Hesekia o baakanyetsa Moletlo wa Tlolaganyo
1Hesekia a roma batho mo go ba Iseraele botlhe le Bajuta, le Baeferaime, le Bamanase, a ba kwalela dikwalo a re, ba tle kwa ntlong ya ga Jehofa kwa Jerusalema, go direla Jehofa, Modimo wa Iseraele tlolaganyo. 2Gonne kgosi e ne e ikgakolotse, le dikgosana tsa yone, le phuthego yotlhe mo Jerusalema, go direla Jehofa Modimo wa Iseraele tlolaganyo ka kgwedi ya bobedi. 3Gonne ba ne ba retelelwa ke go e dira ka lobaka loo, ka baperesiti ba ne ba ise ba iitshepise ba le palo e e lekanyeng, le gone batho ba ne ba ise ba phuthegele kwa Jerusalema. 4Selo seo se ne se siame mo matlhong a kgosi le a phuthego yotlhe. 5Jalo ba tlhoma taolo ya go re go itsisiwe batho mo lefatsheng lotlhe la Iseraele, go tswa Beerešeba go ya fela kwa Dane, gore ba tle go direla Jehofa Modimo wa Iseraele tlolaganyo mo Jerusalema, gonne e sa le bogologolo ba ise ba ke ba e dire ba le bantsintsi ka mokgwa o o ntseng jaaka o o kwadilweng. 6Batsamaisi ba dikwalo ba ya le dikwalo tsa kgosi le tsa dikgosana tsa yone mo lefatsheng lotlhe la Iseraele le Juta, ba bua ka fa taolong ya kgosi ba re: “Lona bana ba Iseraele, bang lo boele mo go Jehofa Modimo wa ga Aberahame, le wa ga Isake, le wa ga Iseraele, gore a tle a boele mo masaleleng a a falotseng mo diatleng tsa dikgosi tsa Asiria. 7Lo se ka lwa nna jaaka borraeno, le jaaka bana ba ga rraa lona, ba ba neng ba leofela Jehofa Modimo wa borraabo, a ba a tla a ba neela go swafadiwa, jaaka lo bona. 8Jaana lo se ka lwa nna thamo di thata, jaaka borraeno ba ne ba ntse; ineeleng mo go Jehofa, lo tsene mo felong ga gagwe ga boitshepo, mo o go itshepisitseng ka bosakhutleng, lo direle Jehofa Modimo wa lona, gore bogale jwa gagwe jo bo tukang bo lo fapoge. 9Gonne fa lo boela kwa go Jehofa, bomonnaa lona le bana ba lona ba tlaa bona boutlwelobotlhoko fa pele ga bone ba ba ba isitseng botshwarong, mme ba tlaa ba ba tla mo fatsheng leno, gonne Jehofa Modimo wa lona o pelotshweu, o kutlwelobotlhoko, ga a ketla a lo thuhulela sefatlhogo fa lo boela mo go ene.”
10Batsamaisi ba dikwalo ba ya le motse le motse mo lefatsheng lotlhe la Eferaime le Manase, go ya fela kwa Sebulone; mme ba ba tshega ka lonyatso, ba ba sotla. 11Le fa go ntse jalo bangwe le bangwe ba Ašere le ba Manase le ba Sebulone ba ikokobetsa, ba tlaa Jerusalema. 12Le mo Juta seatla sa Modimo se ne se le gone go ba naya pelo e le nngwe fela, go dira taolo ya kgosi le ya dikgosana ka lefoko la ga Jehofa.
Moletlo wa Tlolaganyo o a jewa
13Ga phuthegela kwa Jerusalema batho ba le bantsi, ba tla go ja modiro wa senkgwe se se sa bedisiwang ka kgwedi ya bobedi, e le phuthego e kgolo thata. 14Ba nanoga ba tlosa dibeso tse di mo Jerusalema, le dibeso tsotlhe tsa maswalo ba di tlosa, ba di latlhela mo molatswaneng wa Kiterone. 15Foo ba tlhaba tlolaganyo ka letsatsi la 14 la kgwedi ya bobedi; mme baperesiti le Balefi ba tlhajwa ke ditlhong, mme ba iitshepisa, ba lere ditshupelo tse di fisiwang mo ntlong ya ga Jehofa. 16Ba ema mo bonnong jwa bone ka fa thulaganong ya bone, ka fa molaong wa ga Moše monna wa Modimo; baperesiti ba kgatsha madi a ba a amogelang mo diatleng tsa Balefi. 17Gonne go le bantsi mo phuthegong ba ba iseng ba iitshepise; ke gone ka moo Balefi ba ne ba na le tiro ya go tlhaba ditlolaganyo tsa mongwe le mongwe yo o seng boitsheko, go ba itshepisetsa Jehofa. 18Gonne bontsi jwa batho, e bong Baeferaime ba le bantsi, le Bamanase, le Baisakare, le Basebulone, ba ne ba ise ba itshekise, le fa go ntse jalo ba ja tlolaganyo ka fa go sa kwalwang ka gone. Gonne Hesekia o ne a ba rapeletse, a re: “A Jehofa yo o molemo, a itshwarele 19mongwe le mongwe yo o itlhomamisang pelo go batla Modimo, Jehofa Modimo wa borraagwe, le fa a se ka a ntlafadiwa ka fa itshekisong ya felo ga boitshepo.” 20Mme Jehofa a reetsa Hesekia, a fodisa batho. 21Bana ba Iseraele ba ba mo Jerusalema ba dira modiro wa senkgwe se se sa bedisiwang ka malatsi a supa, ka boitumelo jo bogolo; Balefi le baperesiti ba baka Jehofa ka malatsi otlhe, ba opelela Jehofa ka diletso tse di opelelang godimo. 22Mme Hesekia a bua le Balefi botlhe ba ba ditswerere mo tirelong ya ga Jehofa ka go ba gomotsa.
Moletlo wa bobedi wa Tlolaganyo
Jalo ba ja ka lobaka lotlhe lwa modiro lwa malatsi a supa, ba isa ditlhabelo tsa ditshupelo tsa kagiso, ba direla Jehofa Modimo wa borraabo boipolelo. 23Phuthego yotlhe ya gakololana gore go dirwe modiro ka malatsi a mangwe gape a supa; mme ba dira ka malatsi a mangwe a supa ka boitumelo. 24Gonne Hesekia kgosi ya Juta o ne a naya phuthego dikgongwana di le 1 000, le dinku di le 7 000; mme dikgosana tsa naya phuthego dikgongwana di le 1 000, le dinku di le 10 000; mme baperesiti ba le bantsi ba iitshepisa. 25Phuthego yotlhe ya Bajuta e na le baperesiti le Balefi, le phuthego yotlhe e e duleng mo Iseraele, le baeng ba ba tswang lefatsheng la Iseraele, le ba ba agileng mo Juta, ba itumela. 26Jalo ga nna boitumelo jo bogolo mo Jerusalema, gonne e sa le ka lobaka lwa ga Solomone morwa Dafite kgosi ya Iseraele, go ne go ise go ko go nne mo go ntseng jalo mo Jerusalema. 27Foo baperesiti le Balefi ba nanoga ba segofatsa batho, mme lentswe la bone la utlwiwa, le morapelo wa bone wa tlhatlogela kwa bonnong jo bo boitshepo jwa one, e bong kwa legodimong.
