Swivuriso 2

₁N'wananga, amukela leswi

ndzi ku byelaka swona,

u hlayisa milawu ya mina,

₂rhiya ndleve u yingisa swa vutlhari,

u tikarhatela ku twisisa swilo;

₃ndzi ri, rilela vutlhari,

u kombela ku twisisa,

₄swi hlote ku fana ni silivhere,

u swi lava ku fana ni xuma lexi fihliweke,

₅kutani u ta twisisa leswaku ku chava HOSI Xikwembu

swi vula yini, u tlhela u xi tiva.

₆HOSI Xikwembu hi xona xi nyikaka vutlhari,

vutivi ni ku twisisa swi huma eka xona;

₇lava lulameke, xi va hlayisela minkateko,

HOSI Xikwembu i xitlhangu xa lava tshembekeke,

₈hi xona xi sirhelelaka maavanyisele layo lulama,

xi rindza tindlela ta vahlawuriwa va xona.

₉Loko u yingisa, u ta twisisa leswi lulameke,

u tiva milawu leyinene ni ntiyiso,

u tiva ni hinkwaswo leswi lavekaka,

₁₀kutani vutlhari byi ta ku letela,

u tsakisiwa hi vutivi;

₁₁mianakanyo leyinene yi ta ku sirhelela,

u ta hlayisiwa hi ku twisisa;

₁₂swi ta ku sivela ku endla leswo biha,

ni ku nghena eka swivulavula swa vanhu lavo homboloka;

₁₃lava tshikeke tindlela leto lulama,

va famba emunyameni,

₁₄lava tsakisiwaka hi ku endla swo biha,

va tsakela mahanyelo layo homboloka;

₁₅mikhuva ya vanhu lava, yi gombonyokile,

va hanya hi vuxisi ntsena.

₁₆Vutlhari byi ta ku ponisa eka wansati wa dlakuta,

loyi a nga tshembekangiki, wa marito yo tsokombela,

₁₇la tshikeke loyi a n'wi tekeke evuntshweni bya yena,

a tshova ntwanano wa yena ni Xikwembu xa yena.

₁₈Ku nghena endlwini ya yena i ku hojomela exivandleni xa vafi,

ndlela yo ya eka yena yi yisa eku feni.

₁₉Hinkwavo lava yaka eka yena, a va vuyi,

ni ndlela ya vutomi, a va ha yi kumi.

₂₀Hikokwalaho, khoma ndlela ya vanhu lavanene,

u nga hambuki ebuduleni ra lavo lulama;

₂₁hikuva lava lulameke, hi vona va nga ta tshama etikweni,

eka rona, ku ta aka lava tshembekeke,

₂₂kambe lavo homboloka va ta hlongoriwa etikweni,

vakanganyisi va ta susiwa eka rona.