Tinhlayo 33

₁Leti i tindhawu leti Vaisraele va fambeke va gova eka tona, loko va humile etikweni ra Egipta ni mavandla ya vona, va rhangeriwile hi Muxe na Aroni. ₂Hi ku lerisiwa hi HOSI Xikwembu, Muxe a a tsala mavito ya tindhawu leti a va suka eka tona, loko va ya gova kun'wana. ₃Vaisraele va sukile eRamsese hi siku ra vu-15 ra n'hweti yo sungula, ri nga leri tlhandlamaka siku ra Nkhuvo wa Paseka; va humile etikweni ra Egipta va ntshunxekile swinene, Vaegipta hinkwavo va ri karhi va va vona. ₄Loko Vaisraele va karhi va huma, Vaegipta a va ri eku lahleni ka vana va mativula lava HOSI Xikwembu xi va heriseke exikarhi ka vona, loko xi ri karhi xi avanyisa swikwembu swa vona.

₅Loko Vaisraele va suka eRamsese, va yile va ya gova eSukoti. ₆Kutani va suka eSukoti, va ya gova le Etamu, laha mananga ma sungulaka kona. ₇Va suka le Etamu, va tlhelela ndzhaku va kongoma muti wa Pi-Hahiroto lowu nga evuxeni bya Baala-Sefoni, kutani va ya gova kusuhi na Migidolo. ₈Va suka ePi-Hahiroto, kutani va tsemakanya Lwandle-ro-Tshwuka, va ya nghena emananga ya Etamu, va famba masiku manharhu emananga lawa, va kondza va ya gova eMara. ₉Va suka eMara, va ya fika le Elimi, laha a ku ri ni swihlovo swa 12 ni mirhi ya 70 ya mincindzu, va gova kona. ₁₀Va suka le Elimi, va ya gova kusuhi ni Lwandle-ro-Tshwuka. ₁₁Va suka eLwandle-ro-Tshwuka, va ya gova emananga ya Sina. ₁₂Va suka emananga ya Sina, va ya gova eDofika. ₁₃Va suka eDofika, va ya gova le Aluxi. ₁₄Va suka le Aluxi, va ya gova eRefidimi, laha vanhu va nga pfumala mati yo nwa. ₁₅Va suka eRefidimi, va ya gova emananga ya Sinayi. ₁₆Va suka emananga ya Sinayi, va ya gova eKibroti-Hatavha. ₁₇Va suka eKibroti-Hatavha va ya gova eHaseroti. ₁₈Va suka eHaseroti, va ya gova eRitima. ₁₉Va suka eRitima, va ya gova eRimoni-Perese; ₂₀Va suka eRimoni-Perese, va ya gova eLibina. ₂₁Va suka eLibina, va ya gova eRisa. ₂₂Va suka eRisa, va ya gova eKehelata. ₂₃Va suka eKehelata, va ya gova entshaveni ya Xefere. ₂₄Va suka entshaveni ya Xefere, va ya gova eHarada. ₂₅Va suka eHarada, va ya gova eMakeloto. ₂₆Va suka eMakeloto, va ya gova eTahata. ₂₇Va suka eTahata, va ya gova eTera. ₂₈Va suka eTera, va ya gova eMiteka. ₂₉Va suka eMiteka, va ya gova eHaximona. ₃₀Va suka eHaximona, va ya gova eMaseroto. ₃₁Va suka eMaseroto, va ya gova eBene-Yakani. ₃₂Va suka eBene-Yakani, va ya gova eHori-Hagidigada. ₃₃Va suka eHori-Hagidigada, va ya gova eYotibata. ₃₄Va suka eYotibata, va ya gova le Abrona. ₃₅Va suka le Abrona, va ya gova le Esiyoni-Gebere. ₃₆Va suka le Esiyoni-Gebere, va ya gova eKadexe, emananga ya Sini. ₃₇Va suka eKadexe, va ya gova entshaveni ya Hori, endzilekaneni wa tiko ra Edomu.

₃₈Hi siku ro sungula ra n'hweti ya vunharhu eka lembe ra vu-40 endzhaku ka loko Vaisraele va humile etikweni ra Egipta, muprista Aroni a tlhandlukela entshaveni ya Hori, hilaha HOSI Xikwembu xi leriseke hakona, a fika a fela kona. ₃₉Loko Aroni a fa kwale ntshaveni ya Hori, a a ri ni malembe ya 123.

₄₀Mukanana un'wana loyi a a ri hosi ya le Aradi, loyi a a tshama hi tlhelo ra le dzongeni ra tiko ra Kanana, ú swi twile leswaku Vaisraele va karhi va ta.

₄₁Vaisraele va suka entshaveni ya Hori, va ya gova eSalimona. ₄₂Va suka eSalimona, va ya gova ePunono. ₄₃Va suka ePunono, va ya gova le Oboto. ₄₄Va suka le Oboto, va ya gova le Iye-Abarimi, etikweni ra Mowabu. ₄₅Kutani va suka le Iyimi, va ya gova eDiboni-Gadi. ₄₆Va suka eDiboni-Gadi, va ya gova le Alimoni-Diblatayimi. ₄₇Va suka le Alimoni-Diblatayimi, va ya gova entshaveni ya Abarimi, kusuhi na Nebo. ₄₈Va suka entshaveni ya Abarimi, va ya gova erivaleni ra tiko ra Mowabu, kusuhi ni nambu wa Yordani, ku langutana ni muti wa Yeriko. ₄₉Va govile kusuhi ni nambu wa Yordani ku sukela eBeta-Yeximoto, ku ya fika le Avele-Xitimi kwale rivaleni ra tiko ra Mowabu.

₅₀Loko va ri erivaleni ra tiko ra Mowabu, kusuhi ni nambu wa Yordani ku langutana na Yeriko, HOSI Xikwembu xi ku ka Muxe: ₅₁“Byela Vaisraele leswaku ndzi ri: ‘Loko mi ta va mi tsemakanyile nambu wa Yordani mi nghena etikweni ra Kanana, ₅₂mi fanele ku hlongola vaaki hinkwavo va tiko leri, mi fayetela ni maribye hinkwawo ya vukhongeri bya vona bya hava, mi hindzimuxela ni swifaniso hinkwaswo swa swikwembu leswi va swi vumbeke, mi herisa ni switsunga swa vona hinkwaswo leswo hlawuleka; ₅₃mi ta teka tiko ra vona mi tshama eka rona, hikuva tiko leri ndzi mi nyikile rona leswaku ri va ra n'wina. ₅₄Mi ta avelana tiko hi ku tirhisa vuhlolotwana. Mi ta nyikiwa ndzhaka ya n'wina hi ku ya hi ntalo wa vanhu va nyimba yin'wana ni yin'wana: Nyimba leyi nga ni vanhu lavo tala, yi ta nyikiwa ndhawu leyikulu, kasi nyimba leyi nga ni vanhu vatsongo yi ta nyikiwa ndhawu leyitsongo. Munhu un'wana ni un'wana ú ta kuma leswi vuhlolotwana byi nga ta komba swona, swi va swa yena. ₅₅Loko mo ka mi nga hlongoli hinkwavo vaaki va tiko leri, lava mi nga ta va siya va ta fana ni swilavi ematihlweni ya n'wina ni switlhavi emirini wa n'wina, va mi karhata etikweni reri mi nga ta tshama eka rona, ₅₆kutani leswi a ndzi ehleketile ku swi endla eka vona, ndzi ta swi endla eka n'wina.’ ”