Pisalema ya 91

₁Munhu loyi a sirheleriwaka hi HOSI Xikwembu xa le henhla-henhla,

loyi a wisaka endzhutini wa Xikwembu lexi nga ni matimba hinkwawo,

₂ú xi dzunisa a ku: “U khokholo leri ndzi tumbelaka eka rona,

u Xikwembu xa mina lexi ndzi xi tshembaka.”

₃Hi xona Xikwembu lexi nga ta ku ponisa entlhan'wini lowu rhiyiweke emahlweni ka wena,

ni le ntungwini lowu wu hetaka vanhu.

₄Xi ta ku hlayisa xi ku funengeta

ku fana ni huku leyi fukamelaka swiciwana swa yona,

ku tshembeka ka xona ku ta ku sirhelela kukota xitlhangu.

₅Makhombo lama taka nivusiku, hambi yi ri miseve leyi copiwaka ninhlekanhi,

a wu nga swi chavi;

₆a wu nga chavi mavabyi lama ku ongaka exinyamini,

hambi swi ri switlhavi leswi dlayaka dyambu xi lo hosi!

₇Hambiloko vanhu va madzana-dzana va nga wa kusuhi na wena,

makhombo lawa ma nge ku humeleli.

₈U to swi hlalela kunene,

u vona hilaha Xikwembu xi baka hakona lavo homboloka.

₉Hakunene HOSI Xikwembu i khokholo ra wena,

u vekile vutshamo bya wena eka Loyi a nge henhla-henhla.

₁₀Hikokwalaho ku hava xo biha lexi nga ta ku humelela,

mavabyi a ma nga ngheni emutini wa wena.

₁₁Xikwembu xi ta lerisa tintsumi ta xona

leswaku ti ku hlayisa hinkwako laha u nga ta ya kona.

₁₂Ti ta ku tlakula hi mavoko ya tona,

leswaku nenge wa wena wu nga tshuki wu vavisiwa hi ribye.

₁₃U ta kandziyela nghala ni xivatlankombe,

u phyandlasela vana va nghala ni tinyoka.

₁₄Xikwembu xi ri:

“Leswi munhu loyi a ndzi tivaka ni ku ndzi namarhela,

ndzi ta n'wi ponisa ndzi n'wi hlayisa.

₁₅Loko a ndzi vitana, ndzi ta n'wi hlamula,

ndzi ta va na yena emaxangwini,

ndzi n'wi lamulela ndzi n'wi nyika ni ndzhuti.

₁₆Ndzi ta engetela malembe ya yena ya ku hanya,

kutani ú ta swi vona leswaku hi mina ndzi n'wi ponisaka.”