Pisalema ya 138

₁We HOSI, ndza ku tlangela hi mbilu ya mina hinkwayo,

emahlweni ka swivumbiwa swa le tilweni.

₂Ndzi nkhinsama emahlweni ka Tempele ya wena leyo hlawuleka,

ndzi ri karhi ndzi tlangela vito ra wena, hikuva u ni rirhandzu, wa tshembeka;

leswi u swi tirheke swi tlula hinkwaswo

leswi a hi swi languterile eka wena.

₃Siku leri ndzi huweleleke eka wena, u ndzi hlamurile,

u ndzi pfunile ndzi ko ndzi tiya swinene.

₄We HOSI, vafumi hinkwavo va misava a va ku tlangele,

hikuva va twile leswi u swi vuleke.

₅A va dzunise matirhele ya wena hi risimu leri nge:

“Ku dzuneka ka HOSI Xikwembu ku kurile ngopfu!

₆Hambileswi xi fumaka hinkwaswo, xi anakanya lava titsongahataka,

kambe lava tikurisaka xi va vona va ha ri kule.”

₇Loko ndzi tikuma ndzi rhendzeriwe hi maxangu,

wa ndzi biyelela we HOSI;

ni loko valala va ndzi karihela,

voko ra wena ra ndzi sirhelela ri ndzi lamulela.

₈We HOSI, u ta hetisa makungu ya wena lamanene ehenhla ka mina;

rirhandzu ra wena a ri na ku hela,

hikokwalaho ntirho lowu u wu sunguleke, u nga wu tshiki empfhukeni!