Eksoda 38

₁Kutani a endla alitari hi mapulangi ya murhi wa munga; ehenhla ni le hansi ka yona a ku ringanana, 2,50 m ku leha ni 2,50 m ku anama; ku ya ehenhla a yi ri 1,50 m. ₂Etinhleni ta yona leta mune a vekela timhondzo ti khomana na yona, kutani a nameka koporo eka yona. ₃Kutani a endla swingolongondzwana hinkwaswo swa alitari, ti nga timbita, ni minkombe, ni minkambana, ni tiforoko, ni timbita ta ku oka ndzilo; swingolongondzwana leswi hinkwaswo a swi endla hi koporo. ₄Naswona a lukela alitari eritavala ra koporo, a ri vekela hi hala hansi ka alitari emakumu ka yona, ri tlakuka ri ya ehenhla ku ya fika exikarhi ka yona. ₅Etinhleni ta mune ta ritavala leri a vekela swingwavila swa mune swa koporo leyi n'okisiweke, swo tlhoma timhandze to rhwala alitari hi tona. ₆Kutani a vatla timhandze hi murhi wa munga, a ti nameka koporo. ₇A tlhoma timhandze leti eswingwavileni leswi nga ematlhelo ka alitari, ti va swikhomo swo rhwala alitari ha swona.

Alitari leyi, ú yi endlile hi mapulangi, yi ri phanga.

₈Kutani a vumba sambelo ni xikhatelo xa rona hi koporo ya swivoni swa vavasati lava a va tirha enyangweni ya Ntsonga lowo Hlawuleka.

₉Kutani a aka xivava. Hi tlhelo ra dzonga, xivava lexi a xi ri ni swisirhelelo swa 50 m swa ntsembyani wo saseka lowu lukiweke. ₁₀Swisirhelelo leswi a swi ri ni timhandze ta 20 to seketela xivava, ni minkotloto ya tona ya koporo; kambe swikhweketo swa le timhandzeni ni timbalelo ta tona a swi ri swa silivhere. ₁₁Hi tlhelo ra n'walungu, na kona a ku ri ni swisirhelelo swa 50 m; a swi ri ni timhandze to seketela ta 20, ni minkotloto ya tona ya 20 ya koporo, kambe swikhweketo ni timbalelo a swi ri swa silivhere. ₁₂Hi tlhelo ra vupeladyambu, a ku ri ni swisirhelelo swa 25 m, swi ri ni timhandze to seketela ta khume, ni minkotloto ya tona ya khume; swikhweketo ni timbalelo swona a swi ri swa silivhere. ₁₃Hala nyangweni ya xona hi tlhelo ra le vuxeni, xivava a xi anamile 25 m. ₁₄Swisirhelelo swa tlhelo rin'we swa le nyangweni a swi lehile 7,50 m, swi ri ni timhandze tinharhu to seketela eka tona, ni minkotloto minharhu. ₁₅Hi tlhelo lerin'wana ra nyangwa na kona a swi ri tano; kutani, ematlhelweni lawa mambirhi ya nyangwa, a ku ri ni swisirhelelo swa 7,50 m ni timhandze tinharhu to seketela eka tona, ni minkotloto minharhu. ₁₆Swisirhelelo hinkwaswo ku rhendzeleka ni xivava a swi ri swa ntsembyani wo saseka lowu lukiweke. ₁₇Minkotloto ya timhandze to seketela a yi ri ya koporo, kambe swikhweketo swa tona ni timbalelo ta tona a swi ri swa silivhere; tinhloko ta timhandze a ti namekiwile silivhere, naswona timhandze hinkwato ta xivava a ti hlanganisiwile hi timbalelo ta silivhere. ₁₈Xisirhelelo xo pfala nyangwa ya xivava a xi rhungeleriwile mavalavala hi voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke; xisirhelelo lexi a xi lehile 10 m; lomu matlhelo a xi ri 2,50 m ku ya ehenhla, xi ringana ni swisirhelelo swa xivava. ₁₉Xisirhelelo lexi a xi seketeriwa hi timhandze ta mune; minkotloto ya tona ya mune a yi ri ya koporo; swikhweketo swona swi ri swa silivhere; tinhloko ta timhandze leti ni timbalelo ta tona a ti namekiwile silivhere. ₂₀Swikhomiso hinkwaswo swa Ntsonga ni swa xivava ematlhelweni hinkwawo, a swi ri swa koporo.

₂₁Lowu i nongonoko wa xuma lexi tirhisiweke ku aka Ntsonga, laha maribye ya Ntwanano a ma hlayisiwa kona; xuma lexi xi hlayiwile hi Valevhi hi ku lerisiwa hi Muxe, va fambisiwa hi Itamara n'wana muprista Aroni. ₂₂Besalele n'wana Uri wa Huru wa nyimba ya Yuda, hi yena loyi a nga endla hinkwaswo leswi HOSI Xikwembu xi leriseke Muxe, ₂₃a ri karhi a pfuniwa hi Oholiyabu n'wana Ahisamaki wa nyimba ya Dani. Oholiyabu a a tiva ntirho wa ku vatla, ni ku sasekisa, ni ku rhungelela mavalavala hi voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke.

₂₄Nsuku hinkwawo lowu hlengeriweke ntirho wa ku aka xivandla lexo hlawuleka, wu endlile 1 198 kg, hi ku ya hi ntiko wo pima ha wona wa le xivandleni lexo hlawuleka. ₂₅Silivhere leyi humesiweke hi vavanuna lava hlayiweke va ntshungu wa Vaisraele, yi endlile 4 121 kg, hi ku ya hi ntiko wo pima ha wona wa le xivandleni lexo hlawuleka. ₂₆Silivhere leyi, yi humesiwile hi vavanuna va 603 550 va malembe ya 20 ni ku ya ehenhla lava teke eku hlayiweni, un'wana ni un'wana a humesa silivhere yo ringana 6 g. ₂₇Silivhere yo ringana 4 100 kg yi n'okisiwile, yi vumba minkotloto ya 100 ya timhandze ta xivandla lexo hlawuleka ni ta xisirhelelo xa kona, nkotloto wun'we wu vumbiwa hi silivhere ya 41 kg. ₂₈Silivhere leyi saleke ya 21 kg, va vumbile hi yona swikhweketo swa le timhandzeni, ni ku nameka etinhlokweni ta timhandze, ni ku endla timbalelo ta tona. ₂₉Koporo leyi humesiweke yi endlile 2 900 kg. ₃₀Va vumbile minkotloto ya timhandze ta le nyangweni ya Ntsonga lowo Hlawuleka hi koporo leyi, va vumba ni alitari ya magandzelo ni ritavala ra yona, ni swingolongondzwana hinkwaswo swa alitari. ₃₁Va tlhela va vumba hi yona minkotloto hinkwayo ku rhendzeleka ni xivava, ni minkotloto ya le nyangweni ya xivava, ni swikhomiso hinkwaswo swa Ntsonga ni swa xivava ematlhelweni hinkwawo.