Swivuriso 1

₂Swivuriso swi pfuna vanhu ku tiva vutlhari ni swiletelo,

ni ku twisisa marito ya tintlhari,

₃swi nyika vanhu swiletelo swa mahanyelo lamanene,

va ta tiva leswi lulameke, ni milawu leyinene, ni ntiyiso.

₄Swivuriso swi tlharihisa lavo pfumala mano,

swi nyika lavantshwa vutivi ni mianakanyo leyinene.

₅Na yena loyi a tlhariheke, loko a swi landza, ú ta dyondza a ya emahlweni.

Munhu loyi a twisisaka, ú kuma switsundzuxo,

₆a kota ku hlamusela swivuriso ni swifananiso,

a twisisa marito ya tintlhari ni mavulavulele ya tona.

₇Masungulo ya vutivi i ku chava HOSI Xikwembu;

lava alaka ku dyondzisiwa ni ku leteriwa i swiphukuphuku!

₈N'wananga, yingisa swiletelo swa tata wa wena;

ni milawu ya mana wa wena, u nga tshuki u hambana na yona:

₉Swi ta va harhi yo saseka enhlokweni ya wena,

ni vuhlalu bya nkoka enhan'wini ya wena.

₁₀N'wananga, u nga tshuki u pfumela

ku yengiwa hi vadyohi.

₁₁Va nga ku byeletela va ku: “Tana hi famba swin'we,

hi ya tumbelela vanhu, hi va dlaya.

A hi ye hi ya yimela

vahundzi va ndlela, lava nga tiviki nchumu.

₁₂A hi va miteni va ri karhi va hanya,

va fambisa sweswo, va rhelela ekheleni ra xivandla xa vafi.

₁₃Hi ta kuma swilo swa nkoka swa tinxaka-xaka,

hi tata tindlu ta hina hi leswi hi swi phangheke.

₁₄Nghena entlaweni wa hina,

hinkwerhu hi ta phakana hi ringana!”

₁₅N'wananga, u nga tshuki u tolovelana ni vanhu vo tano,

ni mikhuva ya vona, u nga yi landzeleli,

₁₆hikuva a va hlweli ku endla leswo biha,

va hatla ku halata ngati.

₁₇A swi pfuni nchumu ku rhiya xitsendzele

tinyanyana hinkwato ti langutile:

₁₈Vanhu lava va le ku rhiyeni ka ntlhamu lowu nga ta tlhela wu phasa vona;

eku tumbeleleni ka vona, hi vona va nga ta lahlekeriwa hi vutomi.

₁₉Vanhu hinkwavo lava kumeke rifumo hi tihanyi, va hanyisa sweswo.

Rifumo ra kona ri va vangela rifu.

₂₀Vutlhari bya huwelela emagondzweni,

erivaleni ku twala rito ra byona leri tlakukeke;

₂₁byi yima ni le henhla ka khumbi byi huwelela,

byi vulavula ni le tinyangweni ta muti, byi ku:

₂₂“N'wina lavo-ke-mano, mi ta pfumala vutivi ku fikela rini ke?

Vasandzi va ta tshika rini ku sandza,

ni swiphunta swi ta venga ku twisisa ku fikela rini ke?

₂₃Yingisani, ndzi mi laya mina vutlhari,

ndzi lombeni tindleve ndzi mi tsundzuxa,

ndzi mi byela leswi nga mbilwini ya mina.

₂₄Ndzi huwelerile, kambe a mi pfumelanga,

ndzi mi kowetile, kambe a ku vanga na un'we loyi a teke.

₂₅Minkarhi hinkwayo loko ndzi mi tsundzuxa, mi pfarile tindleve,

a mi lavanga ku twa loko ndzi mi tshinya.

₂₆Hikokwalaho, na mina ndzi ta mi hlekula loko khombo ri mi fikerile,

ndzi ta mi yowetela loko mi ri karhi mi rhurhumela hi ku chava,

₂₇loko nchavo wu mi terile tanihi xidzedze,

ni makhombo ma ta ku fana ni xihuhuri,

ni loko mi fikeriwile hi gome ni nhlomulo.

₂₈“Va ta ndzi huwelela, kambe a ndzi nga pfumeli,

va ta ndzi lava hinkwako, kambe a va nga ndzi kumi.

₂₉Va vengile vutivi,

va ala ni ku chava HOSI Xikwembu,

₃₀va nga lavi ku twa nchumu hi switsundzuxo swa mina;

minkarhi hinkwayo, a va sandza loko ndzi va laya,

₃₁hikokwalaho, swiendlo swa vona swi ta va xanisa,

mano ya vona ma ta va dlayisa.

₃₂Lava pfumalaka vutivi va tivangela rifu loko va ala ku dyondzisiwa,

swiphunta swi ticelela masirha hi ku ka swi nga tikarhateli nchumu.

₃₃Kambe loyi a ndzi yingisaka, ú ta tshamiseka,

a kuma ku rhula emoyeni, a nga chavi nchumu xo biha.”