TIPISALEMA 106

₁Dzunisani Yehovha!

Dzunisani Yehovha, hikuva u lulamile,

Hikuva tintswalo ta yena hi leti nga heriki.

₂I mani la tivaka ku vula mitirho leyi tlakukeke ya Yehovha?

La nga ta twarisa ku dzuna ka yena hinkwako xana?

₃Ku katekile lava hlayisaka milawu,

Lava endlaka swinene hi mikarhi hinkwayo!

₄Yehovha, ndzi tsundzuke, hikwalaho ka rirhandzu ra wena eka tiko ra wena!

U ndzi tela hi ku hlayiseka ka wena,

₅Leswaku ndzi ta vona ku kateka ka vahlawuriwa va wena,

Ndzi va ndzi titsakela hi ku tsaka ka tiko ra wena,

Ndzi tidzunisa swin'we ni vadyandzhaka va wena.

₆Hi dyohile kukota vatata wa hina,

Hi fambile hi ku homboloka, hi endlile leswo biha.

₇Vatata wa hina a va tsundzukanga mahlori ya wena eEgipta,

A va anakanyanga ku tala ka mikateko ya wena,

Kambe va tiarisa ekusuhi ni lwandle, eLwandle-ro-Tshwuka.

₈Hambiswiritano, a va ponisa hikwalaho ka vito ra yena,

Leswaku a ta kombisa matimba ya yena.

₉A tshinya Lwandle ro Tshwuka kutani ri oma;

A va fambisa exikarhi ka swidziva, kukotisa exikarhi ka mananga.

₁₀A va lamulela evokweni ra loyi a va vengeke,

Kutani a va lwela evokweni ra nala.

₁₁Mati ma khubumeta vaxanisi va vona:

A ku salanga na un'we.

₁₂Kwalaho va pfumela marito ya yena,

Va yimbelela ku twala ka yena.

₁₃Kambe va hatlisa va rivala mitirho ya yena,

A va tshembanga makungu ya yena.

₁₄Va ngheniwa hi ku navela emananga,

Va ringa Xikwembu laha ku nga akiwiki.

₁₅Kutani xi va nyika hi ku kombela ka vona,

Kambe xi va rhumela ku vabya.

₁₆A va tshohoka Muxe emixaxeni,

Na Aroni, muhlawuriwa wa Yehovha.

₁₇Misava yi handzuka, yi mita Datani,

Yi funengeta ntlawa wa Abirama.

₁₈Ndzilo wu pfurha exikarhi ka nhlengeletano ya vona,

Kutani malangavi ma lovisa lavo biha.

₁₉Va tiendlele rhole eHorebe,

Va khinsamela xifaniso lexi chuluriweke,

₂₀Ku kwetsima ka vona, va ku hundzula

Xifaniso xa homu leyi dyaka byanyi.

₂₁Va rivarile Xikwembu, mukutsuri wa vona,

Lexi endleke swilo leswikulukumba eEgipta,

₂₂Ni swihlamariso emisaveni ya Hamu,

Ni swikombiso leswi chavisaka eLwandle-ro-Tshwuka.

₂₃Xi vurile leswaku xi ta va herisa,

Kambe Muxe, muhlawuriwa wa yena, a va lamulela,

Leswaku vukari bya xona byi miyela, va nga ti herisiwa.

₂₄Va nyenya tiko lero nandziha;

A va pfumelanga rito ra xona,

₂₅Kambe va dzumadzuma emitsongeni ya vona,

Va nga yingisanga rito ra Yehovha.

₂₆Hikwalaho xi tlakusile voko ra xona ehenhla ka vona,

Xi hlambanya leswaku xi ta va wisa emananga;

₂₇Xi cukumeta rixaka ra vona exikarhi ka vamatiko,

Xi va hangalasela ematikweni hinkwawo.

₂₈Va namarhela Baala-Peyori.

Va dya tinyama ta swifuwo leswi tlhaveriweke vafi.

₂₉Va karihisa Xikwembu hi mitirho ya vona leyo biha,

Ku fikela ntungu wu nghena exikarhi ka vona.

₃₀Hi loko Finiyasi a humelela, a rihisela Yehovha,

Kavaloko ntungu wu yima;

₃₁Kutani hi mhaka yoleyo a vuriwa la lulameke,

Exikarhi ka tinxakaxaka hi laha ku nga heriki.

₃₂Va hlundzukisa Xikwembu ematini ya Meriba;

Hikwalaho ka vona Muxe a humeleriwa hi khombo,

₃₃Hikuva va karihisile moya wa yena,

Na yena a vulavula hi nomu hi ku hatlisa.

₃₄Kambe a va herisangi matiko

Hi laha Yehovha a va leriseke hakona;

₃₅Kambe va hlanganile na vona,

Va dyondza mikhuva ya vona.

₃₆Va tirhela swikwembu swahava swa vona,

Leswi va khunguvanyiseke.

₃₇Va tlhavela swikwembu swa mavunwa

Vana va vona va vavanuna ni vanhwanyana va vona,

₃₈Va halata ngati leyi nga riki na nandzu,

Ngati ya vana va vona ni vanhwanyana va vona,

Lava va va tlhaveleke swifaniso swa Kanana,

Kutani misava yi nyamisiwa hi ngati leyi halatiweke.

₃₉Na vona va tichela hi thyaka hi mitirho ya vona,

Ni mitirho ya vuoswi bya vona.

₄₀Vukari bya Yehovha byi pfurhela tiko ra yena,

Ndzhaka ya yena yi hundzuka xilo lexa manyala.

₄₁A va nyiketa emavokweni ya vamatiko,

Kutani va fumiwa hi vavengi va vona,

₄₂Va xanisiwa hi valala va vona,

Va tsongahatiwa ehansi ka mavoko ya vona.

₄₃Hakanyingi Yehovha u va kutsurile,

Kambe vona va tiarisa hi ku tirhandzela makungu ya vona,

Kutani va tilahla hi ku biha ka vona.

₄₄Hambiswiritano a va languta loko va ri eku xanisekeni,

A yingisa swirilo swa vona.

₄₅Kutani a tsundzuka ntwanano wa yena hikwalaho ka vona,

A va tsetselela hikwalaho ka tintswalo ta yena letikulu.

₄₆A va pfuxela tintswalo eka hinkwavo lava va va boheke,

Lava ngi va ri vakhomiwa eka vona.

₄₇Yehovha, Xikwembu xa hina, hi kutsule!

Hi hlengelete exikarhi ka matiko,

Leswaku hi ta yimbelela vito ra wena leri kwetsimaka,

Hi ta tikurisa hi ku ku dzunisa!

₄₈A ku khensiwe Yehovha,

Xikwembu xa Israele,

Ku suka eku sunguleni, ku yisa laha ku nga heriki!

Tiko hinkwaro a ri vule: “Amen!”

Dzunisani Yehovha!