Ku khongela Yehovha ku lweriwa eka vadyohi.
Eka mufambisi wa vasimi. Hi tinanga. Pisalema ya Davhida.
1Oho Yehovha! Rhiya ndleve eka marito ya mina!
U yingisa ku anakanya ka mbilu ya mina!
2Yingisa rito ra mina loko ndzi huwelela, wena hosi yanga, ni Xikwembu xanga!
Hikuva ndza ku khongela.
3Yehovha, u yingisa rito ra mina ka ha ri mixo;
Wa ha ri mixo, ndzi hundzuka eka wena, ndzi languta.
4Hikuva a ku Xikwembu lexi tsakelaka ku biha; Lowo biha a nga ka a nga aki na wena.
5Lavo hunguka va nga ka va nga yimi emahlweni ka wena;
U venga vadyohi hinkwavo.
6U herisa lava vulavulaka hi vunwa;
Vanhu va ngati ni lava xisaka, va sandzeka eka Yehovha.
7Kambe mina hi tintswalo ta wena letikulu ndzi ta nghena endlwini ya wena,
Ndzi ta khinsama hi ku chava etempeleni ya wena leyo kwetsima.
8Yehovha, ndzi fambise eku lulameni ka wena hikwalaho ka lava lwaka na mina.
U lunghisa ndlela ya mina emahlweni ka mina.
9Hikuva a ku na ku tshembeka emilon'wini ya vona;
Timbilu ta vona ti tele vumbabva,
Mikolo ya vona i masirha lama ahlameke,
Tindzimi ta vona ti ni marito ya ku kanganyisa.
10U va ba, Xikwembu, u va wisa hi makungu ya vona.
U va wisa hikwalaho ka swidyoho swa vona leswi teleke;
Hikuva va ku hundzukele.
11Kutani hinkwavo lava ku tshembaka va ta tsaka;
Va ta tsakisisa hilaha ku nga heriki, kutani u ta va lwela.
Lava rhandzaka vito ra wena va ta ku tsakela.
12Hikuva, wena Yehovha, u katekisa la lulameke,
Hi tintswalo ta wena u n'wi rhendzela swanga hi xitlhangu.
