Papila ra Yeremiya 1

₁Leri i tsalwa ra papila leri Yeremiya a nga ri rhumela eka vanhu lava a va fanele ku khomiwa va yisiwa evukhumbini eBabilona hi hosi ya Vababilona. Hi papila leri Yeremiya a a tivisa Vaisraele leswi Xikwembu xi n'wi leriseke swona, a ku:

₂“Mi ta khomiwa hi Nebukadnetsara hosi ya Vababilona, mi yisiwa emutini wa Babilona, hikwalaho ka swidyoho leswi mi swi endleke emahlweni ka mina Xikwembu. ₃Mi ta tshama kwale Babilona nkarhi wo leha; malembe ya kona ma ta tlula madzana mambirhi. Endzhaku ka sweswo, ndzi ta mi humesa kona ndzi mi vuyisa hi ku rhula.

₄“Emutini wa Babilona mi ta vona swikwembu swo endliwa hi silivhere ni nsuku ni timhandze, leswi vamatiko va fambaka va swi rhwele emakatleni, va ri karhi va swi chava swinene. ₅Loko mi ri n'wina, tivoneleni leswaku mi nga tshuki mi kotisa vamatiko volavo, mi nga chavi nikutsongo swikwembu leswi, loko mi vona mintshungu yi longoloka ku ya swi gandzela. ₆Kambe tibyeleni etimbilwini ta n'wina mi ku: ‘Hi wena ntsena we HOSI, loyi hi faneleke ku n'wi gandzela.’ ₇Hikuva ntsumi ya mina yi na n'wina ku mi hlayisa.

₈“Tindzimi ta swikwembu leswi ti vatliwile hi vanhu va vutshila, naswona swi namekiwile nsuku ni silivhere, kambe i swa hava, a swi koti ku vulavula. ₉Vanhu va endlela swikwembu swa vona tiharhi ta nsuku, tanihi leswi va nga swi endlelaka wanhwana wo rhandza ku tibombisa. ₁₀Kasi nkarhi wun'wana vaprista va yiva nsuku ni silivhere eka swikwembu leswi, va titirhisela swona. ₁₁Va pfanga ni ku nyika swilo leswi eka tinghwavava endlwini ya tona. Swikwembu leswi swo vatliwa hi silivhere ni nsuku ni timhandze, va swi ambexa tinguvu wonge swo va vanhu. ₁₂Kambe swa tsandzeka ku tiponisa eka nkurhe ni ku kenyiwa. Hambiloko swi ambexiwa tinguvu ta vuhosi, ₁₃swikandza swa swona swo suriwa hikwalaho ka ntshuri wa laha tempeleni. ₁₄Tanihi mufumi wa tiko, swikwembu swa hava swi tamela nhonga ya vuhosi, kambe swi hava matimba yo herisa loyi a swi dyohelaka. ₁₅Swi ni banga evokweni ra xinene ra swona, swi tamela ni xihloka, kambe swa tsandzeka ku tiponisa enyimpini ni le ka swigevenga. ₁₆Kutani swi le rivaleni leswaku a hi swa ntiyiso, hikokwalaho mi nga swi chavi.

₁₇“Swikwembu leswi swa vamatiko leswi nga vekiwa etitempeleni, swi fana ni xibye lexi fayekeke lexi nga pfuniki nchumu. Mahlo ya swona ya tala hi ritshuri leri vanhu va ri vangaka loko va ri karhi va nghena etitempeleni ta swona. ₁₈Tanihi leswi tinyangwa ti pfariwaka swinene laha ku nga ni loyi a avanyiseriweke rifu hikwalaho ko dyohela hosi, vaprista va sirhelela titempele ta vona hi timbanti, ni swilotlelo, ni tinsimbhi, leswaku swigevenga swi nga tshuki swi nghena ku yiva kona. ₁₉Va lumekela swikwembu leswi timboni to tlula leti vona vini va tilumekelaka tona, hambileswi swikwembu swa kona swi nga voniki na rin'we ra timboni leti. ₂₀Swikwembu swa hava swi fana ni ntsandza wa tempele, kambe vanhu va ri timbilu ta swona ti n'okile loko swi dyiwa hi muhlwa kun'we ni tinguvu ta swona. A swo xiyi nchumu, ₂₁hambiloko swikandza swa swona swi ntimisiwa hi musi lowu nge tempeleni. ₂₂Vamangadyana, ni tindzewulani, ni tinyanyana tin'wana swi tshama emirini ni le tinhlokweni ta swona; swimanga na swona swi endla tano. ₂₃Hikwalaho ka leswi, mi nga swi tiva leswaku a hi swa ntiyiso, mi nga swi chavi.

