I Vamakabiya 3

₁Yudasi la vuriwaka Makabiya, a va murhangeri ematshan'wini ya Matatiya tata wa yena. ₂Vamakwavo ni hinkwavo lava nga yima ni tata wa yena va n'wi pfuna, va lwela Israele hi ku tsaka.

₁₀Kavaloko Apoloniya a hlengeleta vamatiko ni mavuthu layo tala lama humaka eSamariya ku ya lwa na Vaisraele. ₁₁Loko Yudasi a swi twa, a huma ku ya hlangana na yena, kutani a n'wi hlula ni ku n'wi dlaya. Vamatiko lavo tala va vaviseka ni ku dlawa, lava saleke va baleka. ₁₂Vayuda va hlengeleta leswi va swi phangheke; kutani Yudasi a teka banga ra Apoloniya, a hamba a lwa ha rona vutomi bya yena hinkwabyo.

₁₃Kakuloko Seroni, ndhunankulu ya mavuthu ya Vaasiriya, a twa leswaku Yudasi ú hlengeletile masocha layo tala, kun'we ni ntlawa wa vavanuna lava tshembekeke lava a a tshama na vona ku ya enyimpini, ₁₄a ku: “Ndzi ta tiendlela vito ni ku kuma ku xiximiwa etikweni. Ndzi ta lwa na Yudasi ni vanakulobye lava monyeke xileriso xa hosi.” ₁₅Hiloko mavuthu ya tinhenha ta lavo homboloka ma huma na yena ku ya n'wi pfuna ku tirihisela eka Vaisraele. ₁₆Loko Seroni a tshinelela xiphandze xa Beta-Horoni, Yudasi a ya lwa na yena a ri ni masocha ma nga ri mangani. ₁₇Loko Vayuda va vona mavuthu ya Seroni ma ri karhi ma hlangana na vona, va ku eka Yudasi: “Xana hina hi nga talangiki hi ta swi kotisa ku yini ku lwa ni ntshungu lowu wa tinhenha, wo kurisa xileswi ke? Naswona hi hava matimba, hikuva a hi si dya nchumu namuntlha.”

₁₈Yudasi a hlamula a ku: “Swa olova leswaku lavo tala va hluriwa hi lavo ka va nga talanga, hikuva emahlweni ka Xikwembu ku kutsuriwa hi vanhu lavo tala kumbe hi lavo ka va nga talanga, swo fana. ₁₉A hi ku tala ka vanhu loku hlurisaka nyimpi, kambe ku hlula ku huma eka Xikwembu. ₂₀Hi ku tikurisa ni ku homboloka ka vona, valala va hina va ta ku ta hi herisa, hina, ni vasati va hina, ni vana va hina, va phangha tiko ra hina; ₂₁kambe hina hi lwela vutomi bya hina ni milawu ya hina. ₂₂Xikwembu xi ta va herisa emahlweni ka hina; loko mi ri n'wina, mi nga va chavi.”

₂₃Loko Yudasi a heta ku vulavula, a tsutsuma xikan'we ku lwa na Seroni ni mavuthu ya yena, kutani a va hlula. ₂₄Vayuda va va hlongorisa ku suka eBeta-Horoni ku fika erivaleni; ku dlawa 800 wa vona, lavan'wanyana va balekela etikweni ra Vafilista. ₂₅Endzhaku ka sweswo, hinkwako-nkwako, vamatiko va sungula ku chava Yudasi ni vamakwavo. ₂₆Ndhuma ya yena yi ya fika etindleveni ta hosi Antiyoko Epifani, kutani vamatiko va bula hi ta tinyimpi ta Yudasi.

₂₇Loko hosi Antiyoko Epifani a twa marungula lawa, a hlundzuka ku tlula mpimo; kutani a lerisa leswaku ku hlengeletiwa masocha hinkwawo emfun'weni wa yena, a hlengeleta mavuthu layo tala ngopfu ya tinhenha. ₂₈A pfula vuhlayiselo bya xuma xa yena, a hakela masocha ya yena muholo wa lembe hinkwaro, a ma lerisa ku tshama ma hlomile matlhari. ₂₉Kavaloko a vona leswaku mali yi herile evuhlayiselweni bya yena ni leswaku mali ya ndzuvo ya tiko yi hungutekile, hikwalaho ka mpfilumpfilu ni ku xaniseka loku a ku vangeke emisaveni, loko a herisa milawu leyi a yi hlayisiwile ku sukela khale. ₃₀Minkarhi hinkwayo ya ku fuma ka yena, Antiyoko Epifani a a toloverile ku nyika tinyiko to tala ku tlula tihosi leti ti n'wi rhangeleke. Kambe sweswi a chava leswaku a nge he koti ku ya emahlweni a tirhisa sweswo hikwalaho ka ku pfumala mali. ₃₁Hikokwalaho a karhateka swinene emiehleketweni ya yena, kutani a endla makungu ya ku ya etikweni ra Vaperesi a ya hlengeleta ndzuvo eswifundzheni swa kona a ta kuma mali yo tala.

