Eksoda 37

₁Kutani Besalele a endla Areka hi mapulangi ya murhi wa munga, yi ri ni mimpimo leyi: 125 cm ku leha, ni 75 cm ku anama, ni 75 cm ku ya ehenhla. ₂A yi nameka nsuku lowo tenga endzeni ni le handle, a endla nkonye wa nsuku wu rhendzeleka na yona. ₃Kutani a yi endlela mune wa swingwavila hi nsuku lowu n'okisiweke, a swi vekela emilengeni ya yona ya mune, swimbirhi swi va emilengeni ya tlhelo rin'we, swimbirhi emilengeni ya tlhelo rin'wana. ₄A vatla ni timhandze ta murhi wa munga, a ti nameka nsuku, ₅kutani a ti tlhoma eswingwavileni leswi nga ematlhelo ya Areka, leswaku ti va swikhomo swo yi rhwala ha swona. ₆A endla xitshamu xa ndzivalelo hi nsuku lowu tengeke, xi ri ni mimpimo leyi: 125 cm ku leha ni 75 cm ku anama. ₇A fula tikerubu timbirhi hi nsuku a ti vekela emakumu ka xitshamu xa ndzivalelo, ₈kerubu yin'we etlhelweni rin'wana na rin'wana; tikerubu leti, a ti endla ti khomana ni xitshamu xa ndzivalelo hi le makumu ka xona. ₉Tikerubu a ti tlharamulerile timpapa ta tona ehenhla, ti sirhelela xitshamu xa ndzivalelo, ti langutanile, xitshamu xa ndzivalelo xi ri exikarhi.

₁₀Kutani a endla tafula ra Xinkwa lexo Hlawuleka hi mapulangi ya murhi wa munga, ri va ni mimpimo leyi: 100 cm ku leha, ni 50 cm ku anama, ni 75 cm ku ya ehenhla, ₁₁a ri nameka nsuku lowu tengeke, a endla ni nkonye wa nsuku ku rhendzeleka na rona. ₁₂A vekela pulangi ro anama 8 cm ri rhendzeleka ni tafula, a tlhela a endla ni nkonye wa nsuku wu rhendzeleka ni pulangi leri. ₁₃Kutani a ri endlela mune wa swingwavila hi nsuku lowu n'okisiweke, a swi vekela etinhleni leta mune ta tafula, emilengeni ya rona. ₁₄Swingwavila swo nghenisa timhandze to rhwala tafula a swi tshamile kusuhi swinene ni pulangi. ₁₅Kutani a vatla timhandze to rhwala tafula, ta murhi wa munga, a ti nameka nsuku. ₁₆Kutani a endla swibya leswi nga ta tshama etafuleni, ti nga tindyelo ta rona, ni minkambana ya rona ya mirhi ya risuna, ni swimbitana swa rona, ni swikhuwana swo chela swilo swa le magandzelweni; hinkwaswo a swi ri swa nsuku lowu tengeke.

₁₇Kutani a endla xitlhoma-timboni hi nsuku lowu tengeke; tshaku ra xona ni nsinya wa xona a swi fula hi nsuku; a endla ni swimbitana leswi sasekisiweke hi swihluke ni matluka ya swiluva, a swi khomanisa ni xitlhoma-timboni. ₁₈Lomu matlhelo ya xitlhoma-timboni a ku ri ni marhavi ya 6; manharhu a ma humele etlhelweni rin'we, manharhu etlhelweni lerin'wana. ₁₉Rhavi rin'wana ni rin'wana eka marhavi lawa ya 6 lama humeleke ematlhelweni, a ri ri ni swimbitana swinharhu leswi fanaka ni swiluva swa “alimondi”; xin'wana ni xin'wana xa swimbitana leswi a xi sasekisiwile hi swihluke ni matluka ya swiluva. ₂₀Ensinyeni wa kona, a ku ri ni swimbitana swa mune leswi fanaka ni swiluva swa “alimondi”; na swona a swi sasekisiwile hi swihluke ni matluka ya swiluva. ₂₁Ehansi ka lomu marhavi mambirhi ya xitlhoma-timboni ma hlanganaka kona ni nsinya wa xona, a ku ri ni xilo lexi fanaka ni xihluke, xi khomanile ni nsinya. ₂₂Swihluke leswi ni marhavi lawa a swi khomanile ni nsinya wa xitlhoma-timboni; xitlhoma-timboni a xi endliwile hi nsuku lowo tenga lowu furiweke. ₂₃Kutani a endla timboni ta 7 ta xitlhoma-timboni, ni swikero swa xona ni timbita ta xona, hi nsuku lowo tenga. ₂₄Xitlhoma-timboni ni swingolongondzwana swa xona hinkwaswo a swi endliwile hi nsuku lowo tenga wo tlulanyana 40 kg hi ku tika.

₂₅Kutani a endla alitari yo hisela kona mirhi ya risuna, a yi endla hi mapulangi ya murhi wa munga. Ehenhla ni le hansi ka yona a ku ringanana: 50 cm ku leha ni 50 cm ku anama; ku ya ehenhla a yi ri 100 cm; timhondzo ta yona a ti khomanile na yona. ₂₆A yi nameka nsuku lowo tenga ehenhla ni le matlhelweni hinkwawo, a nameka ni timhondzo ta yona, a endla ni nkonye wa nsuku wu rhendzeleka na yona. ₂₇A yi endlela ni swingwavila swimbirhi swa nsuku swo tlhoma timhandze to yi rhwala ha tona, a swi vekela ehansi ka nkonye hala ni hala ematlhelweni ya yona mambirhi. ₂₈A vatla timhandze ta kona hi murhi wa munga, a ti nameka nsuku.

₂₉A endla ni mafurha yo tola lama hlawulekeke, ni mirhi yo nun'hwerisa leyo tenga leyi hisiwaka egandzelweni, hi mukhuva lowu muendli wa mirhi leyo nun'hwerisa a pfanganyisaka ha wona.