₂₄“Loko wu ri nsuku lowu swi sasekisiweke ha wona, wu nga ka wu nga vangami handle ka loko un'wana a nga lo phumunha nkurhe, hikuva a swi twanga nchumu ni loko swa ha vatliwa. ₂₅Swi xaviwa hi mali yo tala, kambe ku hava vutomi eka swona. ₂₆Hi ku pfumala milenge, swo rhwariwa hi vanhu emakatleni, hikokwalaho swi tikomba swi ri swa hava. ₂₇Lava va swi gandzelaka va ni tingana loko xin'wana xa swona lexi va xi yimiseke, xo tshuka xi wa. Loko munhu a yimisa xin'wana xa swikwembu leswi, a xi koti ku tifambisa; ni loko xi voyamile, a xi koti ku tiololoxa. Hambiswiritano, tinyiko ti fumbiwa emahlweni ka swona tanihi loko ti fumberiwa munhu la feke. ₂₈Vaprista va xavisa timhamba leti vanhu va ti humeselaka swikwembu leswi, va titirhisela mali ya kona. Swi tano ni vasati va vona, va hlayisa swin'wana swa leswi tlhaviweke hi ku swi omisa hi munyu, kambe a va nyiki nchumu eka swisiwana ni lava hluphekeke. ₂₉Magandzelo ya swona ma khomiwa hi vavasati lava nge masikwini ya vona ya n'hweti kumbe lava ha ku tswalaka. Timhaka leti ti mi komba leswaku a hi swa ntiyiso; mi nga swi chavi!

₃₀“Hikwalaho ka yini swi vuriwa swikwembu? Vavasati va swekela swikwembu swo endliwa hi silivhere ni nsuku ni timhandze, va swi phamela. ₃₁Etitempeleni ta swona, vaprista va tshama va ambale tinguvu leto hlakala, misisi ni malepfu ya vona swi byevuriwile, va nga ambalanga nchumu etinhlokweni ta vona. ₃₂Va hokoloka ni ku huwelela emahlweni ka swikwembu leswi kukota leswi endliwaka hi van'wana loko ku lahliwa mufi. ₃₃Kambe vaprista lava va teka swin'wana swa swiambalo swa swikwembu leswi, va ambexa ha swona vasati va vona ni vana. ₃₄Hambiloko munhu a dyohela swikwembu leswi kumbe ku swi endlela leswinene, a swi koti ku n'wi hakela hilaha swi faneleke hakona. Swi tsandzeka ku veka hosi hambi ku ri ku yi susa exitulwini. ₃₅Naswona swi tsandzeka ku nyika munhu rifuwo kumbe mali. Loko munhu a tiboha eka swona hi ku hlambanya, a va a nga endli hilaha a tiboheke hakona, swona a swi koti ku landzelerisa. ₃₆A swi koti ku ponisa munhu eku feni, kumbe ku lamulela lava tsaneke eka vanhu va matimba. ₃₇Swikwembu leswi swi tsandzeka ku pfula mahlo ya lava nga voniki; a swi koti ni ku pfuna lava va nga ku xanisekeni. ₃₈Swi tsandzeka ku twela noni vusiwana, kumbe ku endlela swisiwana leswinene. ₃₉Swilo leswi swo vatliwa hi timhandze no namekiwa nsuku ni silivhere, swi fana ni maribye lama humaka entshaveni, kutani lava swi tirhelaka va ta khomisiwa tingana. ₄₀Hikwalaho ka yini munhu ú fanele ku ehleketa leswaku i swikwembu, kumbe ku swi vula swikwembu ke?

“Vakalediya na vona va hlekula swikwembu leswi. ₄₁Hakunene, loko va vona mbheveve, a nga munhu loyi a nga kotiki ku vulavula, va n'wi yisa etempeleni, va ya kombela Bele, wonge hiloko Bele a a ri ni ku twisisa, leswaku a n'wi hanyisa a vulavula. ₄₂Kambe vona hi voxe a va byi voni vuphukuphuku lebyi, a va fularheli swikwembu leswi, hikuva va hava miehleketo. ₄₃Ku ni vavasati lava tshamaka emitsendzeleni va titsondzele hi tintambu, va ri karhi va hisa mirhi ya risuna. Kutani loko un'wana wa vona a tshuka a hlawuriwa hi wanuna ku ya etlela na yena, ú ta vuya a ta hlekula wansati-kulobye la nga vangiki ni nkokela tanihi yena, loyi ntambhu ya yena yi nga tlomuriwangiki. ₄₄Hinkwaswo leswi endleriwaka swikwembu leswi, a hi swa ntiyiso. Kutani hikwalaho ka yini munhu ú fanele ku ehleketa leswaku i swikwembu kumbe ku swi vula swikwembu ke?

₄₅“Swikwembu leswi swi endliwile hi vavatli ni vafuri va nsuku; hikokwalaho swi nga ka swi nga vi nchumu wun'wana handle ka ku va leswi vanhu va lavaka leswaku swi va swona. ₄₆Swi le rivaleni leswaku hambi va ri vaendli va swona, a va hanyi nkarhi wo leha, kutani swi nga endlisa ku yini leswaku leswi va swi endleke swi va swikwembu swa ntiyiso xana? ₄₇Vanhu lava va siyele lava taka endzhaku ka vona evuxisi ni ku soriwa. ₄₈Hikuva loko nyimpi kumbe makhombo swi va fikela, vaprista va kungela laha va nga yaka va ya tumbela kona kun'we ni swikwembu swa vona. ₄₉Xana munhu a nga tsandzekisa ku yini ku vona leswaku swikwembu leswi a hi swa ntiyiso, hikuva swa tsandzeka ku tiponisa hi nkarhi wa tinyimpi ni makhombo?

