TIPISALEMA 97

₁Yehovha wa fuma.

Misava a yi tsake,

Swihlale hinkwaswo a swi tsakisise!

₂Mapapa ni munyama swi n'wi rhendzele,

Ku lulama, ni ku avanyisa, i masungulo ya xiluvelo xa yena.

₃Ndzilo wu n'wi rhangele emahlweni,

Wu hisa hi matlhelo hinkwawo valala va yena.

₄Rihati ra yena ri voningela misava,

Misava ya ri vona, ya rhurhumela.

₅Tintshava ti nyukisiwa kukota mumpfu emahlweni ka Yehovha,

Emahlweni ka Hosi ya misava hinkwayo.

₆Matilo ma vula ku lulama ka yena,

Ni matiko hinkwawo ma hlalela ku kwetsima ka yena.

₇Va khomiwa hi tingana, lava tirhelaka swifaniso,

Lava tidzunisaka hi swikwembu swahava.

₈N'wi khinsameleni, n'wina swikwembu hinkwenu!

Siyoni u swi twile, u tsakile,

Vanhwanyana va Yuda va le ku tsakeni lokukulu,

Hikwalaho ka ku avanyisa ka wena, Yehovha,

₉Hikuva wena Yehovha u muungameri wa misava hinkwayo,

U tlakukile ngopfungopfu ehenhla ka swikwembu hinkwaswo.

₁₀N'wina lami rhandzaka Yehovha, vengani leswo biha!

U hlayisa mimoya ya vakwetsimi va yena,

U va kutsula emavokweni ya lavo biha.

₁₁Ku vonakala ku byaleriwe la lulameke,

Ni ku tsaka ku nyikiwa va timbilu to lulama.

₁₂N'wina valulami, tsakelani Yehovha,

Mi dzunisa vito ra yena lero kwetsima.