Baruku 5

₁Hluvula xiambalo xa wena xa gome ni nhlomulo, we Yerusalema,

ambala hilaha ku nga heriki evumbhurhi ni ku dzuneka loku humaka eka Xikwembu.

₂Ambala xiambalo xa ku lulama lexi humaka eka Xikwembu;

ambala enhlokweni ya wena harhi ya ku dzuneka ka Loyi-a-hanyaka-hilaha-ku-nga heriki.

₃Xikwembu xi ta kombisa vuxongi bya wena

hinkwako-kwako ehansi ka tilo.

₄Vito leri u nga ta vitiwa hilaha ku nga heriki hi Xikwembu, hi leri:

“Ku rhula loku lulameke, ni ku dzuneka ka vukwembu.”

₅Pfuka we Yerusalema, yima eswitsungeni,

u languta evuxeni,

vona vana va wena va hlengeletanile va huma evupeladyambu ni le vuxeni,

hi rito ra Muhlawuleki, va tsaka hikuva Xikwembu xi va tsundzukile.

₆Va sukile eka wena hi milenge,

va byisiwa hi valala va vona;

kambe Xikwembu xi ta va tlherisela eka wena,

va rhwariwa hi ku dzuneka, tanihi le henhla ka xiluvelo xa vuhosi.

₇Hikuva Xikwembu xi lerisile leswaku

ntshava yin'wana ni yin'wana leyo leha ni switsunga leswi nga heriki swi ta hindzimuxiwa.

Minkova yi ta gandleteriwa, leswaku misava yi ringanana,

kutani Israele a ta kota ku famba a hlayisekile eku dzunekeni ka Xikwembu.

₈Swihlahla ni murhi wun'wana ni wun'wana lowo nun'hwela

swi ta sirhelela Israele hi ku lerisa ka Xikwembu.

₉Xikwembu xi ta fambisa Israele hi ntsako,

eku vonakaleni ka ku dzuneka ka xona

hi tintswalo ni ku lulama loku humaka eka xona.