Hesekia o šafatsa Tirelo Modimo
1Jaana e rile tiro e yotlhe e sena go wediwa, Baiseraele botlhe ba ba teng ba tswela kwa metseng ya Juta, ba thubaganya maje a a emeng metloutlo, ba rema Medimako, ba rutla mafelo a a tlotlometseng le dibeso mo lefatsheng lotlhe la Juta le la Benjamine, le mo Eferaime le Manase, ga tsamaya ba di senya tsotlhe fela. Foo bana ba Iseraele botlhe ba boa, mongwe le mongwe a ya kwa bosweng jwa gagwe, kwa metseng ya bone.
2Hesekia a rulaganya makoko a diphapaano tsa baperesiti, le tsa Balefi ka fa makokong a diphapaano tsa bone, monna mongwe le mongwe ka fa tirelong ya gagwe, baperesiti le Balefi, ba ditshupelo tse di fisiwang le ba ditshupelo tsa kagiso, ba go direla, le ba go leboga, le ba go baka mo dikgorong tsa bothibelelo jwa ga Jehofa. 3Le gone a rulaganya kabelo ya kgosi, ya dithuo tsa yone, e e ntshediwang ditshupelo tse di fisiwang, e bong ya ditshupelo tse di fisiwang tsa ka moso le maitsebowa, le ditshupelo tse di fisiwang tsa bosabata, le tsa go rogwa ga dikgwedi, le tsa mediro e e tlhomameng, jaaka go kwadilwe mo molaong wa ga Jehofa.
4Gape a laola batho ba ba agileng mo Jerusalema, gore ba ntshe kabelo ya baperesiti le Balefi, gore ba ineele mo molaong wa ga Jehofa. 5E rile taolo eo e sena go utlwalelwa kwa ntle, bana ba Iseraele ba ntsha letlotlo la mabutswapele a mabele, le a bojalwa jwa mofine, le a lookwane, a dinotshe, le a totafalo yotlhe ya naga; le sa bosome sa dilo tsotlhe, ba se lere se le letlotlo fela. 6Mme bana ba Iseraele le ba Juta, ba ba agileng mo metseng ya Juta, le bone ba lere sa bosome sa dikgomo le dinku, le sa bosome sa dilo tse di tshwaetsweng Modimo tse di ne di neetswe Jehofa Modimo wa bone, ba di baya mekoakoa fela. 7Ba simolotse go thaya motheo wa mekoa ka kgwedi ya boraro, ba e wetsa ka kgwedi ya bosupa. 8E rile Hesekia a tla le dikgosana, mme ba bona mekoakoa, ba baka Jehofa, le batho ba gagwe ba Iseraele. 9Foo Hesekia a botsanya le baperesiti le Balefi ka ga mekoa eo. 10Mme Asaria moperesiti yo mogolo wa ntlo ya ga Satoke a mo fetola, a re: “E sa le jaaka batho ba simolola go lere diromololo mo ntlong ya ga Jehofa, re ntse re ja re kgora re sadisa mo gogolo, gonne Jehofa o segofaditse batho ba gagwe; mme mo go setseng ke mo go beilweng mo gogolo mo.”
11Foo Hesekia a laola gore go baakanngwe matlwana mo ntlong ya ga Jehofa; mme ba a baakanya. 12Ba gorosa diromololo, le tsa bosome, le dilo tse di tshwaetsweng Modimo, ka boikanngo. Molaodi wa tsone e ne e le Konania Molefi, Shimei monnawe e le wa bobedi. 13Jehiele, le Asasia, le Nahathe, le Asahele, le Jerimothe, le Josabate, le Eliele, le Isemakia, le Mahathe le Benaia, e ne e le balebedi tlase ga Konania le Shimei monnawe, ka taolo ya ga Hesekia kgosi, le Asaria molaodi wa ntlo ya Modimo. 14Kore morwa Imena wa Molefi, molebedi wa kgoro ya ka fa ntlheng ya botlhabatsatsi, e ne e le ene molaodi wa dineo tse di newang Modimo ka peleego, go aba diromololo tsa ga Jehofa, le dilo tse di boitshepo jo bo itshepileng. 15Tlase ga gagwe go ne go le Etene, le Miniamine, le Ješua, le Shemaia, le Amaria le Shekania, mo metseng ya baperesiti, mo tirong ya bone e e tlhomameng, go abela bomonnaa bone ka makoko a diphapaano, ba bagolo le ba bannye. 16Kwa ntle ga ba ba badilweng ka losika lwa lonna, go simolola ka ba ba dinyaga di le tharo go ya kwa go bomogoloa bone, e bong mongwe le mongwe yo o tsenang mo ntlong ya ga Jehofa, ka fa tirong ya letsatsi lengwe le lengwe e lopang ka gone, ba ya mo tirelong ya bone, mo ditebelong tsa bone ka fa makokong a diphapaano tsa bone; 17le ba ba badilweng ka fa losikeng lwa baperesiti, ka matlo a borraabo, go simolola ka ba ba dinyaga tse di 20 go ya kwa go bomogoloa bone, mo ditebelong tsa bone ka fa makokong a bone a diphapaano. 18E bong go abela bone ba ba badilweng ka losika lwa banyana botlhe ba bone, basadi ba bone, le bana ba bone ba basimane, le ba basetsana, mo phuthegong yotlhe; gonne mo tirong ya bone e e tlhomameng ba ne ba iitshepisa mo boitshepong. 19Le mo go bone bomorwa Arone ba baperesiti, ba ba mo dinageng tsa dintlhana tsa metse ya bone, mo motseng mongwe le mongwe ga bo go le banna ba ba badilweng ka maina, go tla ba abela lonna lotlhe mo baperesiting dikabelo tsa bone, le go abela botlhe ba ba badilweng ka losika mo go Balefi.
20Mme Hesekia a dira jalo mo lefatsheng lotlhe la Juta; a dira se se molemo le tshiamo le boikanngo fa pele ga Jehofa Modimo wa gagwe. 21Mo tirong nngwe le nngwe e o ne a e simolola mo tirelong ya ntlo ya Modimo, le mo molaong, le mo ditaolong, go batla Modimo wa gagwe, o ne a e dira ka pelo yotlhe ya gagwe, mme a tlhogonolofala.
