TITO 3

₁U va tsundzuxa ku yingisa vuhosi ni tindhuna, ni ku ya hi nawu, ni ku tilunghisela mitirho hinkwayo leyo saseka; ₂va nga tshuki va lumbeta munhu, va tshika timholovo, va tikhoma, va kombisa ku olova hinkwako eka vanhu hinkwavo.

₃Hikuva, na hina, khale a hi hungukile, hi ri lava alaka ku yingisa, lava lahlekeke, lava fumiwaka hi ku navela, ni ku titsakisa loko tala; lava hanyaka emoneni ni le makwangeni, lava faneleke ku vengiwa, ni lava venganaka. ₄Kambe siku ku vonakalaka vunene bya Xikwembu, Mulondzovoti wa hina, ni rirhandzu ra xona eka vanhu, ₅u hi hanyisile, ku nga ri hi mitirho leyinene leyi tirhiweke hi hina, kambe hi tintswalo ta xona, hi ku hlantswa ka ku tswariwa ra vumbirhi, ni vuntshwa bya Moya lowo Kwetsima, ₆lowu xi wu cheleke hi ku tala ehenhla ka hina ha Yesu Kriste, Mulondzovoti wa hina; ₇leswaku, leswi hi nga hlayiwa lava lulameke hi tintswalo ta xona, hi ta va ni ku tshemba ku endliwa vadyandzhaka va vutomi lebyi nga heriki.

₈Rito leri ri tiyile, kambe ndzi rhandza leswaku u tiyisa hi matimba timhaka leti, leswaku lava pfumeleke eka Xikwembu va tilangutela, va ta rhanga va chivirikela mitirho leyinene: Hi swona leswinene, leswi lulamelaka vanhu.

₉Kambe chava ku kanetana ka vuhunguki, ni ka tinxaka, ni timhaka leti hambanaka, ni ku kanela ehenhla ka nawu, hikuva a swi pfuni nchumu, i swahava.

₁₀Hambana ni munhu la dyondzisaka leswi hambanisaka loko u n'wi pfuxile kan'we kumbe kambirhi, ₁₁u nga tiva leswaku lowo tano u onhakile, i mudyohi, u tiavanyisile.

₁₂Kutani loko ndzi ta va ndzi ku rhumele Artema, hambi a ri Tixiko, hatlisa u ta eka mina eNikopoli, hikuva ndzi anakanyile ku pindzuka vuxika kona. ₁₃Longelela Zena, mudyondzisi wa nawu, na Apolosi, erendzweni ra vona, va nga tshuki va pfumala nchumu. ₁₄Varikwerhu a va dyondze, na vona, eku chivirikela mitirho leyinene va ta pfuna emasikwini ya ku pfumala, va nga tshuki va pfumala mihandzu.

₁₅Lava ndzi nga na vona va ku rungula hinkwavo. Rungula lava hi rhandzaka eku pfumeleni.

Tintswalo a ti ve na n'wina hinkwenu!