TIPISALEMA 147

₁Dzunisani Yehovha,

Hikuva swi lulamile, swi va swi nandziha ku dzunisa Xikwembu xa hina;

Ku bumabumeriwa, swa n'wi fanela.

₂Yehovha u pfuxa Yerusalema,

U hlengeleta vahlongoriwa va Israele;

₃U horisa lava timbilu leti tlhaviweke,

U bohelela timbanga ta vona.

₄U pima ntsengo wa tinyeleti,

U ti vita hinkwato hi mavito ya tona.

₅Hosi ya hina yi kulukumba;

matimba ya yona makulu ngopfu,

Vutlhari bya yona a byi na ku pimiwa.

₆Yehovha u pfuxa lava titsongahataka,

U tsongahata lavo biha ku fika ehansi.

₇Khensani Yehovha,

Mi dzunisa Xikwembu xa hina hi haripa!

₈U eneta tilo hi mapapa, u nisa mpfula emisaveni,

U mirisa byanyi etintshaveni.

₉U nyika swiharhi swakudya swa swona;

U phamela mavondlo ya mawukuwuku loko ma rila.

₁₀A nga vuri nchumu hi matimba ya hanci,

A nga tsakisiwi hi milenge ya munhu.

₁₁Yehovha u tsakela lava n'wi chavaka,

Lava tshembaka tintswalo ta yena.

₁₂Yerusalema, dzunisa Yehovha!

Siyoni, vonga Xikwembu xa wena!

₁₃Hikuva u tiyisa tinghole ta tinyangwa ta wena,

U katekisa vana va wena exikarhi ka wena.

₁₄U veka ku rhula emindzilekaneni ya wena,

U ku xurhisa hi mongo wa koroni.

₁₅U rhumela misava ku lerisa ka yena;

Rito ra yena ri ni rivilo lerikulu.

₁₆U nisa gamboko lero basa kukota voya bya nyimpfu,

U hangalasa xirhami tani hi nkuma.

₁₇U wisa xihangu xa yena lexi tiyeke;

I mani la kotaka ku yima emahlweni ka xirhami xa yena?

₁₈U rhuma rito ra yena, kutani a swi n'okisa;

U hungisa moya wa yena, kutani mati ma khuluka.

₁₉U hlavutele Yakobo rito ra yena,

Na Israele, milawu ya yena ni swileriso swa yena;

₂₀A nga endlanga sweswo eka matiko man'wana,

Kambe a ma tivi swileriso swa yena.