Tinhlayo 34

₁HOSI Xikwembu xi ku ka Muxe: ₂“Byela Vaisraele leswaku ndzi ri: Loko mi nghenile etikweni ra Kanana, ri nga tiko leri mi nga ta nyikiwa rona hinkwaro ka rona, ri va ndzhaka ya n'wina, mindzilekana ya rona yi ta va leyi: ₃Hi tlhelo ra dzonga ri ta sukela emananga ya Sini, ri lulama ni tiko ra Edomu, kutani ndzilekana wa rona hi tlhelo leri ra dzonga wu ta sukela laha Lwandle-ra-ku-fa ri helelaka kona evuxeni. ₄Ndzilekana lowu wu ta jika wu ya hundza hi le dzongeni ra xiphandze xa Akrabimi, wu tsemakanya wu kongoma eSini, wu ya fika edzongeni ra Kadexe-Bariniya, wu hundza hi le Hasari-Adara, wu ya fika le Asimoni. ₅Kutani wu jika wu lulama ni ndzilekana wa Egipta, wu ya helela eLwandle ra Mediteraniya.

₆“Hi tlhelo ra vupeladyambu, ndzilekana wa tiko ra n'wina wu ta lulama ni Lwandle ra Mediteraniya. Lwandle leri hi wona ndzilekana wa n'wina evupeladyambu.

₇“Ndzilekana wa tiko ra n'wina en'walungwini, mi ta wu ba wu sukela eLwandle ra Mediteraniya, wu ya fika entshaveni ya Hori; ₈ku suka entshaveni ya Hori, mi ta wu ba wu kongoma exiphandzeni xa Hamata, wu hundza wu ya fika eSedada. ₉Kutani wu ta famba wu ya fika eZifironi, wu ya helela eHasari-Enana. Lowu wu ta va ndzilekana wa tiko ra n'wina en'walungwini.

₁₀“Ndzilekana wa tiko ra n'wina evuxeni, mi ta wu ba wu sukela eHasari-Enana, wu kongoma eXefamu. ₁₁Kutani ku suka eXefamu, wu ta rhelela wu ya hundza hi le Ribila, evuxeni bya Ayini, wu kongoma switsunga leswi nga evuxeni bya Lwandle ra Galeliya. ₁₂Ndzilekana lowu wu ta rhelela wu lulama ni nambu wa Yordani, wu ya helela eLwandle-ra-ku-fa.

“Leyi hi yona mindzilekana hinkwayo ya tiko leri ri nga ta va ra n'wina.”

₁₃Muxe a byela Vaisraele a ku: “Leri hi rona tiko leri mi nga ta avelana rona hi vuhlolotwana, ri nga tiko leri HOSI Xikwembu xi leriseke leswaku ri nyikiwa tinyimba ta 9, ni hafu ya nyimba yin'wana. ₁₄Loko va ri va mindyangu ya nyimba ya ka Rhuveni, ni va mindyangu ya nyimba ya ka Gadi ni hafu ya nyimba ya ka Manase, ndzhaka ya vona va yi kumile; ₁₅va tinyimba leti timbirhi na hafu, va kumile ndzhaka ya vona entsungeni lowu wa nambu wa Yordani, ku langutana ni muti wa Yeriko, hi tlhelo ra le vuxeni.”

₁₆HOSI Xikwembu xi ku ka Muxe: ₁₇“Vavanuna lava nga ta phakela Vaisraele tiko ra Kanana, i muprista Eliyazara, na Yoxuwa n'wana Nuni. ₁₈Enyimbeni yin'wana ni yin'wana, mi ta teka nkulukumba un'we wo pfuneta entirhweni lowu wa ku phakela tiko. ₁₉Mavito ya vona hi lawa: Eka nyimba ya Yuda i Kalebe n'wana Yefune. ₂₀Eka nyimba ya va ka Simiyoni i Xemuwele n'wana Amihudi. ₂₁Eka nyimba ya Benjamini i Elidada n'wana Kisiloni. ₂₂Eka nyimba ya va ka Dani, nkulukumba wa kona i Buki n'wana Yogili. ₂₃Eka nyimba ya va ka Manase n'wana Yosefa, nkulukumba wa kona i Haniele n'wana Efodi. ₂₄Eka nyimba ya va ka Efrayimi n'wana Yosefa, nkulukumba wa kona i Kemuwele n'wana Xifitani. ₂₅Eka nyimba ya va ka Zebuloni, nkulukumba wa kona i Elisafani n'wana Parinaka. ₂₆Eka nyimba ya va ka Isakara, nkulukumba wa kona i Palatiele n'wana Azana. ₂₇Eka nyimba ya va ka Asere, nkulukumba wa kona i Ahihudu n'wana Xelomi. ₂₈Eka nyimba ya va ka Neftali, nkulukumba wa kona i Padahele n'wana Amihudi.” ₂₉Lava hi vona vavanuna lava HOSI Xikwembu xi va leriseke ku phakela Vaisraele tindhawu ta vona etikweni ra Kanana.