TIPISALEMA 98

₁Yimbelelelani Yehovha risimu lerintshwa,

Hikuva u endlile swilo leswi hlamarisaka;

Voko ra yena ra xinene lero kwetsima ri n'wi pfunile.

₂Yehovha u kombisile ku hlayiseka ka yena,

U anekile ku lulama ka yena emahlweni ka matiko,

₃U anakanyile tintswalo ta yena,

Ni vunene bya yena eka yindlu ya Israele;

Makumu hinkwawo ya misava ma vonile ku hlayiseka ka Xikwembu xa hina.

₄N'wina hinkwenu vaaki va misava,

Tlakuselani eka Yehovha huwa ya ku tsaka.

Banani huwa ya n'wina, mi yimbelela,

₅Dzunisani Yehovha hi haripa,

Hi haripa ni marito ya tinsimu,

₆Hi tinanga ni timhalamhala,

Mi huwelela hi ku tsaka emahlweni ka Hosi Yehovha.

₇Lwandle a ri bobome, ni hinkwaswo leswi nga eka rona,

Na yona misava, ni vaaki hinkwavo va yona;

₈Milambu a yi phokotele mavoko,

Tintshava hinkwato a ti be mikulungwana hi ku tsaka,

₉Emahlweni ka Yehovha!

Hikuva wa ta ku avanyisa misava;

U ta avanyisa misava hi ku lulama,

Ni matiko hi vunene bya yena.