₃₂A hlawula Lisiya, wanuna wo xiximeka wa ndyangu wa vuhosi, leswaku a sala a vona timhaka ta tiko ku sukela enambyeni wa Yufrata ku ya fikela endzilekaneni wa Egipta. ₃₃Lisiya a a fanele ni ku n'wi hlayisela n'wana wa yena Antiyoko ku kondza a vuya. ₃₄Kutani a veka Lisiya ku rhangela hafu ya mavuthu ya yena ni tindlopfu ta kona, a n'wi lerisa hinkwaswo leswi a a lava leswaku swi endliwa. Loko ku ri hi tlhelo ra vaaki va Yudiya na Yerusalema, ₃₅Lisiya a a fanele ku va rhumela mavuthu ma ya ma heta ni ku tshova matimba ya Vaisraele ni masalela ya va le Yerusalema, a endla leswaku va nga ha tsundzukiwi endhawini yoleyo. ₃₆Naswona a lerisiwa ku teka tiko ra vona a ri avela vanhu vambe, leswaku va tshama eka rona. ₃₇Kutani hi lembe ra 147 hosi Antiyoko Epifani a teka hafu leyi saleke ya mavuthu ya yena, a suka Antiyoka ntsindza wa yena, a pela nambu wa Yufrata a ya nghena hi le Mesopotamiya.

₃₈Lisiya a hlawula Pitolemi n'wana Dorimene, na Nikanoro, na Gorgiya, lava nga tinhenha exikarhi ka vanghana va hosi. ₃₉A va rhumela etikweni ra Yudiya va ri ni masocha ya 40 000 yo famba hi milenge ni vagadi va 7 000 va tihanci leswaku va ya herisa Vayuda hilaha hosi Antiyoko a a lerisile hakona. ₄₀Hiloko va famba ni mavuthu ya vona hinkwawo; kutani loko va fikile erivaleni leri nga kusuhi na Emawusi, va gova kona. ₄₁Mavuthu man'wana yo huma eSiriya ni le tikweni ra Vafilista ma hlangana na vona. Loko vamabindzu va xifundzha xolexo va twa leswi a swi vulavuriwa hi mavuthu lama, va teka silivhere ni nsuku lowo tala ni timpencana ta milenge, va ya emixaxeni ya wona, va ku va ta tixavela Vaisraele van'wana va va mahlonga ya vona.

₄₂Kutani Yudasi ni vamakwavo va vona leswaku makhombo ya vona ya engetelekile ni leswaku mavuthu ya valala ma govile etikweni ra vona. A va twile ni leswi hosi Antiyoko Epifani a a lerisile ku swi endla eka Vaisraele leswaku va herisiwa ra makumu. ₄₃Kambe va byelana va ku: “A hi pfuxeni tiko ra hina leri onhiweke, hi lwela vanhu va hina ni Xivandla lexo hlawuleka.” ₄₄Hi loko ntshungu wa Vayuda wu hlengeletana ku tilulamisela nyimpi, va khongela Xikwembu, va kombela tintswalo eka xona ni ku tweriwa vusiwana, va ku:

₄₆Kavaloko Yudasi ni masocha ya yena va hlengeletana va ya eMispa ku langutana na Yerusalema, hikuva Vaisraele a va khongela kona khale. ₄₇Hi siku rero va titsona swakudya, va ambala leswo khwaxa, va titsutsuxela hi nkuma etinhlokweni ni ku handzula swiambalo swa vona. ₄₈Kutani va pfula buku ya nawu wa Xikwembu, va lavisisa timhaka leti vamatiko va toloveleke ku ti vutisa eka swifaniso swa swikwembu swa hava. ₄₉Va tisa swiambalo swa vaprista, ni swa ntshovelo wo sungula, ni swa vukhume, va nghenisa exikarhi ka vona ni Vanaziri lava a va hetile masiku ya ku tiboha ka vona. ₅₀Kutani va huwelela eka Xikwembu va ku: “Xana hi ta endla yini hi swilo leswi? Hi ta swi yisa kwihi ke? ₅₁Xivandla lexo hlawuleka xa wena xi mbundzuxiwile ni ku nyamisiwa, vaprista va wena va rila hikwalaho ka tingana ta vona. ₅₂Vona! Vamatiko va hlengeletanile ku ta hi herisa; u tiva lexi va xi kungelaka. ₅₃Xana hi ta lwisa ku yini na vona, loko wena u nga hi pfuni?” ₅₄Kavaloko va chaya tinanga ta vona ni ku huwelela.

₅₅Endzhaku ka leswi, Yudasi a veka tindhuna ehenhla ka mintlawa ya masocha ya 1 000, ni ya 100, ni ya 50 kumbe ya 10. ₅₆Kutani a byela lava a va ri eku akeni ka tindlu, ni lava vuteke vanhwana, ni lava nga ku rimeni ka masimu ya vhinya, ni lava nga ni vutoya, a ku ka vona: “Tlhelelani emakaya hi ku landza nawu wa Xikwembu!” ₅₇Hiloko mavuthu ya Vayuda ma huma ma ya gova edzongeni ra Emawusi. ₅₈Kutani Yudasi a ku ka vona: “Hlomani matlhari, mi va ni xivindzi; mundzuku nimixo tilulamiseleni ku ya lwa ni vamatiko lava va hi rhendzeleke ku herisa hina ni Xivandla lexo hlawuleka. ₅₉Swa antswa loko hi fa hi ri karhi hi lwa, ku ri ni ku tshika tiko ra hina ni Xivandla lexo hlawuleka swi onhiwa. ₆₀Kambe Xikwembu xi ta endla ku rhandza ka xona.”