Siraka 32

₁Loko u hlawuriwile ku va mufambisi wa nkhuvo, u nga tikurisi;

u va munhu wo fana ni van'wana lava nga kona enkhubyeni,

va hlayise ni ku va tsakisa, kutani u tshama hansi.

₂Loko u hetile ku endla tifanelo ta wena, tshama hansi, u tsaka na vona,

va ta ku fundzha hikwalaho ka ntirho wa wena lowu hetisekeke.

₃Vulavula wena u nga nkulu, hikuva swi ku fanerile,

kambe vulavula hi vutivi lebyi fanelaka, kutani u nga kavanyeti ku yimbelela.

₄Loko ku ri nkarhi wa ku hungata, u nga vulavuli,

u nga kombisi vutlhari bya wena hi nkarhi wo ka wu nga ri wona.

₅Ku chaya swichaya-chayani ni ku yimbelela enkhubyeni wa vhinyo,

swi fana ni “rubi” leyi nameketiweke exikarhi ka nsuku.

₆Ku yimbelela ko saseka ni vhinyo yo nandziha

swi fana ni “emeralda” leyi nameketiweke exikarhi ka nsuku.

₇Vulavula wena jaha, loko swi ku fanerile,

kambe vulavula kambirhi ntsena loko va ku kombela.

₈Vulavula hi ku komisa, vulavula leswo tala hi marito ma nga ri mangani.

Fana ni loyi a nga ni vutivi, kambe a nga vulavuriki ngopfu.

₉Exikarhi ka lavakulu u nga tikombi onge u un'wana wa vona,

u nga va karhati hi ku va vutisa leswo tala.

₁₀Tanihi rihati ri nga si duma,

munhu wo tikhoma u rhangeriwa hi ndhuma ya yena.

₁₁Suka enkhubyeni hi nkarhi, u nga vi wo hetelela ku famba.

Hatlisa ku muka, u nga jika-jiki.

₁₂Ekaya titsakise hi leswi u swi lavaka,

kambe u nga tshuki u dyoha hi ku tibumabuma.

₁₃Kutani dzunisa Mutumbuluxi wa wena

loyi a ku tsakiseke hi tinyiko leto tala.

₁₄Loyi a chavaka Xikwembu ú amukela ku layiwa hi xona,

kutani xi katekisa loyi a vindzukaka ku xi khongela.

₁₅Loyi a lavaka nawu wa Xikwembu, ú ta wu twisisa,

kambe mukanganyisi wu ta n'wi wisa.

₁₆Loyi a chavaka Xikwembu ú tiva ku rhandza ka xona,

mintirho leyinene ya yena yi vangama tanihi ku vonakala.

₁₇Munhu wo homboloka ú bakanya ku layiwa,

kutani a tihlamusela nawu wa Xikwembu hi ku rhandza ka yena.

₁₈Munhu wo tlhariha ú xiyaxiya miehleketo hinkwayo,

kambe munhu wa manyunyu a nga chavi nchumu.

₁₉U nga endli xilo u nga xi kambisisanga,

kutani loko u xi endlile, u nga tisoli.

₂₀U nga endli leswi nga ni khombo,

xihoxo u nga xi endli kambirhi.

₂₁U nga titshembi ku tlula mpimo loko swi ku fambela kahle,

₂₂xiyaxiya laha u fambaka kona minkarhi hinkwayo.

₂₃Tivonele eka hinkwaswo leswi u swi endlaka,

hikuva ku endla sweswo swi fambelana ni milawu ya Xikwembu.

₂₄Loyi a pfumelaka eka nawu wa Xikwembu, ú hlayisa swileriso swa xona,

ni loyi a tshembaka Xikwembu, a nga ka a nga lahlekeriwi.