Mukhuva lowu Tito a fanelaka ku khongotela vanhu ha wona.
1Loko u ri wena, vula leswi lulameleke ku dyondzisa loku tengeke: 2Vavanuna lava kuleke va fanele ku tikhoma, va chava ku hlekiwa, va ve ni ku anakanya loku lulameke eku pfumeleni, ni le rirhandzwini, ni le ku yingiseleni. 3Na vona vavasati lava kuleke, a va ve ni ku famba loku lulamelaka ku kwetsima, va nga tshuki va hleva, va nga toloveli ku nwa vhinyo leyo tala; va dyondzisa leswo lulama; 4va ta tlharihisa lavantshwa va va dyondzisa ku rhandza vanuna va vona, ni ku rhandza vana; 5va ve ni ku titsongahata, ni ku tenga, ni ku titshamela emakaya ka vona; va ve lavanene, lava yingisaka vanuna va vona, leswaku rito ra Xikwembu ri nga tshuki ri sandziwa.
6Na vona vavanuna lavantshwa, u va khongotela ku va ni ku anakanya; 7eka hinkwaswo u tiendla ntila wa mitirho leyinene, hi ku dyondzisa loku tengeke, loku nga riki na xisandzu, 8marito ya wena a ma ve lama hanyisaka, lama nga solekiki, leswaku la kanetaka a va ni tingana hi ku pfumala leswo biha leswi a nga mi vulaka ha swona.
9Byela makhumbi leswaku va yingisa veni va vona, va va tsakisa etimhakeni hinkwato, va nga kanetani na vona, 10va nga yivi nchumu, kambe va endla hinkwaswo hi ku dzuneka lokunene va ta dzunisa etimhakeni hinkwato, dyondzo ya Xikwembu, Mukutsuri wa hina.
Nsinya wa tintswalo ta Xikwembu.
11Hikuva tintswalo ta Xikwembu, leti nga hlayisaka vanhu hinkwavo, ti vonakarile, 12ti hi dyondzisa leswaku hi tshika ku sandza swa Xikwembu, ni ku navela ka misava, hi ta hanya emikarhini ya sweswi hi ku tikhoma, ni ku lulama, ni vukhongeri, 13hi ri karhi hi langutela ku tshemba loku nga ni ku kateka, ni ku humelela ka ku vonakala ka Xikwembu lexikulu, ni Mukutsuri wa hina, Yesu Kriste, 14la titshikeleke hina, a ta hi kutsula eku hombolokeni hinkwako, a va a hi hlantswa ku tiendla ha hina tiko leri nga ra yena hi xiviri, leri chivirikelaka emitirhweni leyinene.
15Vula timhaka leti, u khongotela, u tshinya hi matimba hinkwawo; munhu a nga tshuki a ku sandza.
