TIPISALEMA 148

₁Dzunisani Yehovha!

Dzunisani Yehovha ematilweni, n'wi dzuniseni ehenhla ka mpfhuka!

₂N'wi dzuniseni, n'wina tintsumi ta yena hinkwato!

N'wi dzuniseni, mavandla ya yena hinkwawo!

₃N'wi dzuniseni, dyambu ni n'weti! N'wi dzuniseni hinkwenu, n'wina tinyeleti to vangama!

₄N'wi dzuniseni, matilo ya matilo,

Na n'wina mati lama nga ehenhla ematilweni!

₅Hinkwaswo sweswo a swi dzunise vito ra Yehovha!

Hikuva u lerisile, kutani swi va kona.

₆U swi vekile leswaku swi va kona hi laha ku nga yiki helo ni makumu,

U swi nyikile milawu, a ku na xin'we lexi yi tlulaka.

₇Dzunisani Yehovha, la emisaveni,

N'wina madragona, na n'wina swidziva hinkwenu.

₈Ndzilo ni xihangu; gamboko ni tihunguva,

Mimoya ya xidzedze leyi hetisaka ku lerisa ka yena.

₉Tintshava ni switsunga hinkwaswo,

Mirhi ya mihandzu, na n'wina tikedari hinkwenu,

₁₀Swiharhi ni swifuwo hinkwaswo,

Leswi kokovaka ni tinyanyana leti nga ni timpapa,

₁₁Tihosi ta misava ni matiko hinkwawo,

Tihosana, na n'wina hinkwenu vaavanyisi va misava,

₁₂Majaha ni vanhwana, swikoxa ni vana!

A va dzunise vito ra Yehovha!

₁₃Hikuva vito ra yena hi rona ntsena leri tlakukeke;

Vuhosi bya yena byi tlakukile ku tlula misava ni matilo.

₁₄U tiyisa rimhondzo ra tiko ra yena;

U ta dzunisiwa hi hinkwavo lava n'wi rhandzaka,

Va nga vana va Israele, tiko leri nga ekusuhi na yena.

Dzunisani Yehovha!