolang ka gone.”

₂₈Faro a re: “Ke tlaa lo lesa lo tsamaya gore lo isetse Jehofa Modimo wa lona tlhabelo kwa nageng; le fa go ntse jalo, lo se ka lwa ya kgakala; lo nthapelele.”

₂₉Moše a re: “Bona, ke tswa mo go wena, mme ke tlaa rapela Jehofa gore metshitshi ya dintshi e tloge e tswe mo go Faro le mo batlhankeng ba gagwe, le mo bathong ba gagwe ka moso; a Faro a se tlhole a dira ka boferefere ka go gana go lesa batho ba ya go isetsa Jehofa tlhabelo.”

₃₀Moše a tswa mo go Faro, a ya go rapela Jehofa. ₃₁Jehofa a dira ka fa lefokong la ga Moše; a tlosa metshitshi ya dintshi mo go Faro le mo batlhankeng ba gagwe, le mo bathong ba gagwe; ga se ka ga sala epe. ₃₂Faro a ithatafatsa pelo le ka lone lobaka loo, a se ka a lesa batho ba tsamaya.