₅₀“Tanihi leswi swi nga vatliwa hi timhandze no namekiwa nsuku ni silivhere, swi ta tiveka siku rin'wana leswaku i swa hava. ₅₁Swi ta tiveka ematikweni hinkwawo ni le tihosini hinkwato leswaku a hi swikwembu swa ntiyiso, kambe i mintirho ya mavoko ya vanhu, ni leswaku ku hava matimba ya Xikwembu eka swona. ₅₂Kutani i mani loyi a nga tsandzekaka ku tiva leswaku a hi swikwembu swa ntiyiso xana?

₅₃“Swikwembu leswi swa tsandzeka ku veka hosi etikweni, hambi ku ri ku nyika vanhu empfula. ₅₄Swi tsandziwa hi timhaka ta swona, hambi ku ponisa loyi a hoxeriweke, hikuva swi hava matimba. Swo fana ni mawukuwuku lama hahaka empfhukeni. ₅₅Loko tempele yi lumarha, vaprista va tsutsuma va tiponisa, va sukela swikwembu leswi swo vatliwa no namekiwa nsuku ni silivhere, swi sala swi tshwa tanihi mintsandza. ₅₆Handle ka sweswo, swa tsandzeka ku tilwela eka tihosi kumbe eka valala. Kutani hikwalaho ka yini munhu a fanele ku pfumela kumbe ku anakanya leswaku i swikwembu swa ntiyiso ke?

₅₇“Swikwembu leswi swo vatliwa hi timhandze no namekiwa nsuku ni silivhere, swi tsandzeka ku tiponisa eka vayivi ni swigevenga. ₅₈Vavanuna va matimba va nga swi yivela nsuku ni silivhere, va swi tekela ni tinguvu ta swona, va famba na tona; kambe swikwembu leswi swi tsandzeka ku tilwela. ₅₉Swa antswa ku va hosi leyi kombaka vunhenha bya yona kumbe xibya lexi pfunaka n'wini wa xona, ku ri ni ku va swikwembu swa hava; phuphu ya timhandze leyi nga endlwini ya hosi na yona yi tlula swikwembu leswi swa hava.

₆₀“Dyambu, ni n'weti, ni tinyeleti swi nyikiwe ntirho wo vangama, kutani swi endla tano. ₆₁Rihati na rona loko ri hatima ri voniwa hinkwako; na wona moya wu hunga hinkwako. ₆₂Loko Xikwembu xi lerisa mapapa ku funengeta misava hinkwayo, ma yingisa. ₆₃Ndzilo lowu rhumiweke wu xika hi le matilweni leswaku wu hisa tintshava ni swihlahla, na wona wu endla leswi wu lerisiweke swona. Kambe swikwembu swa hava swi nga ka swi nga ringanisiwi ni swilo leswi hi ku saseka ni matimba. ₆₄Hikokwalaho munhu a nga fanelanga ku ehleketa leswaku i swikwembu swa ntiyiso kumbe ku swi vula swikwembu swa ntiyiso, hikuva swa tsandzeka ku tsema mhaka kumbe ku endlela vanhu leswinene. ₆₅Hilaha mi swi tivaka hakona leswaku a hi swikwembu swa ntiyiso, mi nga swi chavi.

₆₆“Swikwembu swa hava a swi koti ku rhukana kumbe ku katekisa tihosi. ₆₇Swi tsandzeka ku endlela vanhu mahlori ematilweni, kumbe ku vangama tanihi dyambu ni ku voninga tanihi n'weti. ₆₈Swiharhi swi tlula swikwembu leswi, hikuva swi nga baleka ku ya tumbela ni ku tiponisa. ₆₉Hikokwalaho, ku hava vumbhoni ni byitsongo bya leswaku i swa ntiyiso, kutani mi nga swi chavi.

₇₀“Swikwembu swa vamatiko swo vatliwa hi timhandze no namekiwa nsuku ni silivhere, swi fana ni switlakati leswi hayekiwaka ensin'wini ya marhakarhaka ku chavisa tinyanyana, a swi rindzi nchumu. ₇₁Nakambe swikwembu leswi swo vatliwa hi timhandze no namekiwa nsuku ni silivhere, swi fana ni xihlahla xa mitwa entangeni laha tinyanyana hinkwato ti phatsamaka kona, kumbe swi fana ni ntsumbu lowu cukumetiweke emunyameni. ₇₂Hikwalaho ka tinguvu ta xivunguvungu leti bolelaka emirini ya swona, mi ta tiva leswaku a hi swa ntiyiso; naswona swi ta hetelela hi ku dyiwa hi muhlwa swi hela, kutani swi va xisolo etikweni.

₇₃“Hikokwalaho ke, munhu la lulameke, loyi a nga riki ni swikwembu swa hava, ú tlula van'wana, hikuva ú ta pfumala xisandzu.”