Pisalema ya 137

₁Etibuweni ta milambu ya le Babilona,

a hi tshama hi ri karhi hi rila,

loko hi tsundzuka muti wa Siyoni.

₂A hi hayekile tiharipa ta hina

emarhavini ya mirhi ya minengenedzi.

₃Etindhawini teto, lava va hi yiseke evukhumbini,

vona vaxanisi va hina,

a va lava leswaku hi va tsakisa hi tinsimu,

va hi lerisa va ku: “Yimbelelani, mi hi chayela rin'wana ra tinsimu ta le Siyoni!”

₄Xana hi nga yimbelerisa ku yini tinsimu ta HOSI,

leswi hi nga tikweni ra van'wana vanhu xana?

₅We Yerusalema, loko ndzo tshuka ndzi ku rivarile,

voko ra mina ra xinene a ri khwanyale!

₆Loko ndzi nga ku tsundzuki we Yerusalema,

ni loko ndzi nga ku tsakeli ku tlula hinkwaswo,

swi nga antswa ndzi hundzuka mbheveve!

₇We HOSI, u nga tshuki u rivala leswi vanhu va le Edomu va swi vuleke,

siku muti wa Yerusalema wu hlaseriweke.

Va huwelerile va ku: “Fayani! Fayani muti lowu,

mi faya ni masungulo ya wona!”

₈Na wena muti wa Babilona, u le kusuhi ni ku hlaseriwa.

A ku nkhensiwe loyi a nga ta rihisela eka wena,

a ku tlherisela leswo biha leswi u nga hi endla swona.

₉A ku nkhensiwe loyi a nga ta khoma swihlangi swa wena,

a swi phyandlasela emaribyeni!