Pisalema ya 90

₁We N'wini wa hina, ku sukela eminkarhini ya vakokwa wa hina,

hi kumile vutshamo eka wena.

₂Loko tintshava ti nga si va kona,

ni loko u nga si tumbuluxa misava ni leswi nga ka yona,

u vile Xikwembu, naswona wa ha ta va xona hilaha ku nga heriki.

₃U lerisa vanhu u ku: “Tlhelelani entshurini!”

Kutani u va tlherisela kona.

₄Malembe ya khume ra madzana emahlweni ka wena

ma fana ni siku ra tolo loko ri hundzile,

kumbe nkarhinyana wo koma nivusiku.

₅U kukula vanhu, va hundza laha misaveni kukota norho;

va fana ni byanyi lebyi hlukaka nimixo,

₆kambe loko dyambu ri ya eku peleni,

byanyi byebyo byi nga baleka swiluva nimixo, bya vuna byi oma.

₇Hakunene ha dlawa hi vukari bya wena,

ku hlundzuka ka wena ka hi chavisa.

₈U andlala ku homboloka ka hina emahlweni ka wena;

swidyoho leswi hi swi endleke exihundleni, wa swi paluxa.

₉Masiku ya ku hanya ka hina ma komisiwa hi vukari bya wena,

malembe ya kona onge i moyanyana ntsena.

₁₀Hi hanya malembe ya 70,

ni lava tiyeke va nga fika eka 80,

kambe malembe ya kona ma tele maxangu ni ku tikeriwa;

masiku ya hina ma komile, mo haha kunene!

₁₁Xana i mani la anakanyaka matimba ya vukari bya wena xana?

La tsundzukaka ku hlundzuka ka wena loku chavisaka i mani ke?

₁₂Hikokwalaho hi dyondzise ku hlaya masiku ya ku hanya ka hina,

kutani hi ta kuma vutlhari.

₁₃We HOSI, tana u ta hi pfuna, hina malandza ya wena;

xana u ta yima kule na hina ku ya fika rini xana?

₁₄Hi kombe rirhandzu ra wena ka ha ri mixo,

leswaku hi ta tsaka hi ku dzunisa, vutomi bya hina hinkwabyo.

₁₅Hi nyike masiku ya ntsako ku ringana ni lawa u hi xaniseke ha wona,

u hi nyika ni malembe lamanene yo ringana ni lawa hi voneke maxangu ha wona.

₁₆Ntirho wa wena a wu tikombe eka hina malandza ya wena,

ni lava va ha taka a va hlalele ku dzuneka ka wena.

₁₇Hi funengete hi tintswalo ta wena, we Xikwembu xa hina ni N'wini wa hina;

katekisa mintirho ya hina, ina yi katekise!