Siraka 31

₁Ku va ni nkelunkelu hikwalaho ka rifuwo swa ondzisa,

ku kanakana hikwalaho ka rona swi hita vurhongo.

₂Nkelunkelu wu hangalasa vurhongo

tanihi vuvabyi byo chavisa.

₃N'wankumi wa tikarhata ku hlengeleta xuma xo tala,

kutani loko a wisa, ú tshama emafurheni.

₄Xisiwana xi tirha swinene minkarhi hinkwayo kambe a xi hlengeleti nchumu,

kutani loko ku fika nkarhi wo wisa, xi tikuma xi ri ni vusweti.

₅Loyi a rhandzaka nsuku, a nga ka a nga vi na vululami,

ni loyi a tihlengeletelaka mali, yi ta n'wi hambukisa.

₆Vanhu lavo tala va onhakile hi ku rhandza nsuku,

va tikuma va ri ekhombyeni.

₇Mali i xirimbana eka lava va yi rhandzaka,

kutani yi phasa xiphunta xin'wana ni xin'wana.

₈Ku katekile n'wankumi loyi a nga riki na xidyoho,

loyi a nga tihlengeleteriki nsuku.

₉Xana i mani mufuwi wo tano? Hi ta n'wi nkhensa,

hikuva ú endlile mahlori exikarhi ka varikwavo.

₁₀Munhu loyi a ringiweke hi mali, kutani a kumeka a ri hava xisolo,

a a tinyungubyise hikwalaho ka swona.

Xana i mani loyi a nga ni matimba ya ku tlula nawu, kambe a nga wu tluli,

ni matimba ya ku dyoha, kambe a nga dyohi ke?

₁₁Munhu wo tano ú faneriwa hi rifuwo ra yena,

kutani vanhu hinkwavo va ta dzunisa ku hanana ka yena.

₁₂Loko u tshamile etafuleni ra nkulukumba,

u nga vi ni makolo,

u nga vuli u ku: “Swakudya leswi swi tele ngopfu!”

₁₃Tsundzuka leswaku ku navela ngopfu swakudya hi mahlo i xidyoho.

Ku hava swirho swin'wana leswi tlulaka mahlo hi tlhelo ra ku navela.

Hikokwalaho mihloti yi tshona eka mahlo ya vanhu hinkwavo.

₁₄U nga vungavungi hinkwaswo leswi u swi vonaka etafuleni,

naswona u nga susumeti vanhu van'wana ku fikelela swakudya.

₁₅Ehleketa vanhu lava u nga na vona etafuleni,

kutani u va fundzha kukota loko u tifundzha,

₁₆Dyana swakudya leswi u phameriweke swona tanihi munhu wo xiximeka,

u nga ncakunhi hi makolo, hikuva u nga ta vengiwa.

₁₇U va wo sungula ku tshika ku dya, hikuva hi wona mukhuva lowunene,

u nga xurhi ku tlula mpimo, hikuva u nga ta nyenyetsa van'wana.

₁₈Loko u tshama etafuleni ni vanhu lavo tala,

u nga rhangeleli ku tiphamela.

₁₉Swakudya leswitsongo swi ringene eka munhu wa mahanyelo lamanene!

Ú etlela a hefumula kahle.

₂₀Loyi a dyaka hi ku ringana, ú etlela hi ku rhula,

kutani a vindzuka a titwa a tiyile.

Munhu wa makolo ú twa ku vava endzeni,

a lava ku hlanta, ú karhatiwa hi nkelunkelu.

₂₁Loko u xurhile ku tlula mpimo, tshika ku dya,

kutani u ta vevukeriwa.

₂₂Ndzi yingise n'wananga, u nga ndzi aleri,

eku heteleleni u ta nkhensa marito ya mina.

Chivirika emintirhweni ya wena hinkwayo,

kutani mavabyi ma nga ka ma nga ku khomi.

₂₃Vanhu va dzunisa loyi a hananaka hi swakudya,

kutani va veka vumbhoni byo tshembeka ehenhla ka muhetiseki loyi.

₂₄Kasi vaaki hinkwavo va muti va vilela hi loyi a tsonanaka swakudya,

kutani va veka vumbhoni byo tiya ehenhla ka mutsonani loyi.

₂₅U nga tiendli nghwazi ya vhinyo,

hikuva vhinyo yi lovisile vanhu lavo tala.

₂₆Tanihi nsimbhi leyi kambiwaka hi ku hisiwa hi ndzilo ni ku petiwa ematini,

munhu wa manyunyu ú komba xivumbeko xa yena loko a phikisana ni van'wana a pyopyiwile.

₂₇Ku nwa vhinyonyana swi antswisa vutomi.

Xana munhu loyi a nga nwiki vhinyo ú ta hanya njhani?

Vhinyo yi endleriwele ku tsakisa vanhu.

₂₈Loko munhu a nwa vhinyonyana hi nkarhi wa kona,

ú tsakisa mbilu ni ku rhulisa moya.

₂₉Kasi ku nwa vhinyo ku tlula mpimo swi vavisa moya ni ku pandzisa nhloko,

kutani swi khomisa vanhu tingana ni ku va vangela nhlomulo.

₃₀Xidakwa xa xiphukuphuku xi hatla ku kariha, kutani xa tivavisa.

Vhinyo yi xi heta matimba, kutani xi biwa.

₃₁U nga tshinyi munhukuloni loko mi ri karhi mi n'wa vhinyo swin'we enkhubyeni,

naswona u nga n'wi sandzi loko a ri karhi a titsakerile.

Enkarhini lowu u nga n'wi soli,

u nga n'wi vavisi hi ku n'wi kombela mali leyi u n'wi lombiseke yona.